ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្តីសុចរិត ហើយក្នុងសេចក្តីបរិសុទ្ធរបស់ផងសេចក្តីពិត តាមភាពព្រះ។ អេភេសូរ ៤:២៤
លោកគ្រីស(Chris)បានធ្វើតេស្តឈាម បន្ទាប់ពីគាត់បានធ្វើការផ្លាស់ប្តូរខួរឆ្អឹងខ្នង បានរយៈពេល៤ឆ្នាំ ដែលបានសង្រ្គោះជីវិតគាត់។ អ្នកបរិច្ចាគខួរឆ្អឹងខ្នងបានផ្តល់ឲ្យនូវខួរឆ្អឹងខ្នង ដើម្បីព្យាបាលលោកគ្រីស ដោយនាំឲ្យមានរឿងដែលគួរឲ្យភ្ញាក់ផ្អើល។ គ្រូពេទ្យបានធ្វើតេស្តឈាមលោកគ្រីសក៏បានរកឃើញថា ឌីអិនអេ នៅក្នុងឈាមរបស់លោកគ្រីស គឺជាឌីអិនអេរបស់អ្នកបរិច្ចាគ មិនមែនជាឌីអិនអេរបស់គាត់ឡើយ។ គោលដៅនៃការព្យាបាលនេះ គឺដើម្បីជំនួសឈាមខ្សោយ ដោយឈាមដែលមានសុភាពល្អរបស់អ្នកបរិច្ចាគ។ ហើយសូម្បីតែនៅក្នុងសំណាកដែលពេទ្យបានយកចេញពីថ្ពាល់ បបូរមាត់ និងអណ្តាតរបស់លោកគ្រីស ក៏មានឌីអិនអេ របស់អ្នកបរិច្ចាគផងដែរ។ គាត់បានក្លាយជាមនុស្សម្នាក់ផ្សេងទៀត ទោះគាត់នៅមានការចងចាំ រូបរាង្គខាងក្រៅ និងឌីអិនអេ ដើមខ្លះក៏ដោយ។
រឿងរបស់លោកគ្រីស បានធ្វើឲ្យខ្ញុំនឹកចាំរឿងដែលកើតឡើង ក្នុងជីវិតមនុស្សដែលបានទទួលសេចក្តីសង្រ្គោះ ពីព្រះយេស៊ូវ។ នៅពេលដែលយើងមានការផ្លាស់ប្រែខាងវិញ្ញាណ នៅខណៈពេលដែលយើងជឿព្រះយេស៊ូវ យើងក៏បានកើតជាថ្មី(២កូរិនថូស ៥:១៧)។ សំបុត្រដែលសាវ័កប៉ុលបានសរសេរផ្ញើទៅពួកជំនុំនៅទីក្រុងអេភេសូរ បានលើកទឹកចិត្តពួកគេឲ្យបង្ហាញឲ្យអ្នកដទៃដឹងថា ពួកគេមានការផ្លាស់ប្រែនៅខាងក្នុង ដោយ “ដោះមនុស្សចាស់ ដែលតែងតែខូចទៅ” ហើយ “ប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្តីសុចរិត ហើយក្នុងសេចក្តីបរិសុទ្ធរបស់ផងសេចក្តីពិត តាមភាពព្រះ”(អេភេសូរ ៤:២២-២៤)។ ពោលគឺញែកខ្លួនចេញថ្វាយព្រះគ្រីស្ទ។
យើងមិនត្រូវការយកសំណាក ឬធ្វើតេស្ដឈាមដើម្បីពិនិត្យមើលឌីអិនអេ ដើម្បីបង្ហាញឲ្យគេដឹងថា ព្រះយេស៊ូវកំពុងតែធ្វើការនៅក្នុងជីវិតយើងនោះទេ។ ការផ្លាស់ប្រែនៅខាងក្នុង គឺតែងតែបង្ហាញចេញមកខាងក្រៅ តាមរបៀបដែលយើងទំនាក់ទំនងជាមួយមនុស្សដែលនៅជុំវិញខ្លួនយើង ដោយ “មានចិត្តសប្បុរសនឹងគ្នាទៅវិញទៅមក ព្រមទាំងមានចិត្តទន់សន្តោស ហើយអត់ទោសគ្នា ដូចជាព្រះទ្រង់បានអត់ទោសឲ្យអ្នករាល់គ្នា ដោយព្រះគ្រីស្ទដែរ”(ខ.៣២)។—Kirsten Holmberg
តើព្រះយេស៊ូវបានកែប្រែចិត្តអ្នកយ៉ាងដូចម្តេចខ្លះ? តើការផ្លាស់ប្រែខាងក្នុង បានបង្ហាញចេញមក តាមរយៈរបៀបដែលអ្នកទំនាក់ទំនងជាមួយមនុស្សនៅជុំវិញខ្លួនអ្នកឬទេ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការប្រទានជីវិតថ្មី និងឲ្យទូលបង្គំកើតជាថ្មី ក្នុងព្រះអង្គ។ សូមព្រះអង្គជួយទូលបង្គំ ឲ្យលះចោលជីវិតចាស់ ហើយឲ្យមានលក្ខណៈដូចព្រះអង្គវិញ។
Read New Life: The Transforming Power of the Gospel at DiscoverySeries.org/Q0417.
គម្រោងអានព្រះគម្ពីររយៈពេល១ឆ្នាំ : នេហេមា ៤-៦ និង កិច្ចការ ២:២២-៤៧
