ភាពបរិបូរ ដែលផ្គត់ផ្គង់ឲ្យការខ្វះខាត
ដោយKirsten Holmberg
June 21, 2022
ដើម្បីកាលណាគេមានបរិបូរ នោះនឹងបានបំពេញការ ដែលអ្នករាល់គ្នាខ្វះខាតវិញ ប្រយោជន៍ឲ្យបានស្មើគ្នាឡើង។ ២កូរិនថូស ៨:១៤ នៅអាមេរិក កន្លែងលក់អាហារក្នុងសាលារៀន មានលក្ខណៈមិនខុសពីភោជនីយដ្ឋានធំៗឡើយ។ ជាញឹកញាប់ កន្លែងលក់អាហារទាំងនោះបានត្រៀមម្ហូបអាហារ លើសពីតម្រូវការ ព្រោះពួកគេមិនអាចទាយស្មានជាមុនឲ្យបាន១រយភាគរយថា សិស្សត្រូវការអាហារអ្វីខ្លះ នៅថ្ងៃនីមួយៗ ហេតុនេះហើយ មានអាហារជាច្រើនដែលនៅសល់ ត្រូវគេបោះចោល។ តែមានសិស្សជាច្រើនដែលមិនមានអាហារគ្រប់គ្រាន់ សម្រាប់បរិភោគនៅផ្ទះ ហើយក៏មានអ្នកដែលគ្មានអាហារបរិភោគនៅចុងសប្តាហ៍។ ដូចនេះ មន្ទីរអប់រំប្រចាំស្រុកមួយនៅសហរដ្ឋអាមេរិក បានចាប់ដៃគូជាមួយអង្គការមិនរកប្រាក់ចំណេញក្នុងតំបន់មួយដើម្បីស្វែងរកដំណោះស្រាយ។ ពួកគេក៏បានវេចខ្ចប់អាហារដែលនៅសល់ ទុកឲ្យសិស្សយកទៅផ្ទះ ហើយទន្ទឹមនឹងនោះ ពួកគេក៏បានផ្សព្វផ្សាយអំពីបញ្ហានៃការខ្ជះខ្ជាយអាហារ និងការស្រេកឃ្លានផងដែរ។ មនុស្សភាគច្រើនមិនគិតថា ការមានលុយជាបរិបូរគឺជាបញ្ហា ដូចការខ្ជះខ្ជាយអាហារនោះឡើយ តែគោលការណ៍នៅពីក្រោយកម្មវិធីចែកអាហាររបស់សាលានោះ គឺមិនខុសពីអ្វីដែលសាវ័កប៉ុលបានបង្រៀន ក្នុងសំបុត្រដែលគាត់បានសរសេរផ្ញើទៅពួកជំនុំនៅទីក្រុងកូរិនថូសនោះឡើយ។ គាត់ដឹងថា ពួកជំនុំនៅស្រុកម៉ាសេដូនកំពុងជួបទុក្ខលំបាក ដូចនេះ គាត់ក៏បានសុំឲ្យពួកជំនុំនៅទីក្រុងកូរិនថូស ប្រើភាពបរិបូររបស់ខ្លួន ដើម្បីបំពេញតម្រូវការរបស់ពួកគេ(២កូរិនថូស ៨:១៤)។ គោលបំណងរបស់គាត់ គឺដើម្បីនាំមកនូវភាពស្មើភាពគ្នា ក្នុងចំណោមពួកជំនុំទាំងឡាយ ដើម្បីកុំឲ្យមានពួកជំនុំខ្លះមានភាពសម្បូរសប្បាយពេក ខណៈពេលដែលពួកជំនុំផ្សេងទៀត កំពុងជួបការខ្វះខាត។ សាវ័កប៉ុលមិនចង់ឲ្យពួកជំនុំនៅទីក្រុងកូរិនថូស ធ្លាក់ខ្លួនក្រ ដោយសារការជួយផ្គត់ផ្គង់គេនោះឡើយ តែគាត់គ្រាន់តែចង់ឲ្យ៊ពួកគេមានក្តីអាណិត និងមានចិត្តសប្បុរសចំពោះពួកជំនុំនៅស្រុកម៉ាសេដូន ដោយទទួលស្គាល់ថា នៅពេលអនាគត ពួកគេក៏អាចមានការខ្វះខាតដូចពួកជំនុំនៅស្រុកម៉ាសេដូនផងដែរ។ ពេលណាយើងឃើញអ្នកដទៃជួបការខ្វះខាត ចូរយើងធ្វើការវាយតម្លៃថា ខ្លួនយើងមានអ្វីដែលអាចចែករំលែកពួកគេដែរឬទេ។ ការជួយអ្នកដទៃ ឬការដាក់ដង្វាយឲ្យគេ ទោះតូចឬធំក្តី គឺមិនដែលអត់ប្រយោជន៍នោះឡើយ។—Kirsten Holmberg តើព្រះទ្រង់បានបំពេញតម្រូវការអ្នកយ៉ាងដូចម្តេចខ្លះ តាមរយៈអ្នកដទៃ ឬក្រុមណាមួយ? អ្នកអាចបង្ហាញភាពសប្បុរសស្រដៀងនោះដែរ ដល់អ្នកផ្សេងទៀត យ៉ាងដូចម្តេចខ្លះ? ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំឲ្យមើលឃើញតម្រូវការរបស់អ្នកដទៃ ដើម្បីឲ្យទូលបង្គំអាចថ្វាយធនធានដែលព្រះអង្គបានប្រទានទូលបង្គំ។ ពេលណាទូលបង្គំមានការខ្វះខាត សូមព្រះអង្គជួយទូលបង្គំឲ្យទុកចិត្តថា ព្រះអង្គនឹងផ្គត់ផ្គង់ទូលបង្គំ តាមរយៈអ្នកដែលស្រឡាញ់ព្រះអង្គផងដែរ។ គម្រោងអានព្រះគម្ពីររយៈពេល១ឆ្នាំ : នាងអេសធើរ ៦-៨ និង កិច្ចការ ៦