ការចំហចិត្តទទួលការបង្រៀន
ដោយBill Crowder
July 12, 2022
ប្រយោជន៍ឲ្យមនុស្សប្រាជ្ញាបានស្តាប់ ហើយចំរើនចំណេះឡើង ឲ្យអ្នកណាដែលមានយោបល់បានដឹងដល់សេចក្តីទូន្មានមាំទាំ។ សុភាសិត ១:៥ ការទទួលការរិះគន់ និងការកែតម្រង់ ពីអ្នកដទៃ មានសារៈសំខាន់ណាស់។ រឿងនេះក៏អាចកើតឡើង ក្នុងចំណោមអ្នកនិពន្ធផងដែរ។ ហេតុនេះហើយ ខ្ញុំមានការភ្ញាក់ផ្អើល ពេលដែលបានឃើញលោករីឆាត ប៊ី ហេយ(Richard B. Hays) ដែលជាបណ្ឌិត និងទេវវិទូ បានសរសេរអត្ថបទមួយ ដើម្បីកែសម្រួលសំណេរ ដែលគាត់បានសរសេរខុសកាលប៉ុន្មានឆ្នាំមុន។ គាត់បានបង្ហាញចេញនូវការបន្ទាបខ្លួន នៅក្នុងការផ្លាស់ប្តូរទស្សន: ដែលគាត់ធ្លាប់មានកាលពីអតីតកាល ដោយសព្វថ្ងៃនេះ គាត់បានប្ដេជ្ញាចិត្តរៀនសូត្រពីអ្នកដទៃ ពេញមួយជីវិត។ នៅក្នុងសេចក្តីផ្តើមនៃកណ្ឌគម្ពីរសុភាសិត ស្តេចសាឡូម៉ូន បានរៀបរាប់ត្រួសៗ អំពីគោលបំណង នៃការនិពន្ធសុភាសិត។ តែទន្ទឹមនឹងនោះ ទ្រង់ក៏បានជំរុញផងដែរថា ទ្រង់បាននិពន្ធសុភាសិតទាំងនោះ “ប្រយោជន៍ឲ្យមនុស្សប្រាជ្ញាបានស្តាប់ ហើយចំរើនចំណេះឡើង ឲ្យអ្នកណាដែលមានយោបល់បានដឹងដល់សេចក្តីទូន្មានមាំទាំ”(សុភាសិត ១:៥)។ ស្តេចសាឡូម៉ូនបានជំរុញពួកអ្នកប្រាជ្ញ ឲ្យស្តាប់ រៀនសូត្រ និងបន្តលូតលាស់ផងដែរ។ គឺមិនខុសពីសាវ័កប៉ុល ដែលបានអះអាងថា ទោះគាត់បានដើរតាមព្រះយេស៊ូវអស់រាប់សិបឆ្នាំហើយក្តី ក៏គាត់នៅតែព្យាយាមស្គាល់ព្រះយេស៊ូវជានិច្ច(ភីលីព ៣:១០)។ គ្មាននរណាម្នាក់រងគ្រោះ ដោយសារការបន្តបើកចំហចិត្តទទួលការបង្រៀនដ៏ត្រឹមត្រូវនោះឡើយ ។ ខណៈពេលដែលយើងព្យាយាមបន្តលូតលាស់ និងរៀនសូត្រអំពីសេចក្តីពិតក្នុងជំនឿ (និងរឿងនៃជីវិត) ចូរយើងអនុញ្ញាតឲ្យព្រះវិញ្ញាណបរិសុទ្ធ ដឹកនាំយើងចូលទៅក្នុងសេចក្តីពិត(យ៉ូហាន ១៦:១៣) ដើម្បីឲ្យយើងយល់កាន់តែច្បាស់ អំពីភាពអស្ចារ្យនៃព្រះដ៏ល្អ និងអស្ចារ្យនៃយើង។—Bill Crowder តើអ្នកមានការអន់ថយ ក្នុងផ្នែកណាខ្លះនៃជីវិត ឬក្នុងការលូតលាស់ខាងវិញ្ញាណ? តើអ្នកអាចបើកចំហចិត្តទទួលការបង្រៀនដូចម្តេចខ្លះ ដើម្បីឲ្យព្រះទ្រង់ជួយអ្នកឲ្យលូតលាស់ថែមទៀត ក្នុងជីវិត? ឱព្រះនៃសេចក្តីស្រឡាញ់ សូមព្រះអង្គរំឭកទូលបង្គំថា ទូលបង្គំមានសេចក្តីជាច្រើនដែលត្រូវរៀនសូត្រ អំពីព្រះអង្គ និងជីវិតនេះ។ សូមព្រះអង្គប្រទានទូលបង្គំ នូវវិញ្ញាណដែលបន្ទាបខ្លួន និងចំហចិត្តទទួលការបង្រៀន ដើម្បីឲ្យទូលបង្គំបន្តលូតលាស់ ក្នុងព្រះគុណ និងការស្គាល់ព្រះយេស៊ូវ។ For further study, see Why Read the Bible? at DiscoverySeries.org/courses/why-read-the-bible/. គម្រោងអានព្រះគម្ពីររយៈពេល១ឆ្នាំ : ទំនុកដំកើង ៤-៦ និង កិច្ចការ ១៧:១៦-៣៤