ងាកមករកផ្លូវរបស់ព្រះអង្គវិញ
ដោយKenneth Petersen
July 17, 2022
ទ្រង់ក៏ស្គាល់ផ្លូវដែលឯងបានដើរក្នុងទីរហោស្ថានសំបើមនេះផង ព្រះយេហូវ៉ាជាព្រះនៃឯង ទ្រង់បានគង់នៅជាមួយនឹងឯង អស់រវាង៤០ឆ្នាំនេះ ហើយឯងគ្មានខ្វះខាតអ្វីឡើយ។ ចោទិយកថា ២:៧ ឧបមាថា អ្នកកំពុងធ្វើដំណើរនៅតំបន់និរតី នៃសហរដ្ឋអាមេរិក ពីទីក្រុងវ៉ាយ(Why ប្រែថា ហេតុអ្វី) រដ្ឋអារីហ្សូណា។ ហើយក៏បានទៅរដ្ឋផ្សេងទៀត ដោយឆ្លងកាត់ ទីក្រុងអាន់សឺធិន(Uncertain ប្រែថា មិនច្បាស់លាស់) រដ្ឋតិចសាស់។ បត់ទៅតំបន់ឥសាន អ្នកត្រូវឈប់សម្រាក នៅទីក្រុងឌីសម៉ល(Dismal ប្រែថា គួរឲ្យព្រួយបារម្ភ) រដ្ឋធេនេស៊ី។ ទីបំផុតអ្នកទៅដល់គោលដៅរបស់អ្នក នៅទីក្រុងភែននិក(Panic ប្រែថាតក់ស្លត់) រដ្ឋភែនស៊ីលវែនា។ បើអ្នកបើកបរបន្តិចទៀត ប្រហែល៦ម៉ោង អ្នកអាចទៅដល់ទីក្រុងអាស៊ួរិន(Assurance ប្រែមកថា មានភាពជឿជាក់) នៅភាគខាងលិចរដ្ឋវើជីនា។ តំបន់ទាំងនោះសុទ្ធតែមានឈ្មោះចម្លែកៗ តែជាទីកន្លែងពិត ក្នុងទឹកដីអាមេរិក ទោះអ្នកមិនទំនងជាធ្វើដំណើរកាត់តាមតំបន់ទាំងនោះឬអត់ក៏ដោយ។ ជួនកាល ការធ្វើដំណើរនៃជីវិតមានអារម្មណ៍ដូចនេះឯង។ យើងក៏ងាយនឹងប្រៀបធៀបជីវិតយើង ទៅនឹងជីវិតដ៏ពិបាករបស់ប្រជាជនអ៊ីស្រាអែល ក្នុងវាលរហោស្ថាន(ចោទិយកថា ២:៧)។ ការរស់នៅអាចមានការពិបាកជាច្រើន។ ប៉ុន្តែ តើយើងបានសង្កេតឃើញចំណុចដូចគ្នាដទៃទៀតទេ? យើងទៅតាមផ្លូវរបស់យើង ដោយងាកបែរចេញពីផ្លូវព្រះ(១:៤២-៤៣)។ ជាញឹកញាប់ យើងច្រើនតែរអ៊ូរទាំអំពីការខ្វះខាតរបស់យើង មិនខុសពីពួកអ៊ីស្រាអែលឡើយ(ជនគណនា ១៤:២)។ ហើយក៏មានការសង្ស័យមកលើបំណងព្រះទ័យព្រះ ដោយការភ័យខ្លាច ដូចពួកគេផងដែរ(ខ.១១)។ រឿងរបស់សាសន៍អ៊ីស្រាអែលមានចំណុចជាច្រើនដែលដូចយើង។ ព្រះអង្គធានាយើងថា បើយើងដើរតាមផ្លូវព្រះអង្គ ព្រះអង្គនឹងរំដោះយើង ឲ្យទៅនៅកន្លែងដែលល្អជាងមុនឆ្ងាយណាស់។ ព្រះអង្គនឹងផ្គត់ផ្គង់យើង ហើយយើងនឹងមិនខ្វះអ្វីដែលយើងត្រូវការឡើយ(ចោទិយកថា ២:៧ ភីលីព ៤:១៩)។ តែយើងក៏បានដឹងហើយថា យើងបានធ្វើខុសម្តងហើយម្តងទៀត។ យើងចាំបាច់ត្រូវដើរតាមផ្លូវ ដែលព្រះអង្គបាននាំយើង។ បើយើងអនុញ្ញាតឲ្យព្រះអង្គនាំផ្លូវយើង(ទំនុកដំកើង ១១៩:៣៥) យើងនឹងបានធ្វើដំណើរជាមួយព្រះអង្គ ដោយការទុកចិត្តថា មិនអីទេនៅក្នុងចិត្ត!—Kenneth Petersen តើថ្មីៗនេះ អ្នកបានដើរតាមផ្លូវណាខ្លះ ដែលមិនបានដើរតាមផ្លូវរបស់ព្រះ? តើអ្នកមានការភ័យខ្លាច និងមានការរអ៊ូរទាំអំពីរឿងអ្វីខ្លះ? ឱព្រះដ៏ស្មោះត្រង់ សូមព្រះអង្គអត់ទោសឲ្យទូលបង្គំ ដែលមិនបានដើរតាមផ្លូវដែលព្រះអង្គដាក់ពីមុខទូលបង្គំ។ ទូលបង្គំមិនបានទុកចិត្តលើការផ្គត់ផ្គង់របស់ព្រះអង្គ។ សូមព្រះអង្គជួយទូលបង្គំ ឲ្យសម្រាក ដោយជឿជាក់លើការដឹកនាំរបស់ព្រះអង្គ។ គម្រោងអានព្រះគម្ពីររយៈពេល១ឆ្នាំ : ទំនុកដំកើង ១៨-១៩ និង កិច្ចការ ២០:១៧-៣៨