ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព នោះអ្នករាល់គ្នានឹងបានសេចក្តីសំរាកដល់ព្រលឹង។ ម៉ាថាយ ១១:២៩
លោកថូម៉ាស ឃីតធីង(Thomas Keating) បាននិពន្ធសៀវភៅដែលមានចំណងជើងថា ស្ថានភាពរបស់មនុស្ស ដែលក្នុងនោះ គាត់បានចែកចាយរឿងដែលគួរឲ្យចងចាំមួយថា៖ មានគ្រូបង្រៀនម្នាក់បានបាត់កូនសោផ្ទះ។ គាត់បានលត់ជង្គង់ចុះ នៅលើស្មៅ ដើម្បីរកមើលកូនសោនោះ។ ពេលដែលសិស្សគាត់ឃើញគាត់កំពុងស្វែងរកកូនសោដូចនោះ ពួកគេក៏បានជួយស្វែងរកផងដែរ តែរកមិនឃើញ។ ទីបំផុត សិស្សម្នាក់ដែលឆ្លាតជាងគេក៏បានសួរគាត់ថា “លោកគ្រូ តើលោកគ្រូនឹកឃើញថា កូនសោនោះប្រហែលបាត់នៅកន្លែងណា?” គ្រូរបស់ពួកគេក៏បានឆ្លើយថា “បាទ ខ្ញុំបានបាត់វា នៅក្នុងផ្ទះ”។ ពួកគេក៏បានលាន់មាត់ថា “បើអញ្ចឹង ហេតុអ្វីលោកគ្រូមកស្វែងរកវា នៅទីនេះទៅវិញ?” គាត់ឆ្លើយថា “ព្រោះនៅទីនេះ មានពន្លឺថ្ងៃស្រួលរកជាង”។
លោកឃីតធីង ក៏បានធ្វើការសន្និដ្ឋានថា យើងបានបាត់កូនសោចូលទៅរក “ការប្រកបស្និទ្ធស្នាលជាមួយព្រះ ដែលជាការចំណាយពេលជាមួយព្រះវត្តមាននៃក្តីស្រឡាញ់របស់ព្រះអង្គ”។ “បើគ្មានការប្រកបស្និទ្ធស្នាលជាមួយព្រះអង្គទេ នោះអ្វីគ្រប់យ៉ាងសុទ្ធតែគ្មានប្រយោជន៍។ តែបើយើងមានការប្រកបស្និទ្ធស្នាលជាមួយព្រះអង្គ នោះព្រះអង្គនឹងនាំយើងធ្វើអ្វីដែលមានប្រយោជន៍”។
មនុស្សពិតជាងាយភ្លេចថា សូម្បីតែនៅក្នុងពេលដែលជីវិតយើងកំពុងឡើងចុះ ព្រះទ្រង់នៅតែមានកូនសោសម្រាប់បំពេញការស្រេកឃ្លាន ដែលជ្រាលជ្រៅបំផុតរបស់យើង។ តែពេលណាយើងឈប់ស្វែងរកកូនសោនោះ នៅកន្លែងខុស ព្រះអង្គបានត្រៀមខ្លួនជាស្រេច ដើម្បីប្រទានយើង នូវការសម្រាកពិតប្រាកដ។ ក្នុងបទគម្ពីរម៉ាថាយ ជំពូក១១ ព្រះយេស៊ូវបានសរសើរដំកើងព្រះវរបិតា ដែលបានបង្ហាញផ្លូវព្រះអង្គ មិនមែនសម្រាប់ពួកអ្នកប្រាជ្ញា តែសម្រាប់ក្មេងតូចៗវិញ(ខ.២៥)។ បន្ទាប់មក ព្រះអង្គក៏បានត្រាស់ហៅ “អស់អ្នកដែលនឿយព្រួយ ហើយផ្ទុកធ្ងន់”(ខ.២៨) ឲ្យចូលមករកព្រះអង្គ ដើម្បីទទួលការសម្រាក។
យើងអាចរកឃើញការសម្រាកដ៏ពិត ពេលណាយើងស្គាល់ផ្លូវរបស់ព្រះ ដែលជាគ្រូរបស់យើង ទ្រង់មានព្រះទ័យស្លូត ហើយសុភាព (ខ.២៩)។ ព្រះអង្គបានត្រៀមជាស្រេច ដើម្បីស្វាគមន៍យើងចូលមករកការប្រកបស្និទ្ធស្នាលជាមួយព្រះអង្គ។—Monica La Rose
ហេតុអ្វីអ្នកចង់ស្វែងរកភាពស្កប់ចិត្ត និងក្តីអំណរ នៅកន្លែងខុស? តើធ្វើដូចម្តេចឲ្យអ្នកនឹកចាំថា អ្នកត្រូវស្វែងរកសន្តិភាព ការសម្រាក និងការស្កប់ចិត្ត ក្នុងព្រះអម្ចាស់វិញ?
ឱព្រះនៃសេចក្តីស្រឡាញ់ ទូលបង្គំពិតជាងាយនឹងស្វែងរកការស្កប់ចិត្ត ក្នុងកន្លែងដែលភ្នែកទូលបង្គំងាយស្រួលមើល គឺនៅកន្លែងដែលមនុស្សភាគច្រើនហាក់ដូចជាចូលចិត្តទៅ។ សូមព្រះអង្គជួយទូលបង្គំ ឲ្យមើលទៅ ហើយងាកមករកព្រះអង្គ ដើម្បីស្វែងរកការសម្រាកដ៏ពិត។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ៤៣-៤៥ និង កិច្ចការ ២៧:២៧-៤៤
