ប្តូរផ្តាច់ពេញមួយជីវិត
ដោយTim Gustafson
August 23, 2022
យ៉ូអាសទ្រង់ប្រព្រឹត្តសេចក្តីដ៏ត្រឹមត្រូវនៅព្រះនេត្រព្រះយេហូវ៉ា គ្រប់១ជីវិតយេហូយ៉ាដាដ៏ជាសង្ឃ។ ២របាក្សត្រ ២៤:២ លោកលីនហ្វ៊ត ដេតវេល័រ(Linford Detweiler) ជាអ្នកនិពន្ធបទចម្រៀង ដែលមានប្រសាសន៍ថា "មានសំណួរខុសៗគ្នា ដែលសីល្បៈករវ័យក្មេងអាចសួរ។ ទីមួយ ពួកគេអាចសួរថា តើធ្វើដូចម្តេច ឲ្យខ្ញុំមានឈ្មោះល្បី?" លោកដេតវេល័របានដាស់តឿនថា ការមានគោលដៅដូចនេះ ជាការបើកទ្វារស្វាគមន៍អំណាចនៃការបំផ្លិចបំផ្លាញគ្រប់ប្រភេទ ចូលក្នុងជីវិតហើយ។ ផ្ទុយទៅវិញ គាត់និងភរិយាគាត់ ក៏បានជ្រើសរើសយកវិថីនៃតន្រ្តីជីវិតដែលមិនសូវលេចធ្លោ ដែលក្នុងនោះ ពួកគេបន្តចម្រើនឡើង ពេញមួយជីវិត។ លោកយេហូយ៉ាដា មិនសូវមានឈ្មោះល្បីល្បាញ គេបានដឹងថា គាត់មានការប្តូរផ្តាច់ចំពោះព្រះ ពេញមួយជីវិតគាត់។ គាត់បានបម្រើការជាសង្ឃរបស់ព្រះ ក្នុងអំឡុងរជ្ជកាលរបស់ស្តេចយ៉ូអាស ដែលភាគច្រើនទ្រង់បានគ្រប់គ្រងប្រទេសជាតិបានល្អ ដោយសារជំនួយរបស់គាត់។ កាលស្តេចយ៉ូអាសទើបតែមានព្រះជន្ម៧ឆ្នាំ លោកយេហូយ៉ាដាជាអ្នកផ្តើមគំនិត ឲ្យតាំងទ្រង់ជាស្តេចស្របច្បាប់(២ពង្សាវតាក្សត្រ ១១:១-១៦)។ តែនេះមិនមែនជាការដណ្តើមអំណាចនោះឡើយ។ នៅថ្ងៃគ្រងរាជ្យ លោកយេហូយ៉ាដាបាន "ឲ្យស្តេច និងពួកជនចុះសញ្ញានឹងព្រះយេហូវ៉ាថា គេនឹងធ្វើជារាស្ត្ររបស់ផងព្រះយេហូវ៉ា ហើយឲ្យស្តេច និងពួករាស្ត្រ ចុះសញ្ញាគ្នាដែរ" (ខ.១៧)។ គាត់ក៏បានប្រកាន់ខ្ជាប់តាមសេចក្តីសញ្ញា ដោយធ្វើការកែទម្រង់ ដែលប្រទេសគាត់កំពុងត្រូវការយ៉ាងខ្លាំង។ " ការថ្វាយដង្វាយដុត នៅក្នុងព្រះវិហារនៃព្រះយេហូវ៉ា ក៏នៅមានជានិច្ចគ្រប់១ជីវិតរបស់លោកយេហូយ៉ាដា"(២របាក្សត្រ ២៤:១៤)។ ដោយសារការប្តូរផ្តាច់របស់គាត់ គេក៏បានបញ្ចុះសពគាត់ នៅជាមួយនឹងពួកស្តេច នៅក្នុងក្រុងដាវីឌ(ខ.១៦)។ ការរស់នៅដែលផ្តោតចិត្តទៅលើព្រះ យ៉ាងដូចនេះ គឺជាការស្តាប់បង្គាប់ដ៏យូរអង្វែង ទៅតាមទិសដៅតែមួយ។ អ្វីដែលចម្លែកនោះគឺ ការស្តាប់បង្គាប់ដូចនេះមានភាពលេចធ្លោ ក្នុងលោកិយដែលស្រឡាញ់ភាពល្បីល្បាញ អំណាច និងការបំពេញចិត្តខ្លួនឯង។—Tim Gustafson ចូរពិពណ៌នា អំពីទិសដៅនៃជីវិតអ្នក ក្នុងពេលសព្វថ្ងៃ។ តើអ្នកចង់ឲ្យព្រះទ្រង់ជួយអ្នកកែប្រែ នៅត្រង់ចំណុចណាខ្លះ? ឱព្រះអម្ចាស់ សូមព្រះអង្គជួយទូលបង្គំ ឲ្យស្វែងរកព្រះអង្គ និងប្រាជ្ញាព្រះអង្គ ក្នុងការរស់នៅ ជាជាងដេញតាមអ្វីៗដែលមិនស្ថិតស្ថេរ។ To discover what we can learn from the lives of the Kings of Israel, visit ODBU.org/ML102. គម្រោងអានព្រះគម្ពីររយៈពេល១ឆ្នាំ : ទំនុកដំកើង ១១៣-១១៥ និង ១កូរិនថូស ៦