សេចក្តីជំនួយរបស់ខ្ញុំមកតែពីព្រះយេហូវ៉ាទេ គឺជាព្រះដែលបង្កើតផ្ទៃមេឃ និងផែនដី។ ទំនុកដំកើង ១២១:២
ថ្ងៃនោះជាថ្ងៃច័ន្ទ តែមិត្តភក្តិខ្ញុំ ឈ្មោះ ឈា-មីង(Chia-ming) មិនបាននៅការិយាល័យទេ។ គាត់នៅផ្ទះ កំពុងសម្អាតបន្ទប់ទឹក។ គាត់គិតថា គាត់អត់ការងារធ្វើមួយខែហើយ ហើយគាត់មិនឃើញមានឱកាសការងារសោះ។ ក្រុមហ៊ុនគាត់បានបិទទ្វារ ដោយសារការរាតត្បាតនៃជំងឺកូវីត១៩។ ការព្រួយបារម្ភអំពីពេលអនាគត បាននាំឲ្យឈា-មីងមានការភ័យខ្លាច។ គាត់គិតថា ខ្ញុំត្រូវរកប្រាក់ចិញ្ចឹមគ្រួសារ។ តើខ្ញុំទៅរកជំនួយនៅកន្លែងណា?
នៅគ្រាសញ្ញាចាស់ ក្នុងបទគម្ពីរទំនុកដំកើង ១២១:១ អ្នកធ្វើដំណើរទៅទីក្រុងយេរូសាឡិម ដើម្បីប្រារព្ធពិធីបុណ្យ បានសួរសំណួរស្រដៀងនេះផងដែរថា តើពួកគេត្រូវទៅរកជំនួយនៅទីណា? ការធ្វើដំណើរទៅទីក្រុងបរិសុទ្ធ នៅលើភ្នំស៊ីយ៉ូន មានចម្ងាយឆ្ងាយ ហើយមានគ្រោះថ្នាក់ច្រើនផង ដោយអ្នកដំណើរទាំងឡាយត្រូវស៊ូទ្រាំនឹងការឡើងទៅកន្លែងខ្ពស់ៗ ដែលពិបាកក្រៃលែង។ បញ្ហាប្រឈមដែលពួកគេជួប ហាក់ដូចជាការធ្វើដំណើរដ៏ពិបាក ដែលយើងជួប ក្នុងជីវិត ក្នុងពេលសព្វថ្ងៃ ដោយដើរតាមផ្លូវនៃជំងឺ បញ្ហាទំនាក់ទំនង ការបែកបាក់ ស្រ្តេសនៅកន្លែងធ្វើការ ឬមានបញ្ហាហិរញ្ញវត្ថុ និងភាពគ្មានការងារធ្វើ ដូចឈា-មីង ជាដើម។
តែយើងអាចមានសង្ឃឹមឡើង ដោយផ្អែកទៅលើសេចក្តីពិតដែលថា ព្រះដែលបានបង្កើតផ្ទៃមេឃ និងផែនដី នឹងជួយយើង(ខ.២)។ ព្រះអង្គថែរក្សាជីវិតយើង(ខ.៣,៥,៧-៨) ហើយព្រះអង្គជ្រាបថា យើងត្រូវការអ្វីខ្លះ។ ព្រះគម្ពីរដើមជាភាសាហេព្រើរបានប្រើពាក្យ សាមា ក្នុងបទគម្ពីរនេះ ដែលមានន័យថា “ការពារ”។ ព្រះអាទិករនៃចក្រវាល ជាអ្នកការពារយើង។ យើងស្ថិតនៅក្នុងការឃុំគ្រងរបស់ព្រះអង្គ។ ថ្មីៗនេះ ឈា-មីងបានចែកចាយថា “ព្រះអង្គថែរក្សាខ្ញុំ និងក្រុមគ្រួសារខ្ញុំ ហើយទន្ទឹមនឹងនោះ ព្រះអង្គបានឲ្យខ្ញុំមានការងារជាគ្រូបង្រៀន”។
ខណៈពេលដែលយើងទុកចិត្ត និងស្តាប់បង្គាប់ព្រះ គ្រប់ជំហាន ក្នុងដំណើរជីវិតយើង យើងអាចមើលទៅមុខ ដោយក្តីសង្ឃឹម ដោយដឹងថា យើងស្ថិតនៅក្នុងការឃុំគ្រង និងការការពារ នៃប្រាជ្ញា និងសេចក្តីស្រឡាញ់របស់ព្រះអង្គ។—Karen Huang
តើអ្នកត្រូវការជំនួយអ្វីខ្លះពីព្រះ នៅថ្ងៃនេះ? តើការដឹងថា ព្រះអង្គជាអ្នកបង្កើតផ្ទៃមេឃ និងផែនដីបានលើកទឹកចិត្តអ្នកយ៉ាងណាខ្លះ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការធ្វើជាប្រភពនៃជំនួយរបស់ទូលបង្គំ នៅក្នុងដំណើរជីវិតទូលបង្គំ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១១៩:១-៨៨ និង ១កូរិនថូស ៧:២០-៤០
