បើអ្នកណាដែលមិនចេះគ្រប់គ្រងលើចិត្តរបស់ខ្លួន នោះធៀបដូចជាទីក្រុងដែលរលំ ហើយឥតមានកំផែង។ សុភាសិត ២៥:២៨
ដើមផ្កានៅផ្ទះខ្ញុំត្រូវសត្វចង្រៃស៊ីបំផ្លាញ។ ផ្សិលមិញ ផ្កាបានរីកស្គុះស្គាយ នៅក្នុងសួន។ តែឥឡូវនេះ ផ្កាទាំងនោះនៅសល់តែទង។ ខ្ញុំក៏បានដើររកមើលនៅក្នុងទីធ្លាផ្ទះខ្ញុំ ហើយក៏បានរកឃើញរន្ធមួយ មានទំហំប៉ុនរន្ធទន្សាយ នៅកៀនរបងឈើ។ សត្វទន្សាយមានរូបរាង្គគួរឲ្យស្រឡាញ់ តែវាក៏ជាសត្វដែលគួរឲ្យរំខាន ដែលអាចបំផ្លាញសួនផ្កា ក្នុងរយៈពេលតែប៉ុន្មាននាទីប៉ុណ្ណោះ។
រឿងនេះបានធ្វើឲ្យខ្ញុំឆ្ងល់ថា តើមានសត្វចង្រៃ ដែលកំពុងបំផ្លាញផ្កានៃចរិយាសម្បត្តិរបស់ព្រះ ដែលកំពុងរីកស្គុះស្គាយក្នុងជីវិតខ្ញុំទេ? បទគម្ពីរសុភាសិត ២៥:២៨ បានចែងថា “បើអ្នកណាដែលមិនចេះគ្រប់គ្រងលើចិត្តរបស់ខ្លួន នោះធៀបដូចជាទីក្រុងដែលរលំ ហើយឥតមានកំផែង”។ នៅសម័យបុរាណ គេសង់កំផែងព័ទ្ធជុំវិញទីក្រុង ដើម្បីទប់ទល់ការឈ្លានពានរបស់សត្រូវ។ សូម្បីតែចន្លោះប្រហោងតូចមួយ នៅលើកំផែងនោះ ក៏អាចជាចំណុចខ្សោយ ដែលពួកសត្រូវអាចប្រើ ដើម្បីវាយចូលកាន់កាប់ទីក្រុងនោះបានដែរ។
បទគម្ពីរសុភាសិតជាច្រើនបានចែង អំពីការគ្រប់គ្រងចិត្តខ្លួនឯង។ ឧទាហណ៍ “តើឯងរកបានឃ្មុំហើយឬ ចូរបរិភោគតែល្មមសមគួរចុះ ក្រែងបរិភោគឆ្អែតទៅនឹងក្អួតចេញមកវិញ”(២៦:១៦)។ ការគ្រប់គ្រងចិត្តខ្លួនឯង ឬការដឹងខ្នាត គឺជាផលផ្លែនៃព្រះវិញ្ញាណ ដែលការពារយើង មិនឲ្យប្រព្រឹត្ត ដោយខ្វះភាពអត់ធ្មត់ ចិត្តជូរល្វីង ភាពលោភលន់ និងសេចក្តីអាក្រក់ដទៃទៀត ដែលអាចលួចឆ្មក់ចូល និងបំផ្លាញផលផ្លែដែលព្រះទ្រង់ប្រទានក្នុងជីវិតយើង(មើលកាឡាទី៥:២២-២៣)។ ការចេះគ្រប់គ្រងចិត្ត ជាការមានចិត្តដែលប្រុងប្រយ័ត្ន ដែលរកមើលប្រហោងក្នុងកំផែងនៃជីវិតយើង ហើយជួសជុលប្រហោងទាំងនោះឲ្យជិត។
ពេលណាខ្ញុំពិនិត្យមើលជីវិតខ្លួនឯង ជួនកាល ខ្ញុំអាចរកឃើញចន្លោះប្រហោងដែលងាយរងគ្រោះ។ គឺចំណុចដែលខ្ញុំចាញ់ការល្បួងម្តងហើយម្តងទៀត។ ឬជាចំណុចដែលខ្វះភាពអត់ធ្មត់។ ដូចនេះ ខ្ញុំពិតជាត្រូវការការគ្រប់គ្រងចិត្ត ដោយការដឹកនាំរបស់ព្រះ ក្នុងជីវិតខ្ញុំ ដើម្បីការពារខ្ញុំ ឲ្យរួចផុតពីខ្មាំងសត្រូវខាងវិញ្ញាណ។—ELISA MORGAN
តើមានចន្លោះប្រហោងអ្វីខ្លះ ដែលអ្នកមើលឃើញក្នុងកំផែងនៃចិត្តរបស់អ្នក? តើផលផ្លែនៃការដឹងខ្នាត ឬការគ្រប់គ្រងចិត្តខ្លួនឯង អាចជួយការពារជីវិតអ្នក ពីខ្មាំងសត្រូវខាងវិញ្ញាណយ៉ាងដូចម្តេចខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យមានផលផ្លែនៃការដឹងខ្នាត ក្នុងជីវិតទូលបង្គំ ដើម្បីការពារទូលបង្គំ ឲ្យរួចផុតពីខ្មាំងសត្រូវឈ្លានពានខាងវិញ្ញាណ។
For further study, read Words Matter at DiscoverySeries.org/Q0741.
គម្រោងអានព្រះគម្ពីរយៈពេល១ឆ្នាំ : ទំនុកដំកើង ១៤៨-១៥០ និង ១កូរិនថូស ១៥:២៩-៥៨
