យើងនឹងនៅជាមួយនឹងព្រះអម្ចាស់ជាដរាបទៅ។ ១ថែស្សាឡូនិច ៤:១៧
កាលខ្ញុំសរសេរដំណឹងមរណភាពរបស់ម្តាយខ្ញុំ ខ្ញុំមានអារម្មណ៍ថា ខ្ញុំមិនគួរប្រើពាក្យ មរណៈភាព ដោយសារខ្ញុំមានសង្ឃឹមថា ខ្ញុំនឹងបានជួបជុំជាមួយគាត់ឡើងវិញ នៅនគរស្ថានសួគ៌។ ដូចនេះ ខ្ញុំក៏បានសរសេរដូចនេះវិញថា “ព្រះយេស៊ូវបានស្វាគមន៍គាត់ ចូលទៅនៅក្នុងព្រះហស្តព្រះអង្គ”។ ទោះជាយ៉ាងណាក៏ដោយ នៅពេលខ្លះ ខ្ញុំនៅមានអារម្មណ៍សោកសង្រេង ពេលដែលខ្ញុំមើលរូបថតគ្រូសារ ដែលថតជុំគ្នានៅពេលថ្មីៗនេះ ដោយគ្មានរូបគាត់ថតជាមួយ។ ខ្ញុំរកបានជាងគំនូរម្នាក់ ដែលអាចគូរូបគ្រួសារជុំគ្នា ដោយរាប់បញ្ចូលទាំងអ្នកដែលបានលាចាកលោកផងដែរ។ វិចិត្រកររូបនោះក៏បានប្រើរូបថតរបស់ម្តាយខ្ញុំ ដើម្បីគូរូបគាត់ឈរនៅក្បែររូបរបស់យើង ក្នុងផ្ទាំងគំនូរគ្រួសារ ដែលបានធ្វើឲ្យខ្ញុំនឹកចាំ អំពីព្រះបន្ទូលសន្យារបស់ព្រះ អំពីការជួបជុំគ្នាឡើងវិញ ក្នុងនគរស្ថានសួគ៌។ ខ្ញុំក៏បានស្រក់ទឹកភ្នែក ដោយការដឹងគុណព្រះ ខណៈពេលដែលខ្ញុំនឹកស្រមៃថា ខ្ញុំនឹងបានឃើញម្តាយខ្ញុំញញឹមនៅក្បែរខ្ញុំម្តងទៀត។
សាវ័កប៉ុលបានបញ្ជាក់ថា អ្នកជឿព្រះយេស៊ូវ មិនចាំបាច់ត្រូវសោកសង្រេង “ដូចអ្នកឯទៀត ដែលគ្មានសង្ឃឹមឡើយ”(១ថែស្សាឡូនិច ៤:១៣)។ “ដ្បិតបើយើងជឿថា ព្រះយេស៊ូវបានសុគត ព្រមទាំងរស់ឡើងវិញហើយ នោះត្រូវជឿថា ព្រះទ្រង់នឹងនាំអស់អ្នក ដែលដេកលក់ទៅក្នុងព្រះយេស៊ូវ ឲ្យបានមកជាមួយនឹងទ្រង់ដែរ”(ខ.១៤)។ សាវ័កប៉ុលបានប្រកាសអំពីការយាងត្រឡប់មកវិញរបស់ព្រះយេស៊ូវ ហើយប្រកាសថា អ្នកជឿទាំងអស់នឹងបានជួបជុំជាមួយព្រះយេស៊ូវ (ខ.១៧)។
ព្រះបន្ទូលសន្យារបស់ព្រះ អំពីការជួបជុំឡើងវិញ នៅនគរស្ថានសួគ៌ អាចកម្សាន្តចិត្តយើង ពេលណាយើងសោកសង្រេង អំពីការបាត់បង់មនុស្សជាទីស្រឡាញ់ ដែលបានទទួលជឿព្រះយេស៊ូវ។ ព្រះបន្ទូលសន្យា អំពីការជួបជុំនៅពេលអនាគត ជាមួយមហាក្សត្រនៃយើងដែលមានព្រះជន្មរស់ឡើងវិញ ក៏បានផ្តល់ឲ្យយើង នូវក្តីសង្ឃឹមដ៏ស្ថិតស្ថេរ នៅពេលដែលយើងកំពុងរស់នៅលើផែនដី រហូតដល់ថ្ងៃ ដែលព្រះយេស៊ូវយាងមកវិញ ឬហៅយើងឲ្យទៅនៅជាមួយព្រះអង្គ។—XOCHITL DIXON
តើព្រះទ្រង់បានប្រើព្រះបន្ទូលសន្យា អំពីការជួបជុំជាថ្មី នៅនគរស្ថានសួគ៌ ដើម្បីកម្សាន្តចិត្តអ្នកយ៉ាងណាខ្លះ ក្នុងពេលដែលអ្នកសោកសង្រេង? ហេតុអ្វីការសន្យា អំពីការជួបជុំគ្នានៅនគរស្ថានសួគ៌ បាននាំឲ្យអ្នកមានសង្ឃឹមដ៏អស្ចារ្យ?
ឱព្រះអង្គសង្គ្រោះនៃសេចក្តីស្រឡាញ់ ទូលបង្គំសូមអរព្រះគុណព្រះអង្គ សម្រាប់ការប្រទានទូលបង្គំ នូវក្តីសង្ឃឹមដ៏ស្ថិតស្ថេរ សម្រាប់ចែករំលែកជាមួយអ្នកដទៃ រហូតដល់ថ្ងៃដែលព្រះអង្គត្រាស់ហៅទូលបង្គំ ឲ្យទៅនៅជាមួយព្រះអង្គ ឬយាងត្រឡប់មកវិញ។
For further study, read Life to Come at DiscoverySeries.org/Q1205.
គម្រោងអានព្រះគម្ពីរយៈពេល១ឆ្នាំ : សុភាសិត ៦-៧ និង ២កូរិនថូស ២
