ឯអស់អ្នកដែលស្គាល់ព្រះនាមទ្រង់ គេនឹងទុកចិត្តដល់ទ្រង់។ ទំនុកដំកើង ៩:១០
កាលពីក្មេង មានពេលមួយ ខ្ញុំមានការភ័យខ្លាច លែងហ៊ានទៅសាលារៀនទៀត។ មានសិស្សស្រីៗមួយចំនួន បានធ្វើបាបខ្ញុំ ដោយការលេងសើចដ៏សាហាវ។ ក្នុងអំឡុងពេលចេញលេង ខ្ញុំក៏បានស្វែងរកកន្លែងជ្រកកោន នៅក្នុងបណ្ណាល័យ ដែលនៅទីនោះ ខ្ញុំក៏បានអានសៀវភៅរឿងភាគរបស់គ្រីស្ទបរិស័ទ។ ខ្ញុំចាំថា ពេលនោះ ខ្ញុំក៏បានអានចំព្រះនាម “ព្រះយេស៊ូវ” ជាលើកទី១។ ខ្ញុំក៏បានដឹងថា ព្រះយេស៊ូវ គឺជាព្រះនាម របស់ព្រះដែលស្រឡាញ់ខ្ញុំ។ នៅខែក្រោយៗ ពេលណាខ្ញុំដើរចូលសាលារៀន ដោយការភ័យខ្លាចទារុណកម្ម ដែលកំពុងរង់ចាំខ្ញុំ ខ្ញុំក៏បានអធិស្ឋានថា “ព្រះយេស៊ូវអើយ សូមព្រះអង្គការពារទូលបង្គំ”។ ពេលនោះ ខ្ញុំក៏មានអារម្មណ៍ថា រឹងមាំ និងមានសន្តិភាពក្នុងចិត្តខ្លាំងជាងមុន ដោយដឹងថា ព្រះអង្គកំពុងតែមើលថែខ្ញុំ។ នៅពេលខ្លះ ពួកសិស្សស្រីទាំងនោះ ក៏មានការនឿយហត់ ក្នុងការធ្វើបាបខ្ញុំ ហើយក៏បានឈប់ធ្វើបាបខ្ញុំទៀត។
អស់រយៈពេលជាច្រើនឆ្នាំកន្លងមកនេះ ការទុកចិត្តព្រះនាមព្រះអង្គ នៅតែបន្តចម្រើនកម្លាំងខ្ញុំ ក្នុងពេលដែលមានទុក្ខលំបាក។ ការទុកចិត្តព្រះនាមទ្រង់ គឺជាការជឿថា អ្វីដែលទ្រង់មានបន្ទូល អំពីចរិយាសម្បត្តិរបស់ព្រះអង្គ គឺសុទ្ធតែជាការពិត ហើយការនេះបានជួយឲ្យខ្ញុំសម្រាកក្នុងព្រះអង្គ។
ស្តេចដាវីឌក៏បានជ្រាបផងដែរថា ការទុកចិត្តព្រះនាមព្រះ នាំឲ្យទ្រង់មានសន្តិភាពក្នុងចិត្ត។ កាលទ្រង់និពន្ធបទគម្ពីរទំនុកដំកើងជំពូក៩ ទ្រង់បានពិសោធន៍នឹងការប្រកបស្និទ្ធស្នាលជាមួយព្រះ ដែលជាអ្នកគ្រប់គ្រងមានគ្រប់ចេស្ដា មានយុត្តិធម៌ និងស្មោះត្រង់(ខ.៧-៨,១០,១៦)។ ហេតុនេះហើយ ស្តេចដាវីឌក៏បានបង្ហាញចេញនូវការទុកចិត្តលើព្រះនាមព្រះ ដោយចូលទៅក្នុងសង្គ្រាមប្រយុទ្ធនឹងខ្មាំងសត្រូវរបស់ទ្រង់ ដោយមិនបានទុកចិត្តលើអាវុធ ឬសមត្ថភាពរបស់ទ្រង់ឡើយ តែដោយទុកចិត្តលើព្រះ ដែលនឹងជួយទ្រង់ ដោយធ្វើជា “ទីពឹងជ្រកដល់អ្នកដែលគេសង្កត់សង្កិន”(ខ.៩)។
កាលពីក្មេង ខ្ញុំបានអំពាវនាវព្រះនាមព្រះអង្គ ហើយក៏បានទទួលជំនួយពីព្រះអង្គ តាមព្រះបន្ទូលសន្យា។ ចូរយើងទុកចិត្តលើព្រះនាមព្រះយេស៊ូវជានិច្ច ជាព្រះនាមនៃព្រះដែលស្រឡាញ់យើង។—KAREN HUANG
តើមានបញ្ហាប្រឈមអ្វី ដែលធ្វើឲ្យអ្នកមានទុក្ខកង្វល់? តើការជញ្ជឹងគិត អំពីព្រះនាមព្រះយេស៊ូវ បានជួយឲ្យអ្នកទុកចិត្តព្រះអង្គយ៉ាងណាខ្លះ?
ឱព្រះវរបិតា ដែលគង់នៅស្ថានសួគ៌ សូមព្រះអង្គបង្រៀនទូលបង្គំ ឲ្យដឹងថា ព្រះអង្គជានរណា ដើម្បី កុំឲ្យទូលបង្គំសង្ស័យមកលើព្រះអង្គ ក្នុងកាលៈទេសៈ ដែលទូលបង្គំជួបប្រទះ។
គម្រោងអានព្រះគម្ពីរយៈពេល១ឆ្នាំ : សុភាសិត ១៣-១៥ និង ២កូរិនថូស ៥
