បទពិសោធន៍ដ៏តក់ស្លុតជាមួយត្រីបាឡែន
ដោយMike Wittmer
September 12, 2022
ព្រះយេហូវ៉ាទ្រង់បង្គាប់ដល់ត្រីនោះ វាក៏ក្អែយ៉ូណាសចេញនៅលើដីគោក។ យ៉ូណាស ២:១១ មានពេលមួយ ម៉ៃឃល(Michael) ជ្រមុជទឹកទៅដល់បាតសមុទ្រ ដើម្បីចាប់បង្កង ហើយក៏បានចូលទៅក្នុងមាត់ត្រីបាឡែនដែលកំពុងហែលទឹកនៅក្បែរនោះ។ គាត់បានព្យាយាមរើបម្រាស់នៅក្នុងពោះត្រីបាឡែន ដែលងងឹតគ្មានពន្លឺ ខណៈពេលដែលសាច់ដុំរបស់វាបានសង្កត់មកលើខ្លួនគាត់។ គាត់គិតថា ជីវិតគាត់ដល់ទីបញ្ចប់ហើយ។ ប៉ុន្តែ សត្វត្រីបាឡែនមិនចង់លេបអ្នកនេសាទបង្កងនោះទេ ហើយ៣០វិនាទីក្រោយមក វាក៏បានស្តោះម៉ៃឃលចេញពីមាត់វា បាញ់ឡើងទៅលើ។ ពិតជាអស្ចារ្យណាស់ ម៉ៃឃលមិនបានបាក់ឆ្អឹងទេ គ្រាន់តែមានស្នាមជាំនៅលើខ្លួនគាត់ និងបទពិសោធន៍ដ៏តក់ស្លុតជាមួយសត្វត្រីបាឡែន។ គាត់មិនមែនជាមនុស្សទីមួយ ដែលត្រូវត្រីធំលេបចូលពោះនោះឡើយ។ ហោរាយ៉ូណាសត្រូវត្រីធំ លេបផងដែរ(យ៉ូណាស ១:១៧) ហើយគាត់បានរស់នៅក្នុងពោះវា៣ថ្ងៃ មុនពេលវាខ្ជាក់គាត់ចេញនៅលើដីគោក(១:១៧ ២:១០)។ ហោរាយ៉ូណាសត្រូវសត្វត្រីលេបចូលក្នុងពោះ ដោយសារគាត់ស្អប់ខ្មាំងសត្រូវរបស់សាសន៍អ៊ីស្រាអែល ហើយមិនចង់ឲ្យពួកគេប្រែចិត្តចេញពីអំពើបាប គឺខុសពីម៉ៃឃល ដែលបានចូលទៅក្នុងមាត់ត្រីបាឡែនដោយចៃដន្យ។ ពេលដែលព្រះទ្រង់ប្រាប់លោកយ៉ូណាសឲ្យប្រកាសព្រះបន្ទូល នៅទីក្រុងនីនីវេ គាត់បែរជាជិះសំពៅទៅតាមទិសដៅផ្សេងវិញ។ ដូចនេះ ព្រះទ្រង់ក៏បានចាត់ត្រីធំមួយ ឲ្យលេបគាត់ ដើម្បីឲ្យគាត់ភ្ញាក់ខ្លួន។ ខ្ញុំយល់អំពីមូលហេតុដែលលោកយ៉ូណាសស្អប់សាសន៍អាសស៊ើរ។ ព្រោះពួកគេធ្លាប់ធ្វើបាបសាសន៍អ៊ីស្រាអែលយ៉ាងខ្លាំង ហើយក៏បានចាប់ពូជអំបូរនៅខាងជើងជាចំណាប់ខ្មាំង ឲ្យទៅនៅទឹកដីសាសន៍ដទៃអស់៥០ឆ្នាំ ហើយពូជអំបូរទាំងនោះបាត់បង់ជារៀងរហូត។ ដូចនេះ លោកយ៉ូណាសមានការរវាតចិត្ត ពេលគាត់បានដឹងថា សាសន៍អាសស៊ើរអាចទទួលការអត់ទោសបាប។ ប៉ុន្តែ លោកយ៉ូណាសមានចិត្តស្មោះស្ម័គ្រចំពោះរាស្រ្តរបស់ព្រះ ជាជាងស្មោះស្ម័គ្រចំពោះព្រះ។ ព្រះទ្រង់ស្រឡាញ់ខ្មាំងសត្រូវរបស់សាសន៍អ៊ីស្រាអែល ហើយក៏សព្វព្រះទ័យនឹងជួយសង្គ្រោះពួកគេ។ ព្រះអង្គក៏ស្រឡាញ់មនុស្សដែលធ្វើអាក្រក់មកលើយើង ហើយសព្វព្រះទ័យនឹងជួយសង្គ្រោះពួកគេផងដែរ។ ចូរយើងទៅរកពួកគេ ដើម្បីផ្សាយដំណឹងល្អនៃព្រះយេស៊ូវ ដល់ពួកគេ តាមការបណ្តាលចិត្តពីព្រះវិញ្ញាណបរិសុទ្ធ។—MIKE WITTMER
តើអ្នកដឹងថា មាននរណាខ្លះដែលត្រូវការព្រះយេស៊ូវ? តើធ្វើដូចម្តេចឲ្យអ្នកអាចស្រឡាញ់ពួកគេ កាន់តែខ្លាំង?
ឱព្រះយេស៊ូវ សូមព្រះអង្គបង្ហាញទូលបង្គំ អំពីរបៀបស្រឡាញ់ខ្មាំងសត្រូវទូលបង្គំ ដូចដែលព្រះអង្គស្រឡាញ់ពួកគេ។
For further study, read Evangelism: Reaching Out Through Relationships at DiscoverySeries.org/Q0913.
គម្រោងអានព្រះគម្ពីរយៈពេល១ឆ្នាំ : សុភាសិត ១៦-១៨ និង ២កូរិនថូស ៦