ចិត្តដែលមានការសម្រាកពិតប្រាកដ
ដោយJames Banks
October 3, 2022
ឱព្រះអង្គអើយ ទ្រង់ជាព្រះនៃទូលបង្គំ ទូលបង្គំនឹងស្វែងរកទ្រង់អស់ពីចិត្ត ព្រលឹងទូលបង្គំស្រេករកទ្រង់។ ទំនុកដំកើង ៦៣:១ សត្វឆ្កែមួយក្បាលឈ្មោះបុបប៊ី(Bobby) បានវង្វេងចេញពីម្ចាស់វា ខណៈពេលដែលពួកគេកំពុងធ្វើដំណើរកម្សាន្តជាលក្ខណៈគ្រួសារជាមួយវា ក្នុងតំបន់មួយ ស្ថិតនៅចម្ងាយ ៣ពាន់គីឡ៉ូម៉ែត្រពីផ្ទះរបស់ពួកគេ។ ក្រុមគ្រួសារមួយនេះបានព្យាយាមស្វែងរកសត្វចិញ្ចឹមជាទីស្រឡាញ់របស់ខ្លួន គ្រប់ទីកន្លែង តែត្រូវត្រឡប់ទៅផ្ទះវិញ ដោយគ្មានវាទៅជាមួយ។ ៦ខែក្រោយមក ពេលដែលរដូវរងាជិតដល់ទីបញ្ចប់ រឿងដែលគួរឲ្យភ្ញាក់ផ្អើលបានកើតមានឡើង នៅពេលដែលឆ្កែមួយក្បាលនេះ បានបង្ហាញខ្លួននៅមាត់ទ្វារផ្ទះរបស់ពួកគេ នៅទីក្រុងស៊ីវើតុន រដ្ឋអូរីហ្គិន។ វាបានធ្វើដំណើរដ៏វែងឆ្ងាយ និងគ្រោះថ្នាក់ កាត់តាមទន្លេ វាលខ្សាច់ តំបន់ភ្នំដែលគ្របដណ្តប់ដោយព្រឹលទឹកកក ដោយរកឃើញផ្លូវទៅផ្ទះ ទៅរកមនុស្សជាទីស្រឡាញ់របស់វា។ ការធ្វើដំណើរដ៏អស្ចារ្យរបស់សត្វឆ្កែបុបប៊ី បានបណ្តាលចិត្តមនុស្សជាច្រើន ឲ្យនិពន្ធសៀវភៅរឿង និងផលិតខ្សែភាពយន្ត ហើយគេថែមទាំងគូររូបវានៅលើជញ្ជាំង ក្នុងទីក្រុងរបស់វាផងដែរ។ ការប្តូរផ្តាច់របស់វា បាននាំឲ្យយើងមានចិត្តស្ញប់ស្ញែងណាស់។ តែព្រះទ្រង់បានដាក់ការស្រេកឃ្លានដែលជ្រាលជ្រៅជាងនេះទៀត ក្នុងចិត្តយើង។ លោកអូហ្គូស្ទីន ដែលជាទេវវិទូនៅសម័យបុរាណ បានពិពណ៌នាយ៉ាងដូចនេះថា "ព្រះអង្គបានបង្កើតយើងខ្ញុំមក សម្រាប់ព្រះអង្គទ្រង់ ហើយចិត្តយើងខ្ញុំមិនអាចសម្រាកឡើយ ទាល់តែយើងខ្ញុំបានសម្រាកក្នុងព្រះអង្គ"។ ស្តេចដាវីឌក៏បានបង្ហាញចេញនូវចិត្តដែលស្រេកឃ្លាននេះ ខណៈពេលដែលទ្រង់កំពុងលាក់ខ្លួន ពីមនុស្សដែលតាមសម្លាប់ទ្រង់ ក្នុងវាលរហោស្ថាន នៃស្រុកយូដា ដោយទ្រង់អធិស្ឋានថា "ឱព្រះអង្គអើយ ទ្រង់ជាព្រះនៃទូលបង្គំ ទូលបង្គំនឹងស្វែងរកទ្រង់អស់ពីចិត្ត ព្រលឹងទូលបង្គំស្រេករកទ្រង់ រូបសាច់ទូលបង្គំរឭកចង់បានទ្រង់ នៅក្នុងស្រុករីងស្ងួត ហើយហួតហែង ដែលគ្មានទឹកសោះ" (ទំនុកដំកើង ៦៣:១)។ ស្តេចដាវីឌបានសរសើរដំកើងព្រះ ព្រោះសេចក្តីស្រឡាញ់របស់ព្រះអង្គ វិសេសជាងជីវិត(ខ.៣)។ គ្មានអ្វីអាចប្រៀបផ្ទឹមនឹងការស្គាល់ព្រះអង្គបានឡើយ! តាមរយៈព្រះយេស៊ូវ ព្រះទ្រង់បានស្វែងរកយើង ហើយរៀបចំផ្លូវឲ្យយើងវិលត្រឡប់មករកសេចក្តីស្រឡាញ់ដ៏ឥតខ្ចោះរបស់ព្រះអង្គ ទោះយើងបានចេញឆ្ងាយពីព្រះអង្គយ៉ាងណាក៏ដោយ។ ពេលណាយើងវិលត្រឡប់មករកព្រះអង្គវិញ ចិត្តយើងនឹងមានការសម្រាក និងក្តីអំណរពិតប្រាកដ។—JAMES BANKS
តើអ្នកទន្ទឹងរង់ចាំអ្វីជាងគេ នៅថ្ងៃដែលអ្នកនឹងបានជួបព្រះយេស៊ូវ ? តើអ្នកនឹងស្វែងរកព្រះអង្គ នៅថ្ងៃនេះ ដោយរបៀបណា?
ឱព្រះនៃសេចក្តីស្រឡាញ់ ទូលបង្គំសូមអរព្រះគុណព្រះអង្គ សម្រាប់ការរៀបចំផ្លូវ ឲ្យទូលបង្គំត្រឡប់មករកព្រះអង្គវិញ តាមរយៈព្រះជន្ម ការសុគតនៅលើឈើឆ្កាង និងការមានព្រះជន្មរស់ឡើងវិញរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : អេសាយ ២០-២២ និង អេភេសូរ ៦