តែឯព្រះ ទ្រង់សំដែងសេចក្តីស្រឡាញ់របស់ទ្រង់ ដល់យើងរាល់គ្នាឲ្យឃើញច្បាស់ ដោយព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង។ រ៉ូម ៥:៨
ទីបំផុតគ្រួសារមួយបានទទួលចិញ្ចឹមលីនលីន(Lyn-Lyn) ជាក្មេងអាយុ១០ឆ្នាំ តែនាងនៅមានការភ័យខ្លាច។ នៅក្នុងមណ្ឌលកុមារកំព្រាដែលនាងបានរស់នៅអស់ជាច្រើនឆ្នាំ គេបានដាក់ទោសនាង សូម្បីតែនៅពេលនាងមានកំហុសតូចបំផុត។ លីនលីនក៏បានសួរម្តាយចិញ្ចឹមរបស់នាង ដែលជាមិត្តភក្តិរបស់ខ្ញុំថា “ម៉ាក់ តើម៉ាក់ស្រឡាញ់កូនទេ?” ពេលមិត្តភក្តិខ្ញុំឆ្លើយថា គាត់ស្រឡាញ់នាង នាងក៏បានសួរគាត់ទៀតថា “ពេលណាកូនធ្វើខុស តើម៉ាក់នៅតែស្រឡាញ់កូនទេ?”
ពេលដែលគ្រីស្ទបរិស័ទខ្លះមានអារម្មណ៍ថា ខ្លួនបានធ្វើខុសចំពោះព្រះ ពួកគេក៏បានសួរផងដែរថា “តើព្រះអង្គនៅតែស្រឡាញ់ទូលបង្គំទេ?” យើងដឹងហើយថា ដរាបណាយើងនៅរស់នៅ ក្នុងពិភពលោកនេះ យើងនឹងនៅតែធ្វើខុស និងប្រព្រឹត្តអំពើបាបនៅពេលខ្លះ។ ហើយយើងក៏ឆ្ងល់ថា តើកំហុសរបស់ខ្ញុំមានផលប៉ះពាល់មកលើសេចក្តីស្រឡាញ់ ដែលព្រះទ្រង់មានចំពោះខ្ញុំឬទេ?
បទគម្ពីរយ៉ូហាន ៣:១៦ បានផ្តល់ឲ្យនូវធានាអំពីសេចក្តីស្រឡាញ់របស់ព្រះ។ ព្រះអង្គបានប្រទានព្រះរាជបុត្រា ព្រះនាមយេស៊ូវ ឲ្យមកសុគតជំនួសយើង ដើម្បីកាលណាយើងទទួលជឿព្រះអង្គ យើងនឹងមានជីវិតអស់កល្បជានិច្ច។ ប៉ុន្តែ ចុះបើសិនជាយើងបានធ្វើខុសចំពោះព្រះអង្គ បន្ទាប់ពីយើងបានទទួលជឿព្រះអង្គហើយ? ពេលនោះ យើងត្រូវចាំថា “ព្រះគ្រីស្ទបានសុគតជំនួសយើងរាល់គ្នា” ក្នុងកាលដែលយើងនៅមានបាបនៅឡើយ(រ៉ូម ៥:៨)។ បើព្រះអង្គអាចស្រឡាញ់យើង ពេលយើងស្ថិតក្នុងសណ្ឋានដែលអាក្រក់បំផុត តើហេតុអ្វីយើងនៅតែមានការសង្ស័យមកលើសេចក្តីស្រឡាញ់របស់ព្រះអង្គ ក្នុងនាមយើងជាកូនព្រះអង្គ?
ពេលណាយើងធ្វើអំពើបាប ព្រះវរបិតានៃយើងកែតម្រង់ និងលត់ដំយើង ដោយសេចក្តីស្រឡាញ់។ នោះមិនមែនជាការបដិសេធន៍យើងនោះទេ(៨:១) តែជាសេចក្តីស្រឡាញ់(១២:៦)។ ចូរយើងរស់នៅជាកូនជាទីស្រឡាញ់របស់ព្រះ ដោយសម្រាកក្នុងការធានាដ៏មានពរថា សេចក្តីស្រឡាញ់ដែលព្រះអង្គមានចំពោះយើង គឺស្ថិតស្ថេរ និងមិនចេះប្រែប្រួលឡើយ។—KAREN HUANG
តើការយល់អំពីសេចក្តីស្រឡាញ់ដែលព្រះទ្រង់មានចំពោះអ្នក បានជួយឲ្យអ្នកកាន់តែស្តាប់បង្គាប់ព្រះអង្គយ៉ាងណាខ្លះ? តើការនេះមានឥទ្ធិពលយ៉ាងណាមកលើទស្សនៈដែលអ្នកមាន ចំពោះអំពើបាប?
ឱព្រះវរបិតាដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ សម្រាប់សេចក្តីស្រឡាញ់ដ៏ស្ថិតស្ថេរ ដែលមិនចេះប្រែប្រួល។
គម្រោងអានព្រះគម្ពីររយៈពេល១ឆ្នាំ : អេសាយ ៤១-៤២ និង ១ថែស្សាឡូនិច ១
