ធ្វើជាព្រះហស្ត និងព្រះបាទរបស់ព្រះ
ដោយTim Gustafson
October 13, 2022
ទ្រង់សំរេចសេចក្តីសុចរិត ដល់ពួកកំព្រា និងពួកមេម៉ាយ ក៏ស្រឡាញ់អ្នកប្រទេសក្រៅ ទាំងប្រទានឲ្យមានអាហារ និងសំលៀកបំពាក់ផង។ ចោទិយកថា ១០:១៨ អស់រយៈពេលជាង១ឆ្នាំហើយ ដែលគេបានដាក់ឈ្មោះជាផ្លូវការ ឲ្យទារកម្នាក់ថា “បេប៊ី ប៊យ”( Baby Boy)។ អ្នកយាមម្នាក់បានឮសម្លេងក្មេងតូចយំ គាត់ក៏បានរកឃើញបេប៊ី ប៊យ ដែលគេបោះបង់ចោល បន្ទាប់ពីបានចាប់កំណើតបានប៉ុន្មានម៉ោង ដោយគេដាក់គាត់នៅក្នុងកាបូប ទុកចោលក្នុងចំណតរថយន្តរបស់មន្ទីរពេទ្យ។ បន្ទាប់ពីគេបានប្រទះឃើញគាត់ មិនយូរប៉ុន្មាន អង្គការសេវាកម្មសង្គមក៏បានស្វែងរកមនុស្សដែលចង់យកគាត់ទៅចិញ្ចឹមជារៀងរហូត។ ប្តីប្រពន្ធមួយគូរបានទទួលចិញ្ចឹមគាត់ ហើយដាក់ឈ្មោះឲ្យគាត់ថា ក្រេយសិន(Grayson មិនមែនជាឈ្មោះពិត)។ ទីបំផុត ការដាក់ពាក្យទទួលចិញ្ចឹមគាត់ក៏បានចប់សព្វគ្រប់ ហើយឈ្មោះក្រេយសិន ក៏បានក្លាយជាឈ្មោះផ្លូវការរបស់គាត់។ សព្វថ្ងៃនេះ អ្នកអាចជួបក្មេងតូចដ៏រីករាយម្នាក់នេះ ដែលចូលចិត្តទំនាក់ទំនងជាមួយអ្នកដទៃ។ អ្នកនឹងមិននឹកស្មានថា គាត់ជាក្មេងដែលគេបានបោះបង់ចោលក្នុងកាបូបនោះទេ។ លោកម៉ូសេបានរៀបរាប់អំពីលក្ខណៈសម្បត្តិរបស់ព្រះ និងការអ្វីដែលព្រះទ្រង់បានធ្វើសម្រាប់រាស្រ្តអ៊ីស្រាអែល។ គាត់ប្រាប់ពួកគេថា “ព្រះយេហូវ៉ាទ្រង់បានសព្វព្រះហឫទ័យនឹងស្រឡាញ់ដល់ពួកឰយុកោឯង ហើយទ្រង់បានរើសពូជគេតរៀងមក គឺឯងរាល់គ្នា ដែលទ្រង់រាប់អានលើសជាងអស់ទាំងសាសន៍”(ចោទិយកថា ១០:១៥)។ សេចក្តីស្រឡាញ់របស់ព្រះអង្គមានភាពធំធេងណាស់។ “ទ្រង់សំរេចសេចក្តីសុចរិត ដល់ពួកកំព្រា និងពួកមេម៉ាយ ក៏ស្រឡាញ់អ្នកប្រទេសក្រៅ ទាំងប្រទានឲ្យមានអាហារ និងសំលៀកបំពាក់ផង”(ខ.១៨)។ “ទ្រង់ជាទំនុកសរសើរ ហើយជាព្រះនៃឯង”(ខ.២១)។ ព្រះទ្រង់បានត្រាស់ហៅយើង ឲ្យបង្ហាញចេញនូវសេចក្តីស្រឡាញ់របស់ព្រះអង្គ ទោះជាតាមរយៈការទទួលចិញ្ចឹមក្មេង ឬតាមរយៈការជួយយកអាសា និងបម្រើក្តី។ ប្តីប្រពន្ធដែលមានក្តីស្រឡាញ់នោះ បានក្លាយជាព្រះបាទនិងព្រះហស្ត ដែលព្រះទ្រង់ប្រើ ដើម្បីបង្ហាញសេចក្តីស្រឡាញ់របស់ព្រះអង្គដល់ទារកតូច ដែលគេបានបោះបង់ចោល។ យើងក៏អាចធ្វើជាព្រះហស្តនិងព្រះបាទ សម្រាប់ឲ្យព្រះអង្គប្រើផងដែរ។—TIM GUSTAFSON
តើព្រះទ្រង់បានបង្ហាញសេចក្តីស្រឡាញ់របស់ព្រះអង្គ ដល់អ្នក តាមរបៀបដ៏តូចនិងធំ យ៉ាងដូចម្តេចខ្លះ? តើមានការដ៏តូចអ្វី ដែលអ្នកអាចធ្វើនៅថ្ងៃនេះ ដើម្បីបង្ហាញសេចក្តីស្រឡាញ់នោះ?
ឱព្រះវរបិតា ដែលគង់នៅស្ថានសួគ៌ ព្រះអង្គមានសេចក្តីមេត្តាដល់ក្មេងកំព្រា។ សូមព្រះអង្គប្រើទូលបង្គំជាព្រះហស្ត និងព្រះបាទព្រះអង្គនៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ : អេសាយ ៤៣-៤៤ និង ១ថែស្សាឡូនិច ២