ទុកចិត្តថា ព្រះទ្រង់ទតឃើញផ្លូវនៅខាងមុខ
ដោយPatricia Raybon
October 24, 2022
រួចវិលទៅស្រុកគេវិញ តាមផ្លូវមួយទៀតទៅ ដោយព្រោះព្រះទ្រង់ពន្យល់សប្តិប្រាប់ មិនឲ្យត្រឡប់ទៅឯហេរ៉ូឌវិញឡើយ។ ម៉ាថាយ ២:១២ ខណៈពេលដែលស្វាមីខ្ញុំកំពុងបើកឡាន ជូនយើងទៅកាន់តំបន់ ដែលយើងមិនស្គាល់ គាត់ក៏បានកត់សំគាល់ឃើញថា ប្រព័ន្ធGPS ហាក់ដូចជាបង្ហាញទិសដៅខុស។ បន្ទាប់ពីយើងបានចូលទៅក្នុងផ្លូវធំដែលមានគន្លងផ្លូវ៤ចំណែក ប្រព័ន្ធGPS ក៏បានឲ្យយោបល់យើងថា យើងគួរតែចេញពីផ្លូវធំនោះ បត់ចូលផ្លូវតូចដែលស្របផ្លូវធំនោះ។ គាត់ក៏បានទុកចិត្តការណែនាំនោះ ទោះមិនឃើញមានការពន្យារពេលក៏ដោយ។ ទោះជាយ៉ាងណាក៏ដោយ ពេលយើងធ្វើដំណើរទៅមុខទៀត តាមផ្លូវតូចនោះ បានប្រហែល១៦គីឡូម៉ែត្រ យើងបានឃើញផ្លូវធំដែលមានទិសដៅស្របយើង កំពុងមានដំណើរយឺត ស្ទើរតែស្ទះមិនអាចទៅមុខរួច។ តើផ្លូវនោះកំពុងមានបញ្ហាអ្វី? តាមពិតផ្លូវធំនោះកំពុងមានការសាងសង់ធំមួយ នៅខាងមុខ។ ចុះចំណែកឯផ្លូវតូចវិញ? វាមិនសូវមានឡានធ្វើចរាចរណ៍ ដូចនេះ យើងអាចធ្វើដំណើរទៅរកគោលដៅយើង យ៉ាងរលូន។ ស្វាមីខ្ញុំក៏បាននិយាយថា គាត់មិនអាចមើលឃើញផ្លូវនៅខាងមុខទេ តែប្រព័ន្ធGPS អាចមើលដឹង។ យើងក៏បានយល់ឃើញដូចគ្នាថា “ព្រះទ្រង់ជ្រាបអំពីផ្លូវនៅខាងមុខ ដែលយើងកំពុងតែធ្វើដំណើរទៅ”។ រឿងនេះបានធ្វើឲ្យខ្ញុំនឹកចាំ អំពីពេលដែលព្រះទ្រង់បើកសម្ដែងឲ្យពួកហោរាដឹងក្នុងសុបិន អំពីទិសដៅដែលពួកគេត្រូវផ្លាស់ប្តូរ ខណៈពេលដែលពួកគេកំពុងធ្វើដំណើរពីទិសខាងកើត មកថ្វាយបង្គំព្រះយេស៊ូវ ដែលបានយាងមកប្រសូតជាស្តេចនៃសាសន៍យូដា (ម៉ាថាយ ២:២)។ ស្តេចហេរ៉ូឌមានការថប់បារម្ភ ដោយសារដំណឹងអំពីការប្រសូតរបស់ទ្រង់ ក៏បានកុហកពួកហោរា ដោយចាត់ពួកគេទៅភូមិបេថ្លេហិម ដោយបន្ទូលថា “ចូរអ្នករាល់គ្នាទៅស៊ើបដំណឹង ពីកូនតូចនោះឲ្យច្បាស់លាស់ កាលណាបានឃើញហើយ នោះត្រូវមកប្រាប់ដល់យើងវិញ ដើម្បីឲ្យយើងបានទៅថ្វាយបង្គំដែរ”(ខ.៨)។ ទោះជាយ៉ាងណាក៏ដោយ ពួកគេក៏បាន “វិលទៅស្រុកគេវិញ តាមផ្លូវមួយទៀតទៅ ដោយព្រោះព្រះទ្រង់ពន្យល់សប្តិប្រាប់ មិនឲ្យត្រឡប់ទៅឯហេរ៉ូឌវិញឡើយ”(ខ.១២)។ ព្រះទ្រង់នឹងនាំផ្លូវយើង គ្រប់ជំហានផងដែរ។ ខណៈពេលដែលយើងកំពុងធ្វើដំណើរ យើងអាចទុកចិត្តថា ព្រះអង្គទតឃើញអ្វីដែលមានខាងនៅមុខយើង ហើយអាចបន្តទុកចិត្តថា ព្រះអង្គនឹងតម្រង់ផ្លូវយើង ពេលណាយើងចុះចូលនឹង ការដឹកនាំរបស់ព្រះអង្គ(សុភាសិត ៣:៦)។—PATRICIA RAYBON
តើអ្នកចាំថា ព្រះទ្រង់បានប្រទាននូវការផ្លាស់ប្តូរទិសដៅក្នុងជីវិតអ្នក នៅពេលណា? ពេលណាអ្នកទុកចិត្តព្រះអង្គ តើអ្នកទទួលលទ្ធផលដូចម្តេច?
ឱព្រះអម្ចាស់ ទូលបង្គំមិនអាចមើលឃើញផ្លូវនៅខាងមុខ តែព្រះអង្គអាច។ សូមព្រះអង្គបើកសម្ដែងឲ្យទូលបង្គំបានដឹង ពេលណាព្រះអង្គសព្វព្រះទ័យនឹងផ្លាស់ប្តូរទិសដៅរបស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : យេរេមា ៦-៨ និង ១ធីម៉ូថេ ៥