ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌។ ម៉ាថាយ ៥:១៦
កាលពីខែមីនា ឆ្នាំ២០២០ ខណៈពេលដែលលោកវីតនី(Whitney) ជាអ្នកជំនាញផ្នែកហិរញ្ញវត្ថុ ដែលបានចូលនិវត្ត កំពុងបណ្តើរឆ្កែ ក្នុងសួនច្បារកណ្តាល នៃទីក្រុងញូយ៉ក គាត់ក៏បានឃើញឡានធំ តង់ពណ៌សជាច្រើន ដែលសុទ្ធតែមានរូបឈើឆ្កាងនៅពីលើ និងឈ្មោះអង្គការមនុស្សធម៌ ដែលគាត់មិនដែលស្គាល់។ ពេលគាត់បានដឹងថា មនុស្សមួយក្រុមនោះកំពុងតែសង់មន្ទីរពេទ្យចល័ត សម្រាប់អ្នកក្រុងញូយ៉ក ដែលមានជំងឺកូវីត១៩ គាត់ក៏សួរពួកគេថា តើគាត់អាចជួយពួកគេបានទេ។ ប៉ុន្មានសប្តាហ៍ក្រោយមក ទោះគាត់មានជំនឿ និងនិន្នាការនយោបាយខុសពីពួកគេក៏ដោយ ក៏គាត់ និងក្រុមគ្រួសារគាត់បានចូលរួមជាមួយពួកគេ តាមដែលអាចធ្វើទៅបាន។ លោកវីតនីក៏បានលើកឡើងថា “មនុស្សម្នាក់ៗដែលខ្ញុំបានជួប នៅក្នុងក្រុមនោះ សុទ្ធតែជាមនុស្សល្អ ឥតពុតមាយា”។ ហើយគាត់ក៏បានកោតសរសើរពួកគេ ដែលបានស្ម័គ្រចិត្តជួយអ្នកក្រុងគាត់ ដោយគ្មានប្រាក់កំរៃ ក្នុងពេលដែលទីក្រុងគាត់កំពុងតែត្រូវការជំនួយខ្លាំងយ៉ាងនេះ។
ក្នុងការឆ្លើយតប ចំពោះតម្រូវការដ៏លើសលប់ ក្នុងពេលដែលវីរូសកូរ៉ូណាកំពុងរាតត្បាតពិភពលោក អ្នកស្ម័គ្រចិត្តដែលមានជំនឿសាសនាផ្សេងគ្នាបានរួបរួមគ្នាបម្រើប្រជាជន ជាឱកាសដែលអ្នកជឿព្រះយេស៊ូវអាចបញ្ចេញពន្លឺនៃព្រះគ្រីស្ទ ឲ្យអ្នកដទៃបានឃើញ។ ក្នុងសេចក្តីអធិប្បាយរបស់ព្រះយេស៊ូវនៅលើភ្នំ ព្រះអង្គបានបង្រៀនអ្នកដើរតាមព្រះអង្គថា “ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌”(ម៉ាថាយ ៥:១៦)។ យើងបញ្ចេញពន្លឺរបស់ព្រះគ្រីស្ទ ដោយអនុញ្ញាតឲ្យព្រះវិញ្ញាណព្រះអង្គដឹកនាំយើង និយាយស្តី និងប្រព្រឹត្ត ដោយក្តីស្រឡាញ់ និងចិត្តសប្បុរស(មើលកាឡាទី ៥:២២-២៣)។ ពេលណាយើងអនុញ្ញាតឲ្យពន្លឺរបស់ព្រះយេស៊ូវ បញ្ចេញពន្លឺច្បាស់ ក្នុងជីវិតយើង នោះយើងក៏ “ថ្វាយសិរីល្អដល់ព្រះវរបិតា ដែលនៅគង់នៅស្ថានសួគ៌”ផងដែរ(ម៉ាថាយ ៥:១៦)។
សព្វថ្ងៃនេះ យើងនៅតែអាចបញ្ចេញពន្លឺព្រះគ្រីស្ទ ជារៀងរាល់ថ្ងៃ ខណៈពេលដែលព្រះអង្គជួយយើង ឲ្យធ្វើជាពន្លឺ និងអំបិល ក្នុងលោកិយដែលកំពុងត្រូវការព្រះអង្គ។—ALYSON KIEDA
តើអ្នកបានមើលឃើញឱកាសផ្សាយ អំពីសេចក្តីសង្ឃឹម និងពន្លឺដល់អ្នកដទៃ នៅថ្ងៃនេះ នៅកន្លែងណាខ្លះ? តើមាននរណាខ្លះបានធ្វើជាពន្លឺដល់ជីវិតអ្នក ក្នុងពេលដែលអ្នកមានទុក្ខលំបាក?
ឱព្រះយេស៊ូវ សូមព្រះអង្គជួយទូលបង្គំឲ្យបញ្ចេញពន្លឺព្រះអង្គ ក្នុងគ្រប់ការទាំងអស់ដែលទូលបង្គំនិយាយ និងធ្វើ។
គម្រោងអានព្រះគម្ពីររយៈពេល១ឆ្នាំ : យេរេមា ២២-២៣ និង ទីតុស ១
