សេចក្តីបន្ទាល់នៃព្រះយេហូវ៉ាជាពិត ក៏ធ្វើឲ្យមនុស្សខ្លៅល្ងង់មានប្រាជ្ញា។ ទំនុកដំកើង ១៩:៧
ផ្ទះកសិដ្ឋានចាស់របស់អ៊ំប្រុសខ្ញុំ មានកងដែកមួយធ្វើពីដែកស្មិត នៅជាប់នឹងស៊ុមទ្វារ។ កងនោះចាស់មានច្រេះស៊ី តែវានៅតែធន់នឹងអាកាសធាតុដ៏អាក្រក់ ក្នុងរដូវរងានៅរដ្ឋមីនេសូតា។ នៅចម្ងាយប្រហែល៣០ម៉ែត្រពីកន្លែងនោះ មានកងដែកមួយទៀត នៅជាប់ក្រោលគោយ៉ាងមាំ។ ពេលណាមានព្យុះព្រឹលដែលធ្វើឲ្យអ៊ំប្រុសខ្ញុំមើលផ្លូវមិនឃើញ គាត់ក៏បានយកខ្សែមកចងភ្ជាប់ពីកងដែកមួយ ទៅកងដែកមួយទៀត ដើម្បីឲ្យគាត់អាចដើរពីក្រោលគោ ទៅផ្ទះគាត់។ កាលណាគាត់កាន់ខ្សែនោះជាប់ គាត់អាចជៀសវាងការវង្វេងផ្លូវ ពេលមានព្រឹលធ្លាក់ខ្លាំងមើលផ្លូវមិនឃើញ។
ការដែលអ៊ំប្រុសខ្ញុំប្រើខ្សែពួរសុវត្ថិភាព ក្នុងពេលមានព្យុះព្រឹល ធ្វើឲ្យខ្ញុំនឹកចាំ អំពីរបៀបដែលស្តេចដាវីឌបានប្រើចំណងនៃបទកំណាព្យជាភាសាហេព្រើរ ដើម្បីពិពណ៌នា អំពីរបៀបដែលប្រាជ្ញារបស់ព្រះបាននាំផ្លូវយើង ឆ្លងកាត់ជីវិត ហើយការពារយើង ឲ្យរួចផុតពីអំពើបាប និងកំហុស យ៉ាងដូចនេះថា “សេចក្តីកោតខ្លាចដល់ព្រះយេហូវ៉ា នោះជាបរិសុទ្ធ ក៏នៅជាប់ជារៀងរាបដរាប អស់ទាំងខច្បាប់របស់ព្រះយេហូវ៉ាសុទ្ធតែពិតត្រង់ ហើយសុចរិតគ្រប់ជំពូក សេចក្តីទាំងនោះគួរចង់បានលើសជាងមាស អើ ជាជាងមាសសុទ្ធជាច្រើនផង ក៏ផ្អែមជាងទឹកឃ្មុំ ហើយជាងដំណក់ស្រក់ពីសំណុះផង មួយទៀត ទូលបង្គំ ជាអ្នកបំរើទ្រង់ ក៏ចេះប្រយ័ត្ន ដោយសារសេចក្តីទាំងនោះដែរ ហើយដែលកាន់តាម នោះក៏មានរង្វាន់យ៉ាងធំ”(ទំនុកដំកើង ១៩:៩-១១)។
ការប្រកាន់ខ្ជាប់តាមសេចក្តីពិតនៃព្រះគម្ពីរ ដែលព្រះវិញ្ញាណបានជួយឲ្យយើងយល់ ជួយការពារយើងឲ្យរួចផុតពីការវង្វេងផ្លូវ ហើយជួយយើងឲ្យធ្វើការសម្រេចចិត្ត ដែលថ្វាយព្រះកិត្តិនាមដល់ព្រះ និងការគោរពដល់អ្នកដទៃ។ ព្រះគម្ពីរបានដាស់តឿនយើង មិនឲ្យងាកបែរចេញពីព្រះ ហើយបង្ហាញផ្លូវយើង ឲ្យវិលមករកព្រះអង្គវិញ។ ព្រះគម្ពីរក៏បានប្រាប់យើង អំពីសេចក្តីស្រឡាញ់ដែលមិនអាចកាត់ថ្លៃបាន របស់ព្រះអង្គសង្គ្រោះ និងព្រះពរ ដែលរង់ចាំអស់អ្នកដែលជឿព្រះអង្គ។ ព្រះបន្ទូលព្រះគឺជាអាហារទ្រទ្រង់ជីវិតខាងវិញ្ញាណ។ សូមព្រះទ្រង់ជួយយើង ឲ្យតោងជាប់ព្រះបន្ទូលព្រះអង្គជានិច្ច។—JAMES BANKS
តើមានព្រះបន្ទូលសន្យាអ្វីខ្លះ ក្នុងព្រះគម្ពីរ ដែលផ្តល់ឲ្យអ្នកនូវសេចក្តីសង្ឃឹម? តើអ្នកនឹងប្រកាន់ខ្ជាប់តាមសេចក្តីពិត នៃព្រះគម្ពីរនៅថ្ងៃនេះ យ៉ាងដូចម្តេចខ្លះ?
ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំ ឲ្យទទួលការបង្រៀនព្រះបន្ទូលព្រះអង្គជាកំណប់ទ្រព្យ នៅថ្ងៃនេះ។ ទូលបង្គំសូមអរព្រះគុណព្រះអង្គសម្រាប់ការប្រទានព្រះពរជាបរិបូរ និងជ្រាលជ្រៅ តាមរយៈព្រះបន្ទូលព្រះអង្គ ក្នុងព្រះគម្ពីរប៊ីប!
To learn more about New Testament Basics, visit ODBU.org/NT109.
គម្រោងអានព្រះគម្ពីររយៈពេល១ឆ្នាំ : យេរេមា ២៧-២៩ និង ទីតុស ៣
