សូមឲ្យលោកបានពរពីព្រះយេហូវ៉ាចុះ … លោកនោះជាសាច់ញាតិជិតដិតនឹងយើងហើយ។ នាងរស់ ២:២០
អូលីវ(Olive) បានមើលមិត្តភក្តិរបស់នាងលើកឧបករណ៍ពេទ្យធ្មេញរបស់នាង ចូលទៅក្នុងឡានគាត់។ មិត្តភក្តិនាងក៏ជាពេទ្យធ្មេញផងដែរ។ គាត់បានទិញឧបករណ៍ពេទ្យធ្មេញថ្មីៗពីនាង។ អូលីវមានក្តីស្រមៃចង់ធ្វើការជាពេទ្យធ្មេញ ជាច្រើនឆ្នាំមកហើយ តែពេលដែលកូនប្រុសរបស់នាង ឈ្មោះខាល(Kyle) បានចាប់កំណើតមកដោយមានជំងឺពិការខួរក្បាល នាងក៏បានដឹងថា នាងត្រូវតែឈប់ធ្វើការ ដើម្បីចំណាយពេលថែរក្សាកូនប្រុសនាង។
មិត្តភក្តិរបស់ខ្ញុំម្នាក់នេះក៏បានប្រាប់ខ្ញុំថា បើនាងមានជីវិតរស់នៅដូចនេះមួយលានដងទៀត ក៏នាងនៅតែធ្វើការសម្រេចចិត្តបោះបង់ការងារ ដើម្បីថែរក្សាកូនប្រុសនាង។ តែការបោះបង់ការងារជាពេទ្យធ្មេញមានការពិបាក ព្រោះក្តីស្រមៃរបស់នាងបានរលាយអស់។
ជាញឹកញាប់ យើងបានឆ្លងកាត់ទុក្ខលំបាក ដែលយើងមិនអាចយល់បាន។ សម្រាប់អូលីវ នាងមានការឈឺចាប់ក្នុងចិត្ត ដោយសារកូនរបស់នាងមានជំងឺដែលមិននឹកស្មានដល់ ហើយក៏ត្រូវលះបង់បំណងប្រាថ្នារបស់នាង ដែលចង់ធ្វើការជាពេទ្យធ្មេញ។ សម្រាប់នាងណាអូមីវិញ នាងមានការឈឺចាប់ក្នុងចិត្ត ដោយសារកូនប្រុសរបស់នាងបានស្លាប់អស់។ ក្នុងបទគម្ពីរនាងរស់ ១:២១ នាងបានពោលទំនួញថា “ព្រះដ៏មានគ្រប់ទាំងព្រះចេស្តាបានធ្វើទុកខ្ញុំដូច្នេះ”។
រឿងរបស់នាងណាអូមី នៅមានលើសពីនេះទៀត។ ព្រះទ្រង់មិនបានបោះបង់ចោលនាងឡើយ។ ព្រះអង្គបានប្រទានការស្អាងឡើងវិញដល់នាង ដោយប្រទានឲ្យនាងមានចៅប្រុសមួយ ព្រោះអូបិឌ(នាងរស់ ៤:១៧)។ តាមរយៈខ្សែលោហិតអូបិឌ ព្រះយេស៊ូវក៏បានយាងមកប្រសូត ដើម្បីសង្រ្គោះមនុស្សជាតិ ឲ្យរួចពីបាប(ម៉ាថាយ ១:៥,១៦)។
ព្រះទ្រង់ប្រោសលោះនាងណាអូមីឲ្យរួចពីការឈឺចាប់ នៃការបាត់បង់កូន។ ព្រះអង្គក៏បានដកការឈឺចាប់ចេញពីអូលីវ ដោយជួយនាងបង្កើតការងារផ្នែកកុមារ ដែលមានបញ្ហាប្រព័ន្ធប្រសាទ។ យើងអាចមានរដូវកាលនៃការឈឺចាប់ក្នុងចិត្ត តែយើងអាចទុកចិត្តថា កាលណាយើងស្តាប់បង្គាប់ ហើយដើរតាមព្រះអង្គ នោះព្រះអង្គអាចជួយយើងជម្នះការឈឺចាប់។ ព្រះអង្គអាចឲ្យការល្អកើតចេញពីការឈឺចាប់ ដោយសារសេចក្តីស្រឡាញ់ និងប្រាជ្ញារបស់ព្រះអង្គ។—KAREN HUANG
តើព្រះទ្រង់បានជួយអ្នក ឲ្យឆ្លងកាត់បញ្ហាកាលពីមុន យ៉ាងដូចម្តេចខ្លះ? តើព្រះអង្គកំពុងលើកទឹកចិត្តអ្នកដូចម្តេចខ្លះ ក្នុងពេលដ៏ពិបាក ក្នុងពេលបច្ចុប្បន្ន?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានជួយទូលបង្គំ ឆ្លងកាត់បញ្ហាដ៏ឈឺចាប់ក្នុងជីវិតទូលបង្គំ។
For further study, read Why? Seeing God in Our Pain at DiscoverySeries.org/CB151.
គម្រោងអានព្រះគម្ពីររយៈពេល១ឆ្នាំ : យេរេមា ៣២-៣៣ និង ហេព្រើរ ១
