សូមព្រះយេហូវ៉ាប្រទានរង្វាន់ដល់នាង ហើយឲ្យនាងបានទទួលបំណាច់ដ៏ពោរពេញ ពីព្រះយេហូវ៉ា ជាព្រះនៃសាសន៍អ៊ីស្រាអែល ដែលនាងបានមកជ្រកក្រោមស្លាបទ្រង់ចុះ។ នាងរស់ ២:១២
មានពេលមួយ ម៉ារា(Maria) បានយកអាហារថ្ងៃត្រង់របស់នាង ចូលទៅអង្គុយញាំ នៅតុដែលគ្មានមនុស្សអង្គុយ។ ពេលនាងកំពុងខាំនំប័រហ្គ័ររបស់នាង ភ្នែករបស់នាងបានផ្ដោតទៅលើយុវជនម្នាក់ ដែលកំពុងអង្គុយនៅចម្ងាយបីបួនតុពីនាង។ ខោអាវគាត់ប្រឡាក់ដី សក់គាត់ក៏សំពោងមិនដែលសិត ហើយដៃគាត់ក្តាប់ជាប់ពែងក្រដាស់ដែលទទេ។ ច្បាស់ណាស់ គាត់កំពុងតែឃ្លានអាហារហើយ។ តើនាងអាចជួយគាត់ដោយរបៀបណា? ការយកលុយទៅឲ្យគាត់ មិនមែនជាទង្វើដ៏ឆ្លាតវ័យទេ។ បើនាងទិញអាហារមួយពេល យកទៅឲ្យគាត់ តើគាត់នឹងខ្មាសអៀនទេ?
ពេលនោះ ម៉ារាក៏បាននឹកចាំអំពីរឿងនាងរស់ ដែលក្នុងនោះ លោកបូអូស ជាម្ចាស់ដីដ៏ស្តុកស្តម្ភ បានអញ្ជើញស្ត្រីមេម៉ាយទាល់ក្រម្នាក់ ឲ្យដើររើសគួរស្រូវក្នុងវាលស្រែគាត់។ គាត់បានបង្គាប់ពួកបាវប្រុសៗថា “ចូរបើកឲ្យនាងរើសយកក្នុងគំនរកណ្តាប់ស្រូវផងចុះ កុំឲ្យបន្ទោសនាងឡើយ ហើយហូតគួរខ្លះពីកណ្តាប់ចេញ ទុកឲ្យនាងរើស កុំឲ្យស្តីថាដល់នាងឡើយ”(នាងរស់ ២:១៥-១៦)។ ត្រង់ចំណុចនេះ លោកបូអូសបានបង្ហាញចេញនូវការផ្គត់ផ្គង់របស់ព្រះ ក្នុងវប្បធម៌ដែលមនុស្សស្រីពឹងផ្អែកទាំងស្រុងទៅលើទំនាក់ទំនងជាមួយមនុស្សប្រុស ដើម្បីឲ្យអាចមានជីវិតរស់។ ទីបំផុត លោកបូអូសក៏បានរៀបការជាមួយនាងរស់ ដោយលោះនាងឲ្យរួចផុតពីភាពទុរគត(៤:៩-១០)។
ងាកមករឿងរបស់ម៉ារាវិញ។ ពេលដែលម៉ារាដល់ពេលចាកចេញ នាងក៏បានទុកកញ្ចប់ដំឡូងបារាំងបំពង ដែលនាងមិនទាន់បានញាំ នៅលើតុនៅក្បែរនោះ ឲ្យបុរសនោះបានឃើញ។ បើគាត់ពិតជាឃ្លានមែន គាត់អាចមកយកអាហារដែលនាងទុកចោលនោះញាំ។ ព្រះទ័យរបស់ព្រះបានបង្ហាញចេញ នៅក្នុងរឿងក្នុងព្រះគម្ពីរ ដោលផ្តល់ឲ្យនូវដំណោះស្រាយដ៏ប៉ិនប្រសប់ ដែលលើកទឹកចិត្តយើងឲ្យយកមកអនុវត្ត។—ELISA MORGAN
តើមាននរណាខ្លះនៅក្បែរអ្នក នៅថ្ងៃនេះ ដែលអ្នកអាចជួយបំពេញតម្រូវការរបស់ពួកគេបាន? ចូរទូលសូមព្រះអង្គបង្ហាញអ្នក ឲ្យឃើញតម្រូវការរបស់មនុស្សនៅជុំវិញអ្នក ដែលអ្នកអាចឆ្លើយតប ដោយមានចិត្តដូចព្រះអង្គ។
ឱព្រះវរបិតា សូមព្រះអង្គបង្ហាញទូលបង្គំ ឲ្យឃើញអ្នកដែលត្រូវការទូលបង្គំ ឲ្យបង្ហាញចេញសេចក្តីស្រឡាញ់របស់ព្រះអង្គ ដល់ពួកគេ នៅថ្ងៃនេះ។
For further study, read Living Justly, Loving Mercy: A Biblical Response to Our Broken World at DiscoverySeries.org/Q0750.
គម្រោងអានព្រះគម្ពីររយៈពេល១ឆ្នាំពេញ : ដានីយ៉ែល ៨-១០ និង ៣យ៉ូហាន
