ដ្បិតខ្ញុំនឹងចាំពីសេចក្តីជំនឿស្មោះត្រង់ ដែលនៅក្នុងអ្នក សេចក្តីជំនឿនោះបាននៅក្នុងយាយឡូអ៊ីស ជាជីដូនរបស់អ្នកជាមុនដំបូង រួចក៏នៅក្នុងអ្នកអ៊ើនីស ជាម្តាយអ្នកដែរ ហើយខ្ញុំជឿជាក់ថា ក៏នៅក្នុងអ្នកផង។ ២ធីម៉ូថេ ១:៥
កាលពីឆ្នាំ ២០១៩ មានការស្រាវជ្រាវមួយ អំពីកេរដំណែលខាងវិញ្ញាណរបស់អ្នកជឿព្រះយេស៊ូវ នៅរសហរដ្ឋអាមេរិក បានរកឃើញថា ស្ត្រីជាម្តាយ និងជីដូន មានឥទ្ធិពលដ៏សំខាន់ មកលើការលូតលាស់ខាងវិញ្ញាណរបស់គ្រីស្ទបរិស័ទនៅអាមេរិក។ ២ភាគ៣ នៃគ្រីស្ទបរិស័ទនៅអាមេរិកបានអះអាងថា ខ្លួនបានទទួលកេរដំណែលនៃសេចក្តីជំនឿ ពីម្តាយរបស់ខ្លួន ហើយ១ភាគ៣ នៃគ្រីស្ទបរិស័ទនៅអាមេរិក បានទទួលស្គាល់ថា ជីដូនជីតា(តាមធម្មតា ជីដូន) របស់ពួកគេ ក៏មានតួនាទីដ៏សំខាន់ ក្នុងការលូតលាស់របស់ពួកគេផងដែរ។
អ្នកដឹកនាំការស្រាវជ្រាវនេះ បានកត់សំគាល់ថា “ការសិក្សានេះបានរកឃើញម្តងហើយម្តងទៀតថា ស្ត្រីជាម្តាយមានឥទ្ធិពលដ៏យូរអង្វែង មកលើការលូតលាស់ខាងវិញ្ញាណនៃមនុស្សជំនាន់ក្រោយ”។ ព្រះគម្ពីរក៏បានចែងអំពីឥទ្ធិពលនោះផងដែរ។
ក្នុងសំបុត្រដែលសាវ័កប៉ុលបានសរសេរផ្ញើលោកធីម៉ូថេ ដែលជាសិស្សរបស់គាត់ គាត់បានទទួលស្គាល់ថា ជំនឿរបស់លោកធីម៉ូថេបានទទួលឥទ្ធិពលពីម្តាយគាត់ឈ្មោះ អ៊ើនីស និងជីដូនគាត់ឈ្មោះ ឡូអ៊ីស(២ធីម៉ូថេ ១:៥)។ នេះជាការពិពណ៌នាជាលម្អិតដ៏មានអំណរ ដោយសង្កត់ធ្ងន់អំពីឥទ្ធិពល ដែលស្ត្រីពីរនាក់មានមកលើអ្នកដឹកនាំវ័យក្មេងនេះ នៅសម័យពួកជំនុំដំបូង។ ឥទ្ធិពលរបស់ពួកគេក៏អាចឃើញមាន ក្នុងការលើកទឹកចិត្តដែលសាវ័កប៉ុលមាន សម្រាប់លោកធីម៉ូថេ យ៉ាងដូចនេះថា “ចូរឲ្យអ្នកនៅជាប់ក្នុងសេចក្តីដែលអ្នកបានរៀន ហើយជឿប្រាកដវិញ ដោយដឹងថា អ្នកបានរៀនសេចក្តីនោះពីអ្នកណា ហើយថា តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មាន ដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ ដែលបានដោយសារសេចក្តីជំនឿជឿដល់ព្រះគ្រីស្ទយេស៊ូវផង”(៣:១៤-១៥)។
កេរដំណែលខាងវិញ្ញាណដ៏រឹងមាំ ជាអំណោយដ៏មានតម្លៃ។ ប៉ុន្តែ បើយើងខ្វះឥទ្ធិពលវិជ្ជមានដែលបានជួយដល់សេចក្តីជំនឿរបស់លោកធីម៉ូថេ ព្រះទ្រង់អាចប្រទានអ្នកដទៃទៀត ក្នុងជីវិតយើង ដែលអាចមានឥទ្ធិពលដ៏ល្អ ក្នុងការជួយដល់ការលូតលាស់ខាងវិញ្ញាណរបស់យើង។ ដែលសំខាន់បំផុតនោះ យើងមានឱកាសធ្វើជាគំរូ នៃសេចក្តីជំនឿដ៏ស្មោះត្រង់ ដល់មនុស្សនៅជុំវិញខ្លួនយើង ហើយបន្សល់ទុកនូវកេរដំណែលដ៏ស្ថិតស្ថេរ។—LISA M. SAMRA
តើនរណាខ្លះមានឥទ្ធិពលដ៏សំខាន់ មកលើការលូតលាស់ខាងវិញ្ញាណរបស់អ្នក? តើអ្នកអាចលើកទឹកចិត្តអ្នកដទៃដូចម្តេច ឲ្យមានជំនឿកាន់តែរឹងមាំ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់បុរស និងស្ត្រីក្នុងជីវិតទូលបង្គំ ដែលបានធ្វើជាគំនូរនៃសេចក្តីជំនឿដ៏ស្មោះត្រង់។
គម្រោងអានព្រះគម្ពីររយៈពេល១ឆ្នាំ : អេម៉ុស ៤-៦ និង វិវរណៈ ៧
