ឯទូលបង្គំ នឹងពោលពីព្រះយេហូវ៉ាថា ទ្រង់ជាទីពឹងពំនាក់ ជាបន្ទាយនៃទូលបង្គំ គឺជាព្រះនៃទូលបង្គំហើយ ទូលបង្គំទុកចិត្តនឹងទ្រង់។ ទំនុកដំកើង ៩១:២
នៅពេលល្ងាចថ្ងៃមួយ ពេលខ្ញុំកំពុងរត់ត្រឹកៗ ដើម្បីហាត់ប្រាណ នៅក្បែរការដ្ឋានសំណង់មួយ ក្នុងតំបន់ដែលយើងរស់នៅ ខ្ញុំឃើញកូនឆ្មាមួយក្បាល មានរូបរាងស្គម និងប្រឡាក់ដី កំពុងស្រែកយំដាក់ខ្ញុំ ដោយសម្លេងគួរឲ្យអាណិត ហើយក៏បានដើរតាមខ្ញុំ រហូតដល់ផ្ទះខ្ញុំ។ សព្វថ្ងៃនេះ មីគឃី(Mickey) បានប្រែក្លាយជាសត្វឆ្មាពេញវ័យ មានសុខភាពល្អគួរឲ្យស្រឡាញ់ និងកំពុងអរសប្បាយនឹងជីវិតដ៏សុខស្រួល ក្នុងផ្ទះរបស់ខ្ញុំ ហើយក្រុមគ្រួសារខ្ញុំបានស្រឡាញ់វាយ៉ាងខ្លាំង។ ពេលណាខ្ញុំរត់ត្រឹកៗ ដើម្បីហាត់ប្រាណ កាត់តាមកន្លែងដែលខ្ញុំបានរកឃើញវា ខ្ញុំច្រើនតែអរព្រះគុណព្រះ ដែលបានឲ្យសត្វឆ្មាមីគឃីឈប់រស់នៅអនាថា ហើយឲ្យវាមានផ្ទះសម្រាប់រស់នៅ។
បទគម្ពីរទំនុកដំកើង ជំពូក៩១ បានចែងអំពីអ្នកដែល “នៅជាប់ក្នុងទីកំបាំង នៃព្រះដ៏ខ្ពស់បំផុត”(ខ.១) ដោយបាននៅជាមួយព្រះអង្គ។ ក្នុងព្រះគម្ពីរដើមភាសាហេព្រើរ ពាក្យ នៅជាប់ គឺមានន័យថា “នៅជាប់ជាអចិន្ត្រៃយ៍”។ ពេលណាយើងនៅជាប់ក្នុងព្រះអង្គ នោះព្រះអង្គជួយយើងឲ្យរស់នៅ តាមប្រាជ្ញារបស់ព្រះអង្គ ហើយស្រឡាញ់ព្រះអង្គលើសអ្វីៗទាំងអស់(ខ.១៤ យ៉ូហាន ១៥:១០)។ ព្រះទ្រង់បានសន្យាថា នឹងប្រទានការកម្សាន្តចិត្ត តាមរយៈការនៅជាប់ជាមួយព្រះអង្គអស់កល្បជានិច្ច ក៏ដូចជាសន្យាប្រទានសុវត្ថិភាព ក្នុងពេលដែលយើងជួបទុក្ខលំបាកនៅផែនដី។ ទោះបញ្ហាអាចកើតមាន យើងនៅតែអាចសម្រាក ក្នុងអំណាចគ្រប់គ្រង ប្រាជ្ញា និងសេចក្តីស្រឡាញ់ ក៏ដូចជាព្រះបន្ទូល ដែលបានសន្យាថា នឹងការពារ និងរំដោះយើងឲ្យរួច។
ពេលណាយើងជ្រកកោននៅក្នុងព្រះ យើងនឹងបានរស់នៅ “ក្នុងម្លប់នៃព្រះដ៏មានចេស្ដា”(ទំនុកដំកើង ៩១:១)។ ព្រះអង្គអនុញ្ញាតឲ្យយើងជួបបញ្ហា ផ្អែកទៅលើប្រាជ្ញា និងសេចក្តីស្រឡាញ់របស់ព្រះអង្គដែលគ្មានដែនកំណត់។ នេះជាសុវត្ថិភាព ដែលយើងទទួលបាន ក្នុងការជ្រកកោននៅក្នុងព្រះ។—KAREN HUANG
តើការជ្រកកោននៅក្នុងព្រះ មានន័យដូចម្តេច? តើការឆ្លើយតបរបស់អ្នកចំពោះទុក្ខលំបាក មានការផ្លាស់ប្តូរយ៉ាងណាខ្លះ បើសិនជាអ្នកសម្រេចចិត្តរស់នៅ ក្នុងជម្រកនៃព្រះដ៏ខ្ពស់បំផុត?
ឱព្រះវរបិតា ដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ សម្រាប់ការត្រាស់ហៅទូលបង្គំឲ្យចូលជ្រក ក្នុងព្រះអង្គ។
To learn more about what it means to live in union with Christ, visit ODBU.org/SF130.
គម្រោងអានព្រះគម្ពីររយៈពេល១ឆ្នាំ : លេវីវិន័យ ៨-១០ និង ម៉ាថាយ ២៥:៣១-៤៦
