បានចែងទុកតែប៉ុណ្ណេះ ដើម្បីឲ្យអ្នករាល់គ្នាបានជឿថា ព្រះយេស៊ូវជាព្រះគ្រីស្ទ គឺជាព្រះរាជបុត្រានៃព្រះពិត។ យ៉ូហាន ២០:៣១
ពេលដែលអ្នកស្រី ដូរីស ខឺន ហ្គូដវីន(Doris Kearns Goodwin) បានសម្រេចចិត្តនិពន្ធសៀវភៅមួយក្បាល អំពីលោកប្រធានាធិបតីអ័ប្រាហាំ លីនខិន(Abraham Lincoln) នាងមានការភ័យខ្លាច ដោយសារការពិតដែលថា មានសៀវភៅ១ម៉ឺន៤ពាន់ក្បាល ដែលគេបាននិពន្ធអំពីប្រធានាធិបតីទី១៦រូបនេះ។ មានសៀវភៅជាច្រើនបាននិពន្ធអំពីគាត់ហើយ តើនៅមានចំណុចអ្វីទៀត ដែលនាងអាចសរសេរអំពីអ្នកដឹកនាំជាទីស្រឡាញ់នេះ? នាងមិនបណ្តោយឲ្យរឿងនេះធ្វើជាឧបសគ្គរារាំងនាងឡើយ។ ទីបំផុត អ្នកស្រីហ្គូដវីនក៏សម្រេចបានការនិពន្ធសៀវភៅ មានចំណងជើងថា គូរប្រជែងមួយក្រុម : អ្នកប្រាជ្ញនយោបាយ អ័ប្រាហាំ លីនខិន។ ទស្សនៈថ្មីៗដែលនាងបានបង្ហាញក្នុងសៀវភៅនេះ អំពីរបៀបនៃការដឹកនាំរបស់លោកលីនខិន បាននាំឲ្យសៀវភៅនេះក្លាយជាសៀវភៅដែលបានទទួលពិន្ទុច្រើនជាងគេ និងត្រូវបានគេលើកមកនិយាយច្រើនជាងគេផងដែរ។
សាវ័កយ៉ូហានបានជួបបញ្ហាប្រឈមដែលខុសពីនេះ កាលគាត់កត់ត្រាអំពីព្រះរាជកិច្ច និងដួងព្រះទ័យរបស់ព្រះយេស៊ូវ ក្នុងកណ្ឌគម្ពីរដំណឹងល្អយ៉ូហាន។ ខចុងក្រោយនៃកណ្ឌគម្ពីរនេះបានចែងថា “មានការជាច្រើនទៀត ដែលព្រះយេស៊ូវបានធ្វើដែរ ខ្ញុំស្មានថា បើនឹងសរសេរទុក ដោយលំដាប់តមក នោះលោកីយ៍ទាំងមូលក៏មិនល្មមគ្រាន់ ដើម្បីនឹងដាក់អស់ទាំងសៀវភៅ ដែលត្រូវសរសេរនោះផង”(យ៉ូហាន ២១:២៥)។ ដូចនេះ មានសេចក្តីជាច្រើនទៀត ដែលសាវ័កយ៉ូហានអាចសរសេរក្នុងកណ្ឌគម្ពីរនេះ។
ដូចនេះ ក្នុងការនិពន្ធកណ្ឌគម្ពីរនេះ យុទ្ធសាស្ត្ររបស់សាវ័កយ៉ូហាន គឺត្រូវផ្ដោតទៅលើការអស្ចារ្យមួយចំនួន ដែលជាភស្តុតាងគាំទ្រការអះអាងរបស់ព្រះយេស៊ូវថា ព្រះអង្គជាព្រះ។ តែនៅពីក្រោយយុទ្ធសាស្ត្រនេះ គឺមានបំណងព្រះទ័យដ៏អស់កល្បរបស់ព្រះ គឺដូចដែលគាត់បានចែងថា : “ព្រះយេស៊ូវក៏ធ្វើទីសំគាល់ជាច្រើនទៀត នៅមុខពួកសិស្សទ្រង់ ដែលមិនបានចែងទុកក្នុងសៀវភៅនេះទេ បានចែងទុកតែប៉ុណ្ណេះ ដើម្បីឲ្យអ្នករាល់គ្នាបានជឿថា ព្រះយេស៊ូវជាព្រះគ្រីស្ទ គឺជាព្រះរាជបុត្រានៃព្រះពិត ហើយឲ្យអ្នករាល់គ្នាបានជីវិត ដោយសារព្រះនាមទ្រង់ ដោយមានសេចក្តីជំនឿ”(យ៉ូហាន ២០:៣០-៣១)។ តាមរយៈភស្តុតាងច្រើនសន្ធឹកសន្ធាប់នេះ សាវ័កយ៉ូហានបានផ្តល់ឲ្យយើងនូវហេតុផលជាច្រើន ដែលយើងត្រូវជឿព្រះយេស៊ូវ។ តើអ្នកអាចថ្លែងប្រាប់នរណាខ្លះ អំពីព្រះអង្គ នៅថ្ងៃនេះ?—BILL CROWDER
តើអ្នកបានឃើញភស្តុតាងអ្វីខ្លះ ក្នុងព្រះគម្ពីរ ដែលបានគាំទ្រការអះអាងរបស់ព្រះអង្គថា ព្រះអង្គជាព្រះ? ហេតុអ្វីអ្នកទទួលជឿព្រះអង្គ?
ឱព្រះវរបិតាដែលគង់នៅស្ថានសួគ៌ សូមព្រះអង្គពង្រឹងជំនឿទូលបង្គំ តាមរយៈព្រះបន្ទូលក្នុងព្រះគម្ពីរ ដើម្បីឲ្យទូលបង្គំបានរស់នៅថ្វាយព្រះយេស៊ូវ។
To learn more about defending your faith, visit ODBU.org/CA101.
គម្រោងអានព្រះគម្ពីររយៈពេល១ឆ្នាំ : លេវីវិន័យ ១៣ និង ម៉ាថាយ ២៦:២៦-៥០
