បញ្ចាំងពន្លឺព្រះអង្គ
ដោយPatricia Raybon
February 16, 2023
នៅក្នុងទ្រង់មានជីវិត ហើយជីវិតនោះជាពន្លឺនៃមនុស្សលោក។ យ៉ូហាន ១:៤ ដើម្បីឲ្យផ្ទាំងគំនូរពណ៌ប្រេង រូបទេសភាពមានសម្រស់ស្អាត នៅត្រង់ចំណុចភ្លឺ បែបចំណាំងផ្លាត វិចិត្រករ ឈ្មោះអ័មែន ខាប្រេរ៉ា(Armand Cabrera) បានអនុវត្តតាមគោលការណ៍ជាគន្លឹះ ដែលទទួលស្គាល់ថា “ពន្លឺចំណាំងផ្លាតមិនដែលភ្លឺខ្លាំង ដូចប្រភពពន្លឺឡើយ”។ គាត់បានធ្វើការសង្កេតឃើញថា អ្នកដែលទើបតែក្លាយជាវិចិត្រករ ច្រើនតែដាក់ពណ៌ឲ្យភ្លឺពេក នៅត្រង់ចំណុចភ្លឺ។ គាត់ថា “ពន្លឺចំណាំងផ្លាតមានការគួបផ្សំជាមួយចំណុចស្រមោល ហេតុនេះហើយ វាត្រូវតែធ្វើជាជំនួយ គឺមិនមែនប្រជែងនឹងផ្នែកដែលភ្លឺ ក្នុងផ្ទាំងគំនូររបស់វិចិត្រករនោះឡើយ”។ រឿងនេះបានធ្វើឲ្យខ្ញុំនឹកចាំ អំពីការបង្រៀនក្នុងព្រះគម្ពីរ អំពីព្រះយេស៊ូវ ដែលជាពន្លឺនៃមនុស្សជាតិ (យ៉ូហាន ១:៤)។ លោកយ៉ូហាន បាទីស្ទ “បានមកសំរាប់ជាទីបន្ទាល់ ដើម្បីនឹងធ្វើបន្ទាល់ពីពន្លឺ ប្រយោជន៍ឲ្យមនុស្សទាំងអស់បានជឿ ដោយសារគាត់”(ខ.៧)។ កណ្ឌគម្ពីរដំណឹងល្អបានប្រាប់យើងថា “គាត់មិនមែនជាពន្លឺនោះទេ គឺមកគ្រាន់តែនឹងធ្វើបន្ទាល់ពីពន្លឺតែប៉ុណ្ណោះ”(ខ.៨)។ ក្នុងនាមយើងជាគ្រីស្ទបរិស័ទ យើងមិនខុសពីលោកយ៉ូហាន បាទីស្ទឡើយ។ ព្រះទ្រង់បានជ្រើសរើសយើង ឲ្យធ្វើបន្ទាល់ពីពន្លឺរបស់ព្រះគ្រីស្ទ ដល់អ្នកដែលកំពុងរស់នៅ ក្នុងភាពងងឹតនៃលោកិយដែលមិនជឿព្រះ។ នេះជាតួនាទីដ៏សំខាន់របស់យើង ព្រោះអ្នកមិនជឿអាចពិបាកទទួលពន្លឺនៃសិរីល្អដោយផ្ទាល់ពីព្រះអង្គ។ លោកខាប្រេរ៉ាបានបង្រៀនសិស្សរបស់គាត់ថា “ចំណុចអ្វីដែលទទួលពន្លឺដោយផ្ទាល់ពីប្រភពពន្លឺ ក្នុងរូបគំនូរណាមួយ ក្លាយជាទីបញ្ចេញពន្លឺផងដែរ”។ ស្រដៀងគ្នានេះដែរ បន្ទាប់ពីយើងបានទទួលពន្លឺ ពីព្រះយេស៊ូវជា “ពន្លឺដ៏ពិត” (ខ.៩) យើងក៏អាចបញ្ចេញពន្លឺ ដល់អ្នកដទៃ ក្នុងនាមជាស្មរបន្ទាល់របស់ព្រះអង្គ។ ពេលណាយើងបង្ហាញឲ្យគេស្គាល់ព្រះអង្គ តាមរយៈការរស់នៅរបស់យើង សូមឲ្យលោកិយមានចិត្តស្ញប់ស្ញែង ពេលបានឃើញសិរីល្អរបស់ព្រះអង្គ បញ្ចេញពន្លឺតាមរយៈយើង។—PATRICIA RAYBON
តើអ្នកបញ្ចាំងពន្លឺរបស់ព្រះគ្រីស្ទ យ៉ាងដូចម្តេចខ្លះ? ក្នុងលោកិយនេះ មានកន្លែងងងឹតណាខ្លះ ដែលអ្នកអាចបញ្ចាំងពន្លឺរបស់ព្រះអង្គ ដែលនាំឲ្យជីវិតផ្លាស់ប្រែ?
ឱព្រះ ដ៏ជាពន្លឺដ៏ស្រស់បំព្រង សូមព្រះអង្គបញ្ចេញពន្លឺមកលើទូលបង្គំ។ សូមព្រះអង្គជួយទូលបង្គំ ឲ្យបញ្ចេញពន្លឺរបស់ព្រះអង្គ ក្នុងទីងងឹតនៃលោកិយដែលមិនជឿព្រះ។
គម្រោងអានព្រះគម្ពីររយៈពេល១ឆ្នាំ : លេវីវិន័យ ១៩-២០ និង ម៉ាថាយ ២៧:៥១-៦៦