ដ្បិតយើងខ្ញុំទាំងអស់គ្នាបានត្រឡប់ទៅដូចជាមនុស្សដែលមិនស្អាត ហើយអស់ទាំងអំពើសុចរិតរបស់យើងខ្ញុំ ក៏ដូចជាអាវកខ្វក់ហើយ។ អេសាយ ៦៤:៦
ថ្មីៗនេះ ខ្ញុំ និងភរិយារបស់ខ្ញុំ កំពុងសម្អាតផ្ទះរបស់យើង មុនពេលភ្ញៀវមកដល់។ ខ្ញុំសង្កេតឃើញឥដ្ឋការ៉ូ នៅក្នុងផ្ទះបាយរបស់យើង មានស្នាមប្រឡាក់ជាប់ខ្លាំង បានជាខ្ញុំត្រូវលត់ជង្គង់ដុះជូតវាឲ្យជ្រះស្អាត។
តែមិនយូរប៉ុន្មាន ខ្ញុំក៏បានដឹងថា ពេលណាខ្ញុំដុះជូតកាន់តែច្រើន នោះខ្ញុំក៏បានកត់សំគាល់ឃើញស្នាមប្រឡាក់កាន់តែច្រើន នៅកន្លែងផ្សេងទៀត។ ស្នាមប្រឡាក់នីមួយៗដែលខ្ញុំបានលប់បំបាត់ គឺគ្រាន់តែបានធ្វើឲ្យស្នាមប្រឡាក់ដទៃទៀត លេចឡើងកាន់តែច្បាស់។ ភ្លាមនោះ រនាបនៅផ្ទះបាយយើងហាក់ដូចជាប្រឡាក់ ដល់ថ្នាក់មិនអាចដុះឲ្យជ្រះស្អាតបាន។ ហើយខ្ញុំក៏បានដឹងថា ទោះខ្ញុំខំប្រឹងយ៉ាងណាក៏ដោយ ខ្ញុំមិនអាចធ្វើឲ្យកម្រាលឥដ្ឋស្អាតទាំងស្រុងបានឡើយ។
ព្រះគម្ពីរបានចែង អំពីរឿងស្រដៀងនេះផងដែរ អំពីការលាងសម្អាតខ្លួនឯង ដែលក្នុងនោះ ទោះយើងខំប្រឹងលាងសម្អាតខ្លួនឯងប៉ុណ្ណាក៏ដោយ ក៏យើងនៅតែមិនអាចជ្រះស្អាតដដែល។ ពេលដែលពួកអ៊ីស្រាអែល ជារាស្រ្តរបស់ព្រះ កំពុងស្ថិតក្នុងភាពអស់សង្ឃឹម(អេសាយ ៦៤:៥) ហោរាអេសាយក៏បានសរសេរថា “យើងខ្ញុំទាំងអស់គ្នាបានត្រឡប់ទៅដូចជាមនុស្សដែលមិនស្អាត ហើយអស់ទាំងអំពើសុចរិតរបស់យើងខ្ញុំ ក៏ដូចជាអាវកខ្វក់ហើយ”(ខ.៦)។
ប៉ុន្តែ ហោរាអេសាយក៏បានដឹងផងដែរថា ពួកគេនៅតែអាចមានក្តីសង្ឃឹម តាមរយៈសេចក្តីល្អរបស់ព្រះ។ ហេតុនេះហើយ គាត់ក៏បានអធិស្ឋានថា “ឱព្រះយេហូវ៉ាអើយ ទ្រង់ជាព្រះវរបិតានៃយើងខ្ញុំ យើងខ្ញុំរាល់គ្នាជាដីឥដ្ឋ ហើយទ្រង់ជាជាងស្មូន”(ខ.៨)។ គាត់ដឹងថា មានតែព្រះទេ ដែលអាចសម្អាតស្នាមប្រឡាក់ដែលជ្រៅបំផុត ទាល់តែបានសស្អាតដូចព្រិល(១:១៨)។
យើងមិនអាចលាងសម្អាតស្នាមប្រឡាក់នៃអំពើបាប នៅលើវិញ្ញាណរបស់យើងបានទេ។ តែអរព្រះគុណព្រះអង្គ ដែលយើងអាចទទួលសេចក្តីសង្គ្រោះ ពីព្រះដែលបានលាងសម្អាតបាប ចេញពីយើង ឲ្យជ្រះស្អាតទាំងស្រុង តាមរយៈការលះបង់របស់ព្រះអង្គ(១យ៉ូហាន ១:៧)។—ADAM R. HOLZ
ហេតុអ្វីមនុស្សពិបាកទទួលការអត់ទោសបាបពីព្រះ? ហេតុអ្វីអ្នកចេះតែចង់លាងសម្អាតបាបខ្លួនឯង?
ឱព្រះវរបិតា សូមព្រះអង្គជួយទូលបង្គំឲ្យសម្រាក ក្នុងការអត់ទោសបាបរបស់ព្រះអង្គ ជាជាងព្យាយាមលាងសម្អាតបាបខ្លួនឯង។
គម្រោងអានព្រះគម្ពីររយៈពេល១ឆ្នាំ : លេវីវិន័យ ២១-២២ និង ម៉ាថាយ ២៨
