ព្រះអម្ចាស់ទ្រង់ប្រទានព្រះបន្ទូល ហើយពួកអ្នកដែលប្រកាសប្រាប់ដំណឹង នោះមានគ្នាច្រើនណាស់។ ទំនុកដំកើង ៦៨:១១
កាលពីឆ្នាំ២០២០ គេបានអបអរខួប១០០ឆ្នាំ នៃការធ្វើវិសោធនកម្មទី៩ នៃរដ្ឋធម្មនុញ្ញរបស់សហរដ្ឋអាមេរិក ដែលបានឲ្យស្រ្តីមានសិទ្ធិបោះឆ្នោត។ នៅក្នុងរូបថត ដែលបានផ្តិតយកព្រឹត្តិការណ៍នៃការដើរដង្ហែរ កាលពី១០០ឆ្នាំមុន គេឃើញ អ្នកចូលរួមកាន់បដា មានសរសេរបទគម្ពីរទំនុកដំកើង ៦៨:១១ ដែលបានចែងថា “ព្រះអម្ចាស់ទ្រង់ប្រទានព្រះបន្ទូល ហើយពួកអ្នកដែលប្រកាសប្រាប់ដំណឹង នោះមានគ្នាច្រើនណាស់”។
ក្នុងបទគម្ពីរទំនុកដំកើងជំពូក៦៨ ស្តេចដាវីឌបានពិពណ៌នាថា ព្រះទ្រង់ជាអ្នកដឹកនាំមនុស្សដែលគេជិះជាន់ ឲ្យមានសេរីភាព(ខ.៦) ដោយជួយរាស្រ្តដែលហត់នឿយ ឲ្យមានភាពស្រស់ថ្លា និងស្អាងពួកគេឡើងជាថ្មី ដោយសេចក្តីសប្បុរសយ៉ាងហូរហៀររបស់ព្រះអង្គ(៩-១០)។ ក្នុងខគម្ពីរទាំង៣៥ នៃបទគម្ពីរទំនុកដំកើងនេះ ស្តេចដាវីឌបានមានបន្ទូលសំដៅទៅលើព្រះអម្ចាស់៤២ដង ដោយបង្ហាញថា ព្រះអង្គតែងតែគង់នៅជាមួយពួកគេ និងជួយសង្រ្គោះពួកគេឲ្យរួចផុតពីភាពអយុត្តិធម៌ និងទុក្ខវេទនា។ ហើយមនុស្សជាច្រើនបានប្រកាសដំណឹងល្អនេះ(ខ.១១)។
ទោះស្រ្តីដែលបានដើរដង្ហែក្បួន ដើម្បីទាមទាសិទ្ធិបោះឆ្នោត បានយល់ច្បាស់អំពីអត្ថន័យបទគម្ពីរទំនុកដំកើង ៦៨ ឬអត់ក៏ដោយ ក៏បដារបស់ពួកគេបានប្រកាសសេចក្តីពិតនៃបទគម្ពីរនេះ ដែលនៅតែមានន័យគ្រប់សម័យកាល។ ព្រះដែលបានធ្វើជា “ឪពុករបស់ក្មេងកំព្រា” និង “អ្នកការពារស្រ្តីមេម៉ាយ”(ខ.៥) បានដឹកនាំរាស្រ្តព្រះអង្គ ទៅរកកន្លែងដែលមានព្រះពរ ភាពស្រស់ថ្លាឡើងវិញ និងក្តីអំណរ។
សូមទទួលការកម្សាន្តចិត្តនៅថ្ងៃនេះ ដោយចាំថា ព្រះវត្តមានរបស់ព្រះអង្គតែងតែនៅជាប់ជាមួយរាស្រ្តព្រះអង្គ និងជាពិសេស អ្នកដែលងាយរងគ្រោះ និងកំពុងរងទុក្ខ។ ព្រះអង្គនៅតែគង់នៅជាមួយយើងក្នុងពេលសព្វថ្ងៃ ដោយព្រះវិញ្ញាណព្រះអង្គ ដូចសម័យមុនផងដែរ។—LISA M. SAMRA
តើអ្នកបានពិសោធន៍នឹងការថែរក្សារបស់ព្រះអង្គ ដូចម្តេចខ្លះ ក្នុងពេលដែលអ្នកជួបទុក្ខលំបាក? តើអ្នកបានទទួលការលើកទឹកចិត្តអ្វីខ្លះ ពីបទពិសោធន៍នោះ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការគង់នៅជាប់ជានិច្ច ក្នុងជីវិតទូលបង្គំ ដោយដឹកនាំទូលបង្គំ និងប្រយុទ្ធជំនួសទូលបង្គំ ពេលណាទូលបង្គំ ជួបទុក្ខលំបាក និងភាពអយុត្តិធម៌។
គម្រោងអានព្រះគម្ពីររយៈពេល១ឆ្នាំ : ចោទិយកថា ៥-៧ និង ម៉ាកុស ១១:១-១៨
