ជួងព្រះវិហារផលិតពីថ្មខៀវ
ដោយBill Crowder
April 2, 2023
ខ្ញុំប្រាប់អ្នករាល់គ្នាថា បើអ្នកទាំងនេះនៅស្ងៀម នោះថ្មនឹងស្រែកឡើងវិញ។ លូកា ១៩:៤០ ថ្មខៀវមានប្រភេទខុសៗគ្នា ដែលមានលក្ខណៈទាក់ទាញយ៉ាងខ្លាំង។ ពេលណាគេគោះថ្មខៀវទាំងនោះ ពួកវាបញ្ចេញសូរសម្លេងខុសគ្នា។ នៅប្រទេសវេល មានភូមិមួយឈ្មោះ មេនក្លូឆុក ដែលឈ្មោះនេះមានន័យថា “ជួង” ឬ “ថ្មបញ្ចេញសម្លេង”។ នៅទីនោះ គេបានប្រើថ្មខៀវ ធ្វើជាជួងព្រះវិហារ រហូតដល់សតវត្សរ៍ទី១៨។ អ្វីដែលគួរឲ្យចាប់អារម្មណ៍នោះ គឺសំណង់ចាស់បុរាណស្តូនហេង នៅប្រទេសអង់គ្លេស ដែលមានថ្មធំៗបញ្ឈរជារង្វង់ ត្រូវបានគេសង់ឡើងពីថ្មខៀវ បានជាអ្នកខ្លះឆ្ងល់ថា តើនៅសម័យដើម គេបានប្រើសំណង់នោះ ដើម្បីប្រគំតន្ត្រីឬយ៉ាងណា។ អ្នកស្រាវជ្រាវខ្លះបានអះអាងថា ថ្មខៀវនៅសំណង់បុរាណស្តូនហេង ត្រូវបានគេដឹកយកមកពីតំបន់នៅក្បែរភូមិមេនក្លូឆុក ដែលស្ថិតនៅចម្ងាយជិត៣០០គីឡូម៉ែត្រពីស្តូនហេងនោះ ដោយសារថ្មខៀវទាំងនោះ មានលក្ខណៈសម្បត្តិពិសេសផ្នែកតន្រ្តី។ ថ្មដែលគេបានប្រើជាឧបករណ៍តន្រ្តី គឺជាស្នាព្រះហស្តរបស់ព្រះផងដែរ ហើយថ្មទាំងនោះបានធ្វើឲ្យខ្ញុំនឹកចាំ អំពីព្រះបន្ទូលព្រះយេស៊ូវ ក្នុងអំឡុងពេលថ្ងៃអាទិត្យនៃស្លឹកចាក ដែលទ្រង់យាងចូលទីក្រុងយេរូសាឡិម។ ពេលដែលពួកបណ្តាជនស្រែកសរសើរដំកើងព្រះយេស៊ូវ អ្នកដឹកនាំសាសនាក៏បានទាមទាព្រះអង្គ ឲ្យស្តីបន្ទោសពួកគេ តែព្រះអង្គបានឆ្លើយតបថា “ខ្ញុំប្រាប់អ្នករាល់គ្នាថា បើអ្នកទាំងនេះនៅស្ងៀម នោះថ្មនឹងស្រែកឡើងវិញ”(លូកា ១៩:៤០)។ បើគេអាចយកថ្មខៀវធ្វើជាឧបករណ៍តន្ត្រីបាន ហើយបើព្រះយេស៊ូវបានមានបន្ទូលអំពីថ្ម ដែលនឹងធ្វើបន្ទាល់អំពីព្រះអាទិកររបស់ខ្លួនបាន នោះតើយើងអាចបង្ហាញចេញនូវការសរសើរដំកើងរបស់យើង ដល់ព្រះដែលបានបង្កើត ស្រឡាញ់ និងសង្គ្រោះយើង យ៉ាងដូចម្តេចខ្លះ? ព្រះអង្គសក្តិសមនឹងទទួលការថ្វាយបង្គំគ្រប់យ៉ាង។ សូមព្រះវិញ្ញាណព្រះអង្គបណ្តាលចិត្តយើង ឲ្យថ្វាយព្រះអង្គ នូវព្រះកិត្តិនាម ដែលព្រះអង្គសក្តិសមនឹងទទួល។ ចូរឲ្យស្នាព្រះហស្តទាំងអស់របស់ព្រះអង្គ បានសរសើរដំកើងព្រះអង្គ។—BILL CROWDER
តើអ្នកយល់ឃើញថា ស្នាព្រះហស្តព្រះសរសើរដំកើងព្រះអង្គ ដោយរបៀបណាខ្លះ? តើអ្នកអាចចូលរួម ក្នុងការថ្វាយបង្គំព្រះអាទិករជាមួយស្នាព្រះហស្តព្រះអង្គ ដូចម្តេចខ្លះ?
ឱព្រះអាទិករ ព្រះអង្គសក្តិសមនឹងទទួលការថ្វាយបង្គំ ការសរសើរដំកើង និងការអរព្រះគុណគ្រប់យ៉ាង។ ពេលណាចិត្តទូលបង្គំរឹងរូស ហើយទូលបង្គំមិនបាននឹកចាំអំពីភាពសក្តិសមរបស់ព្រះអង្គ សូមព្រះអង្គរំឭកទូលបង្គំថា ស្នាព្រះហស្តទាំងអស់សុទ្ធតែច្រៀងសរសើរដំកើងព្រះអង្គ។
For further study, read All Creation Sings at DiscoverySeries.org/HP001.
គម្រោងអានព្រះគម្ពីររយៈពេល១ឆ្នាំ: ពួកចៅហ្វាយ ១៦-១៨ និង លូកា ៧:១-៣០