គ្មានសេចក្តីស្រឡាញ់ធំជាងនេះ
ដោយAmy Boucher Pye
April 16, 2023
គ្មានអ្នកណាមានសេចក្តីស្រឡាញ់ធំជាងនេះ គឺដែលអ្នកណានឹងប្តូរជីវិត ជំនួសពួកសំឡាញ់របស់ខ្លួននោះទេ។ យ៉ូហាន ១៥:១៣ ក្នុងអំឡុងពេលប៉ុន្មានថ្ងៃ មុនថ្ងៃដែលគ្រីស្ទបរិស័ទទូទាំងពិភពលោកប្រារព្ធបុណ្យព្រះយេស៊ូវមានព្រះជន្មរស់ឡើងវិញ មានភារវករម្នាក់បានសម្រុកចូលទៅក្នុងផ្សាទំនើបមួយ ក្នុងតំបន់និរតីនៃប្រទេសបារាំង ដោយធ្វើការបាញ់ប្រហារ បណ្តាលឲ្យមនុស្សពីរនាក់បាត់បង់ជីវិត។ បន្ទាប់ពីមានការចរចាគ្នាជាមួយប៉ូលិស ភារវករនោះក៏បានដោះលែងចំណាត់ខ្មាំងទាំងអស់ ដោយទុកតែម្នាក់ប៉ុណ្ណោះ សម្រាប់ធ្វើជាខែលការពារ។ លោកអាណូដ បេលត្រេម(Arnaud Beltrame) ជាមន្រ្តីប៉ូលិស បានមើលឃើញគ្រោះថ្នាក់ ដែលអាចកើតមានមកលើចំណាត់ខ្មាំងម្នាក់នោះ ដូចនេះ គាត់ក៏បានធ្វើរឿងដែលគេមិននឹកស្មានដល់ ដោយគាត់បានស្ម័គ្រចិត្ត ចូលទៅធ្វើចំណាប់ខ្មាំងជំនួសស្រ្តីនោះ។ ឧក្រិដ្ឋជននោះក៏បានដោះលែងនាង តែក្នុងការប្រយុទ្ធរយៈពេលខ្លី ជាមួយភារវជននោះ លោកបេលត្រេម ក៏បានរងរបួស ហើយក្រោយមក ក៏បានបាត់បង់ជីវិត។ អ្នកដឹកនាំពួកជំនុំម្នាក់ ដែលបានស្គាល់មន្រ្តីប៉ូលិសនោះ ក៏បានចែកចាយថា សេចក្តីក្លាហានរបស់លោកបេត្រេម គឺបានកើតចេញពីជំនឿដែលគាត់មានចំពោះព្រះយេស៊ូវ ហើយគាត់ក៏បានចង្អុលបង្ហាញព្រះបន្ទូលព្រះអង្គក្នុងបទគម្ពីរ យ៉ូហាន ១៥:១៣ ដែលបានចែងថា “គ្មានអ្នកណាមានសេចក្តីស្រឡាញ់ធំជាងនេះ គឺដែលអ្នកណានឹងប្តូរជីវិត ជំនួសពួកសំឡាញ់របស់ខ្លួននោះទេ”។ នេះជាពាក្យពេចន៍ដែលព្រះយេស៊ូវបានមានបន្ទូលទៅកាន់ពួកសិស្សព្រះអង្គ បន្ទាប់ពីបានសោយអាហារជាលើកចុងក្រោយជាមួយពួកគេ មុនពេលព្រះអង្គសុគត។ ព្រះអង្គបានប្រាប់ពួកសិស្ស ដែលជាមិត្តសំឡាញ់ព្រះអង្គថា “នេះជាសេចក្តីបញ្ញត្តរបស់ខ្ញុំ គឺឲ្យអ្នករាល់គ្នាស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ”(ខ.១២) ហើយអ្នកដែលហ៊ានលះបង់ជីវិតខ្លួនឯង ដើម្បីអ្នកដទៃ មានក្តីស្រឡាញ់ធំបំផុត(ខ.១៣)។ ការលះបង់ព្រះជន្មជាអ្វីដែលព្រះយេស៊ូវបានធ្វើនៅថ្ងៃបន្ទាប់ ពេលព្រះអង្គយាងទៅឈើឆ្កាង ដើម្បីជួយសង្រ្គោះយើង ឲ្យរួចពីបាប ដ្បិតមានតែព្រះអង្គទេ ដែលអាចសង្រ្គោះយើងបាន។ យើងប្រហែលមិនដែលមានឱកាសយកគំរូតាមភាពក្លាហាន ដូចលោកអាណូដ បេលត្រេមនោះទេ។ តែដោយសារយើងនៅជាប់ក្នុងសេចក្តីស្រឡាញ់របស់ព្រះ នោះយើងអាចបម្រើអ្នកដទៃ ដោយលះបង់ផែនការ និងសេចក្តីប៉ងប្រាថ្នារបស់យើង ខណៈពេលដែលយើងស្វែងរកឱកាស ចែកចាយរឿងនៃសេចក្តីស្រឡាញ់ដ៏អស្ចារ្យរបស់ព្រះអង្គ។—AMY BOUCHER PYE
តើអ្នកឆ្លើយតបដូចម្តេចខ្លះ ចំពោះរឿងនៃការលះបង់ ដូចរឿងរបស់លោកអាណូដ បេលត្រេម? តើអ្នកអាចបម្រើនរណាម្នាក់ ដោយការលះបង់ ដូចម្តេចខ្លះ នៅថ្ងៃនេះ?
ឱព្រះយេស៊ូវ ព្រះអង្គបានសុគតដើម្បីប្រទានទូលបង្គំនូវជីវិតអស់កល្ប។ សូមព្រះអង្គជួយទូលបង្គំ ឲ្យរស់នៅ ដោយការដឹងគុណ ចំពោះអំណោយនេះ និងចែកចាយអំពីអំណោយនេះ ដល់មនុស្សដែលព្រះអង្គឲ្យទូលបង្គំជួបក្នុងដំណើរជីវិត។
គម្រោងអានព្រះគម្ពីររយៈពេល១ឆ្នាំ: ១សាំយ៉ូអែល ៣០-៣១ និង លូកា ១៣:២៣-៣៥