ក៏ខំមមុលឈោងទៅឯសេចក្តីខាងមុខទៀត ទាំងរត់ដំរង់ទៅឯទី ដើម្បីឲ្យបានរង្វាន់នៃការងារដ៏ខ្ពស់របស់ព្រះ ក្នុងព្រះគ្រីស្ទយេស៊ូវ។ ភីលីព ៣:១៣-១៤
ក្នុងការរត់ហាត់ប្រណាំងកាត់ព្រៃ ខ្ញុំបានព្យាយាមស្វែងរកផ្លូវកាត់ ហើយក៏បានរត់តាមផ្លូវ ដែលខ្ញុំមិនដែលស្គាល់។ ពេលនោះ ខ្ញុំមិនដឹងថា ខ្លួនឯងកំពុងតែវង្វេងឬយ៉ាងណាទេ។ ខ្ញុំក៏បានឃើញមនុស្សម្នាក់រត់ចេញពីផ្លូវមួយទៀត ហើយក៏បានសួរគាត់ថា តើខ្ញុំកំពុងរត់តាមផ្លូវត្រូវឬទេ?
គាត់ក៏បានឆ្លើយដោយទំនុកចិត្តថា ខ្ញុំកំពុងតែរត់តាមផ្លូវត្រូវហើយ។ ពេលគាត់ឃើញខ្ញុំមានទឹកមុខសង្ស័យ គាត់ក៏បានប្រញាប់ប្រាប់ខ្ញុំ កុំឲ្យព្រួយបារម្ភ ព្រោះគាត់បានសាកល្បងរត់ទៅតាមផ្លូវផ្សេង ដែលសុទ្ធតែជាផ្លូវខុស តែវាមិនអីទេ ព្រោះនេះជាផ្នែកមួយនៃការត់ប្រណាំងរបស់យើង។
រឿងនេះបានធ្វើឲ្យខ្ញុំនឹកចាំ អំពីការធ្វើដំណើរខាងវិញ្ញាណរបស់ខ្ញុំ។ តើមានពេលប៉ុន្មានដងហើយ ដែលខ្ញុំបានវង្វេងចេញពីព្រះ ធ្លាក់ចូលក្នុងការល្បួង ហើយមានរឿងជាច្រើនបានបង្វែរអារម្មណ៍ខ្ញុំឲ្យងាកចេញពីសេចក្តីពិត? ប៉ុន្តែ ព្រះទ្រង់បានអត់ទោសឲ្យខ្ញុំគ្រប់ពេល ហើយក៏បានជួយខ្ញុំបន្តដំណើរទៅមុខ ដោយដឹងថា ខ្ញុំប្រាកដជានឹងជំពប់ដួលទៀតមិនខាន។ ព្រះទ្រង់ជ្រាបថា យើងងាយនឹងធ្វើដំណើរតាមផ្លូវខុស។ តែព្រះអង្គតែងតែត្រៀមជាស្រេច ដើម្បីអត់ទោសឲ្យយើងម្តងហើយម្តងទៀត បើយើងសារភាពបាប ហើយអនុញ្ញាតឲ្យព្រះវិញ្ញាណព្រះអង្គកែប្រែយើង។
សាវ័កប៉ុលដឹងថា បញ្ហានេះជាផ្នែកមួយនៃការធ្វើដំណើរខាងព្រលឹងវិញ្ញាណរបស់យើង។ គាត់បានដឹងច្បាស់ពីអំពើបាបរបស់គាត់ពីអតីតកាល និងភាពកម្សោយរបស់គាត់ ក្នុងពេលបច្ចុប្បន្ន បានជាគាត់ដឹងថា គាត់មិនទាន់មានភាពល្អឥតខ្ចោះដូចព្រះគ្រីស្ទ ដូចដែលគាត់ចង់បាននោះទេ(ភីលីព ៣:១២)។ តែគាត់មានប្រសាសន៍បន្ថែមទៀតថា “ខ្ញុំភ្លេចសេចក្តីទាំងប៉ុន្មានដែលកន្លងទៅហើយ ក៏ខំមមុលឈោងទៅឯសេចក្តីខាងមុខទៀត ទាំងរត់ដំរង់ទៅឯទី ដើម្បីឲ្យបានរង្វាន់នៃការងារដ៏ខ្ពស់របស់ព្រះ ក្នុងព្រះគ្រីស្ទយេស៊ូវ”(ខ.១៣-១៤)។ ការជំពប់ដួលជាផ្នែកមួយនៃការដើរជាមួយព្រះអង្គ ព្រោះព្រះអង្គជួយយើងឲ្យចម្រើនឡើង តាមរយៈកំហុសរបស់យើង។ ព្រះគុណព្រះអង្គជួយយើងឲ្យបន្តមមុលទៅមុខ ក្នុងនាមយើងជាកូនដែលព្រះអង្គបានអត់ទោសឲ្យហើយ។—LESLIE KOH
តើអ្នកមានកំហុសអ្វី ដែលអ្នកចង់សារភាពនៅចំពោះព្រះអង្គ នៅថ្ងៃនេះ? តើការធានារបស់ព្រះអង្គថា នឹងអត់ទោសឲ្យយើង បានជួយអ្នកឲ្យបន្តការធ្វើដំណើរខាងវិញ្ញាណ ដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់សេចក្តីមេត្តារបស់ព្រះអង្គ។ សូមព្រះអង្គជួយទូលបង្គំឲ្យរស់នៅ ក្នុងជីវិតដែលព្រះអង្គសព្វព្រះទ័យ ដោយដឹងថា ព្រះវិញ្ញាណព្រះអង្គកំពុងតែធ្វើការ ក្នុងទូលបង្គំ ដើម្បីកែប្រែទូលបង្គំ ឲ្យមានលក្ខណៈដូចព្រះរាជបុត្រាព្រះអង្គ។
To learn how to grow on your spiritual journey, visit ODBU.org/SF104.
គម្រោងអានព្រះគម្ពីររយៈពេល១ឆ្នាំ: ២សាំយ៉ូអែល ៩-១១ និង លូកា ១៥:១១-៣២
