ពេលដែលអ្នកដទៃនិយាយបង្ខូចយើង
ដោយJames Banks
April 30, 2023
ពាក្យសំដីរបស់មនុស្សបេះបួយ ធៀបដូចជាម្ហូបយ៉ាងឆ្ងាញ់១ម៉ាត់ ដែលលេបចុះទៅក្នុងពោះ។ សុភាសិត ១៨:៨ សារព័ត៌មានបានចុះផ្សាយថា សត្វឆ្កែឈ្មោះ ផេប(Pep) បានសម្លាប់សត្វឆ្មាមួយក្បាល របស់ភរិយាលោកអភិបាលរដ្ឋ តែវាមិនមែនជាអ្នកសម្លាប់សត្វឆ្មានោះទេ។ វាគ្រាន់តែបានខាំសាឡុងក្នុងគេហដ្ឋានរបស់លោកអភិបាលឲ្យរហែក គឺមិនមានកំហុសអ្វីផ្សេងទៀតទេ។ ផេបជាសត្វឆ្កែនៅក្មេងរពឹសខ្លាំង ជាពូជឆ្កែប្រម៉ាញ់ឡាប្រាដឺ និងជាកម្មសិទ្ធិរបស់លោកអភិបាលរដ្ឋភែនស៊ីលវែនា ក្នុងទសវត្សរ៍ឆ្នាំ១៩២០។ គេក៏បានបញ្ជូនសត្វឆ្កែមួយក្បាលនេះ ចូលក្នុងគុកនៅតំបន់ខាងកើតរបស់រដ្ឋ ដោយគេបានថតរូបវា ដោយមានលេខរៀងសំគាល់ជាអ្នកទោស។ ពេលដែលអ្នកសារព័ត៌មានម្នាក់បានឮអំពីរឿងនេះ គាត់ក៏បានប្រឌិតរឿងថា វាបានសម្លាប់សត្វឆ្មានោះ។ ដោយសារព័ត៌មានរបស់គាត់បានចុះផ្សាយក្នុងកាសែត មនុស្សជាច្រើនជឿថា ផេបជាឃាតករសម្លាប់សត្វឆ្មា។ ស្តេចសាឡូម៉ូន បានជ្រាបច្បាស់ អំពីអំណាចនៃព័ត៌មានក្លែងក្លាយ។ គឺដូចដែលទ្រង់បានសរសេរថា “ពាក្យសំដីរបស់មនុស្សបេះបួយ ធៀបដូចជាម្ហូបយ៉ាងឆ្ងាញ់១ម៉ាត់ ដែលលេបចុះទៅក្នុងពោះ”(សុភាសិត ១៨:៨)។ ជួនកាល ធម្មជាតិរបស់យើងជាមនុស្សមានបាប បានបណ្តាលឲ្យយើងមានចិត្តចង់ជឿរឿងរបស់អ្នកដទៃ ដែលមិនមែនជារឿងពិត។ តែទោះអ្នកដទៃបានជឿរឿងប្រឌិតដែលគេនិយាយបង្ខូចឈ្មោះយើងក៏ដោយ ក៏ព្រះអង្គទ្រង់នៅតែអាចប្រើយើង ជាប្រយោជន៍។ តាមពិត លោកអភិបាលរដ្ឋរូបនោះបានបញ្ជូលផេបឲ្យទៅរស់នៅក្នុងគុក ដើម្បីឲ្យវាអាចធ្វើជាមិត្តភក្តិរបស់អ្នកទោសនៅទីនោះ ហើយវាក៏បានបម្រើការជាសត្វឆ្កែព្យាបាលជំងឺផ្លូវចិត្តរបស់អ្នកទោស អស់ជាច្រើនឆ្នាំ។ បំណងព្រះទ័យដែលព្រះទ្រង់មានសម្រាប់ជីវិតយើងនៅតែមិនប្រែប្រួល ទោះអ្នកដទៃនិយាយ ឬគិតអំពីយើង យ៉ាងដូចម្តេចក៏ដោយ។ ពេលអ្នកដទៃនិយាយដើមយើង សូមចាំថា ព្រះតម្រិះ និងសេចក្តីស្រឡាញ់ដែលព្រះអង្គមាន ចំពោះយើង ទើបសំខាន់បំផុតសម្រាប់យើង។—JAMES BANKS
តើអ្នកមានការលើកទឹកចិត្តយ៉ាងណា ពេលដែលបានដឹងថា ព្រះទ័យព្រះអង្គមិនប្រែប្រួល ដោយសារការអ្វីដែលនរណាម្នាក់និយាយ ឬគិតអំពីអ្នកឡើយ? តើអ្នកនឹងអបអរសេចក្តីស្រឡាញ់ដ៏គ្រប់លក្ខណ៍របស់ព្រះអង្គ នៅថ្ងៃនេះ ដូចម្តេចខ្លះ?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការរាប់ទូលបង្គំជាកូនព្រះអង្គ។ សូមព្រះអង្គជួយទូលបង្គំ ឲ្យចែករំលែកសេចក្តីស្រឡាញ់របស់ព្រះអង្គ ដល់អ្នកដទៃ នៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ: ១ពង្សាវតាក្សត្រ ៨-៩ និង លូកា ២១:១-១៩