បើបងឬប្អូនធ្វើបាបនឹងអ្នក នោះឲ្យទៅបន្ទោសគាត់ ក្នុងកាលដែលមានតែអ្នកហើយ និងគាត់។ ម៉ាថាយ ១៨:១៥
កាលពីឆ្នាំ២០១០ រលកយក្សស៊ូណាមិបានវាយប្រហារមកលើកោះស៊ូម៉ាត្រា បណ្តាលឲ្យមនុស្សជាង៤០០នាក់ បាត់បង់ជីវិត។ ប៉ុន្តែ គេអាចបញ្ចៀស ឬកាត់បន្ថយចំនួនអ្នកស្លាប់នេះ បើសិនជាប្រព័ន្ធប្រកាសអាសន្នអំពីរលកយក្សស៊ូណាមិ មានដំណើរការត្រឹមត្រូវ។ ឧបករណ៍វាស់ស្ទង់ស៊ូណាមិបានដាច់ខ្សែ ហើយក៏បានរសាត់អណ្ដែតទៅបាត់ មុនពេលគ្រោះមហន្តរាយនេះកើតឡើង។
ព្រះយេស៊ូវមានបន្ទូលថា សិស្សរបស់ព្រះអង្គមានការទទួលខុសត្រូវ ក្នុងការដាស់តឿនគ្នាទៅវិញទៅមក អំពីការអ្វីដែលអាចធ្វើឲ្យពួកគេរងគ្រោះខាងវិញ្ញាណ ដែលរាប់បញ្ចូលទាំងអំពើបាបដែលមិនបានប្រែចិត្ត។ ព្រះអង្គបានបង្ហាញរបៀបការកែតម្រង់ ពេលណាអ្នកជឿម្នាក់ដែលបានធ្វើអំពើបាបទាស់នឹងអ្នកជឿម្នាក់ទៀត។ គេអាចកែតម្រង់អ្នកប្រព្រឹត្តខុសនោះ ដោយការបន្ទាបខ្លួន ដោយស្ងាត់ៗ និងដោយការអធិស្ឋាន(ម៉ាថាយ ១៨:១៥)។ បើអ្នកនោះប្រែចិត្ត នោះជម្លោះនោះអាចមានដំណោះស្រាយ ហើយទំនាក់ទំនងអាចផ្សះផ្សាឡើងវិញ។ បើគ្រីស្ទបរិស័ទនោះមិនព្រមប្រែចិត្តទេ នោះ “ត្រូវយកម្នាក់ ឬ២នាក់ទៅជាមួយ” ដើម្បីជួយកែតម្រង់គាត់(ខ.១៦)។ បើអ្នកដែលប្រព្រឹត្តអំពើបាបនោះ នៅតែមិនកែប្រែ គេត្រូវទៅប្រាប់ពួកជំនុំ(ខ.១៧)។ បើគាត់នៅតែមិនប្រែចិត្តទៀត គេត្រូវកាត់គាត់ចេញពីពួកជំនុំ តែគេនៅតែអាចអធិស្ឋានឲ្យគាត់ ហើយបង្ហាញក្តីស្រឡាញ់ដល់គាត់។
ក្នុងនាមយើងជាអ្នកជឿព្រះយេស៊ូវ ចូរយើងអធិស្ឋានសូមប្រាជ្ញា និងសេចក្តីក្លាហាន ដើម្បីដាស់តឿន និងកែតម្រង់គ្នាទៅវិញទៅមក ដោយក្តីស្រឡាញ់ អំពីគ្រោះថ្នាក់នៃអំពើបាបដែលមិនបានប្រែចិត្ត និងអំពីក្តីអំណរនៃការផ្សះផ្សាឡើងវិញ ជាមួយព្រះវរបិតាដែលគង់នៅស្ថានសួគ៌ និងអ្នកជឿដទៃទៀត។ ព្រះយេស៊ូវមានបន្ទូលថា “ដ្បិតកន្លែងណាដែលមាន២ឬ៣អ្នក ប្រជុំជាមួយគ្នា ដោយនូវឈ្មោះខ្ញុំ នោះខ្ញុំក៏នៅកណ្តាលចំណោមអ្នកទាំងនោះដែរ”(ខ.២០)។—MARVIN WILLIAMS
តើអ្នកអាចកែតម្រង់នរណាម្នាក់ ដោយការបន្ទាបខ្លួន និងសេចក្តីស្រឡាញ់ ដោយរបៀបណា? តើអំពើបាបដែលមិនប្រែចិត្ត នាំឲ្យមានគ្រោះថ្នាក់អ្វីខ្លះ?
ឱព្រះអម្ចាស់ សូមព្រះអង្គជួយទូលបង្គំ ឲ្យស្រឡាញ់អ្នកដទៃល្មមនឹងអាចដាស់តឿនពួកគេ ពេលណាពួកគេធ្លាក់ចូលក្នុងអំពើបាប។
គម្រោងអានព្រះគម្ពីររយៈពេល១ឆ្នាំ : ២របាក្សត្រ ២៨-២៩ និង យ៉ូហាន ១៧
