យើងជាទូតតំណាងព្រះគ្រីស្ទ
ដោយadamholz
August 17, 2023
សូមអាន ២កូរិនថូស ៥:១១-២០ ដូច្នេះ យើងខ្ញុំជាទូតដំណាងព្រះគ្រីស្ទ ហាក់ដូចជាព្រះទ្រង់អង្វរដោយសារយើងខ្ញុំ គឺយើងខ្ញុំអង្វរគេជំនួសព្រះគ្រីស្ទថា ចូរឲ្យបានជាមេត្រីនឹងព្រះចុះ។ ២កូរិនថូស ៥:២០ ការប្រកួតប្រជែង ក្នុងសម័យអ៊ីនធឺណិត កាន់តែមានសភាពធ្ងន់ធ្ងរ។ ក្រុមហ៊ុនទាំងឡាយកំពុងស្វែងរកវិធីសាស្រ្តដ៏ប៉ិនប្រសប់ ដើម្បីទាក់ទាញអតិថិជនរបស់ខ្លួន។ ខ្ញុំសូមលើកយកឧទាហរណ៍របស់ក្រុមហ៊ុនរថយន្តស៊ូបារុ(Subaru)។ គេឮល្បីថា ម្ចាស់រថយន្តស៊ូបារុមានការពេញចិត្តរថយន្តម៉ាកស៊ូបារុខ្លាំងណាស់ បានជាពួកគេមិនងាយប្តូរចិត្តទៅប្រើប្រាស់រថយន្តម៉ាកផ្សេងឡើយ។ ដូចនេះ ក្រុមហ៊ុនរថយន្តស៊ូបារុក៏បានអញ្ជើញអ្នកគាំទ្រផលិតផលរថយន្តស៊ូបារុខ្លាំងបំផុត ឲ្យធ្វើជាទូតសុឆន្ទៈរបស់ក្រុមហ៊ុន។ វិបសាយរបស់ក្រុមហ៊ុននេះបានចេញផ្សាយព័ត៌មានថា “ទូតសុឆន្ទៈរបស់រថយន្តស៊ូបារុ គឺជាមនុស្សមួយក្រុម ដែលបានស្ម័គ្រចិត្តប្រើទឹកចិត្តស្រឡាញ់ និងភាពក្លៀវក្លារបស់ខ្លួន ដើម្បីជួយផ្សព្វផ្សាយផលិតរថយន្តស៊ូបារុ និងជួយកសាងអនាគតរបស់យីហោឡានមួយនេះឲ្យកាន់តែជោគជ័យ”។ ក្រុមហ៊ុននេះចង់ឲ្យម្ចាស់រថយន្តស៊ូបារុទាំងឡាយ ក្លាយជាផ្នែកមួយនៃអត្តសញ្ញាណរបស់មនុស្ស ពោលគឺអត្តសញ្ញាណដែលពួកគេស្រឡាញ់យ៉ាងខ្លាំង បានជាពួកគេមិនអាចឃាត់ចិត្តខ្លួនឯងមិនឲ្យផ្សព្វផ្សាយផលិតផលរថយន្តស៊ូបារុបាន។ ក្នុងបទគម្ពីរ ២កូរិនថូស ជំពូក៥ សាវ័កប៉ុលបានពិពណ៌នា អំពីទូតមួយប្រភេទទៀត ដែលអញ្ជើញអ្នកដទៃឲ្យដើរតាមព្រះយេស៊ូវ។ គាត់ថា “ដូច្នេះ ដែលស្គាល់សេចក្តីស្ញែងខ្លាចរបស់ព្រះអម្ចាស់ នោះយើងខ្ញុំក៏ខំបញ្ចុះបញ្ចូលមនុស្សឲ្យជឿ”(ខ.១១)។ សាវ័កប៉ុលបានមានប្រសាសន៍ទៀតថា “គឺពីដំណើរដែលព្រះទ្រង់គង់ក្នុងព្រះគ្រីស្ទ កំពុងផ្សះផ្សាលោកីយ៍នឹងព្រះអង្គទ្រង់ ឥតប្រកាន់ទោសគេទៀត ហើយទ្រង់បានប្រគល់ព្រះបន្ទូល ពីការផ្សះផ្សានោះមកយើងខ្ញុំ។ ដូច្នេះ យើងខ្ញុំជាទូតដំណាងព្រះគ្រីស្ទ ហាក់ដូចជាព្រះទ្រង់អង្វរដោយសារយើងខ្ញុំ គឺយើងខ្ញុំអង្វរគេជំនួសព្រះគ្រីស្ទថា ចូរឲ្យបានជាមេត្រីនឹងព្រះចុះ”(ខ.១៩-២០)។ ក្រុមហ៊ុនជាច្រើនបានសន្យាថា ផលិតផលរបស់ខ្លួននឹងបំពេញតម្រូវការដ៏ជ្រាលជ្រៅ ដោយផ្តល់ឲ្យយើងនូវសុភមង្គល ភាពពេញលេញ និងគោលបំណង។ មានតែព្រះរាជសារនៃការផ្សះផ្សាដែលព្រះអង្គបានប្រទានអ្នកជឿព្រះយេស៊ូវប៉ុណ្ណោះ ដែលជាដំណឹងល្អដ៏ពិត។ ហើយយើងមានឯកសិទ្ធិនៅក្នុងការផ្សព្វផ្សាយព្រះរាជសារនេះ ទៅកាន់លោកិយដែលកំពុងអស់សង្ឃឹម។—Adam R. Holz
តើការធ្វើជាទូតព្រះគ្រីស្ទមានន័យយ៉ាងណាខ្លះ ចំពោះអ្នក? តើអ្នកអាចរស់នៅតាមការត្រាស់ហៅឲ្យធ្វើជាទូតព្រះគ្រីស្ទ យ៉ាងដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការត្រាស់ហៅទូលបង្គំឲ្យធ្វើជាទូតរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ៩៧-៩៩ និង រ៉ូម ១៦