សាររបស់ពួកហោរា
ដោយTim Gustafson
September 14, 2023
សូមអាន : យេរេមា ២៨:២-៤,១០-១៦ ឯព្រះដែលពីដើម ទ្រង់មានព្រះបន្ទូលនឹងពួកឰយុកោ ដោយពួកហោរា …នៅជាន់ក្រោយបង្អស់នេះ ទ្រង់បានមានព្រះបន្ទូលនឹងយើងរាល់គ្នា ដោយសារព្រះរាជបុត្រាវិញ។ ហេព្រើរ ១:១-២ មុនពេលការប្រកួតកីឡាវាយកូនបាល់បេសប៊លអន្តរជាតិ ចាប់ផ្តើម នៅឆ្នាំ១៩០៦ លោកយូ ហ្វ៊ូឡឺតុន(Hugh Fullerton) ជាអ្នកនិពន្ធអំពីកីឡា បានធ្វើការព្យាករណ៍ទុកជាមុន។ គេបានរំពឹងថា ក្រុមឈីកាហ្គោ ខាប់(Chicago Cubs) នឹងឈ្នះការប្រកួត តែគាត់បានព្យាករណ៍ថា ក្រុមនេះនឹងចាញ់ការប្រកួតក្នុងគូរទី១និងទី៣ ហើយនឹងឈ្នះការប្រកួតគូរទី២។ ហើយភ្លៀងនឹងធ្លាក់ចុះមក នៅក្នុងការប្រកួតគូរទី៤។ គាត់បានព្យាករណ៍ត្រូវទាំងអស់។ បន្ទាប់មក នៅឆ្នាំ១៩១៩ គាត់បានប្រើជំនាញវិភាគរបស់គាត់ ហើយក៏បានធ្វើការសន្និដ្ឋានថា មានកីឡាករណាខ្លះ ដែលមានចេតនាធ្វើឲ្យក្រុមរបស់ខ្លួនចាញ់ការប្រកួតអន្តរជាតិ។ គាត់បានសង្ស័យថា ពួកគេបានទទួលសំណូកពីអ្នកភ្នាល់បាល់។ មនុស្សជាទូទៅក៏បានសើចចម្អកឲ្យគាត់។ តែលើកនេះ គាត់បានព្យាករណ៍ត្រូវទៀត។ លោកហ្វ៊ូឡឺតុនមិនមែនជាហោរានោះទេ គឺគ្រាន់តែជាមនុស្សឆ្លាតវ័យម្នាក់ ដែលអាចព្យាករណ៍ហេតុការណ៍ ផ្អែកទៅលើការវិភាគទៅលើភស្តុតាង។ តែលោកយេរេមាជាហោរាដ៏ពិតរបស់ព្រះ ដែលទំនាយរបស់គាត់ តែងតែបានសម្រេច។ គាត់បានយកនឹម និងខ្សែពាក់លើកគាត់ ហើយប្រកាសប្រាប់នគរយូដាឲ្យចុះចាញ់ចក្រភពបាប៊ីឡូន ដើម្បីឲ្យមានជីវិតរស់(យេរេមា ២៧:២,១២)។ លោកហាណានា ជាហោរាក្លែងក្លាយ ក៏បានថ្លែងទំនាយផ្ទុយនឹងគាត់ ហើយក៏បានបំពាក់នឹមនោះ(២៨:២-៤,១០)។ ហោរាយេរេមាក៏បានប្រាប់លោកហាណានាថា “នែ ហាណានាចូរស្តាប់ឥឡូវចុះ ព្រះយេហូវ៉ាមិនបានចាត់ប្រើអ្នកទេ” ហើយក៏បានថ្លែងទំនាយថា លោកហាណានានឹងត្រូវស្លាប់ក្នុងឆ្នាំនេះ(ខ.១៥,១៦)។ ២ខែក្រោយមក លោកហាណានាក៏បានស្លាប់(ខ.១៧)។ ព្រះគម្ពីរសញ្ញាថ្មីបានចែងថា “ឯព្រះដែលពីដើម ទ្រង់មានព្រះបន្ទូលនឹងពួកឰយុកោ ដោយពួកហោរា …នៅជាន់ក្រោយបង្អស់នេះ ទ្រង់បានមានព្រះបន្ទូលនឹងយើងរាល់គ្នា ដោយសារព្រះរាជបុត្រាវិញ”(ហេព្រើរ ១:១-២)។ ព្រះទ្រង់នៅតែមានបន្ទូលជាសេចក្តីពិតមកកាន់យើង តាមរយៈព្រះជន្ម ការសុគត និងការមានព្រះជន្មរស់ឡើងវិញរបស់ព្រះយេស៊ូវ និងតាមរយៈព្រះគម្ពីរ និងការដឹកនាំរបស់ព្រះវិញ្ញាណបរិសុទ្ធ។—Tim Gustafson
តើអ្នកមិនយល់ព្រះបន្ទូលត្រង់ចំណុចណាខ្លះ? តើការស្តាប់តាមព្រះបន្ទូលរបស់ព្រះយេស៊ូវក្នុងព្រះគម្ពីរ បានជួយឲ្យយល់ច្បាស់យ៉ាងណាខ្លះ?
ឱព្រះវរបិតា ទូលបង្គំនៅខ្វះចំណេះដឹងខាងព្រះបន្ទូល សូមព្រះវិញ្ញាណព្រះអង្គដឹកនាំទូលបង្គំ ចូលក្នុងសេចក្តីពិតក្នុងព្រះគម្ពីរ។ សូមព្រះអង្គជួយទូលបង្គំឲ្យទុកចិត្តព្រះអង្គ នៅក្នុងការអ្វីដែលទូលបង្គំមិនអាចមើលឃើញ។
គម្រោងអានរយៈពេល១ឆ្នាំ : សុភាសិត ២២-២៤ និង ២កូរិនថូស ៨