សូមអាន : និក្ខមនំ ២៨:១-៨,៤០-៤១
ត្រូវឲ្យធ្វើសំលៀកបំពាក់បរិសុទ្ធ សំរាប់អើរ៉ុន បងឯង សំរាប់ជាកិត្តិយស ហើយនឹងភាពលំអ។ និក្ខមនំ ២៨:២
សិល្បករអង់គ្លេសឈ្មោះ ខឺកស្ទី មែកឡូដ(Kirstie Macleod) គឺជាស្ថាបនិករបស់កម្មវិធីរ៉ូបក្រហម ដែលមានការដាក់តាំងបង្ហាញជាច្រើនអំពីកម្មវិធីនេះ នៅតាមបណ្តាសារមន្ទីរ និងវិចិត្រសាលនៅទូទាំងពិភពលោក។ អស់រយៈពេលជាង៣០ឆ្នាំមកហើយ ដែលក្រណាត់សូត្រពណ៌ក្រហមក្រមៅ ៨៤ដុំ បានធ្វើដំណើរទូទាំងពិភពលោក ដើម្បីឲ្យស្រ្តីជាង៣រយនាក់(និងបុរសមួយចំនួនតូច) ប៉ាក់រូបពីលើយ៉ាងស្រស់ស្អាត។ បន្ទាប់មក គេក៏បានយកក្រណាត់ដែលបានប៉ាក់ហើយនោះ ទៅជាធ្វើជារូបសម្រាប់កូនក្រមុំ ដោយបានបង្កប់នូវប្រវត្តិរបស់សិល្បករនីមួយៗ ដែលបានរួមចំណែកក្នុងកម្មវិធីនេះ ដែលភាគច្រើនជាជនពិការ និងអ្នកក្រ។
រ៉ូបពណ៌ក្រហមនោះ បានធ្វើឲ្យខ្ញុំនឹកចាំ អំពីសំលៀកបំពាក់បរិសុទ្ធ របស់លោកអើរ៉ុន និងកូនចៅជំនាន់ក្រោយរបស់គាត់ ដែលជាងកាត់ដេរដ៏ចំណានជាច្រើនបានផលិតសម្រាប់គាត់(និក្ខមនំ ២៨:៣)។ ការបង្គាប់របស់ព្រះអម្ចាស់ជាលម្អិត អំពីការកាត់ដេរសំលៀកបំពាក់ពួកសង្ឃ ក៏បានរាប់បញ្ចូលការតុបតែងដែលឆ្លុះបញ្ចាំងអំពីប្រវត្តិរបស់ជនជាតិអ៊ីស្រាអែល ដែលមានដូចជាការឆ្លាក់ឈ្មោះរបស់ពូជអំបូរទាំង១២ នៅលើថ្មអូនីក្ស សម្រាប់ពាក់ពីលើស្មាពួកសង្ឃ ទុកជាសេចក្តីរំឭកនៅចំពោះព្រះយេហូវ៉ា(ខ.១២)។ គេក៏បានធ្វើអាវខ្លី និងខ្សែក្រវាត់ ព្រមទាំងឈ្នួតសំរាប់ពួកគេផងដែរ ដើម្បីជាកិត្តិយស និងជាភាពលំអដល់ពួកគេ ខណៈពេលដែលពួកគេបម្រើព្រះអម្ចាស់ និងដឹកនាំពួកបណ្តាជនថ្វាយបង្គំព្រះអង្គ(ខ.៤០)។
ក្នុងនាមយើងជាអ្នកជឿព្រះយេស៊ូវ នៅគ្រាសញ្ញាថ្មី យើងក៏ជាពួកសង្ឃ ដែលបម្រើព្រះអង្គ និងនាំគ្នាថ្វាយបង្គំព្រះអង្គ(១ពេត្រុស ២:៤-៥,៩) ហើយព្រះយេស៊ូវជាសម្តេចសង្ឃរបស់យើង(ហេព្រើរ ៤:១៤)។ យើងមិនបានស្លៀកពាក់សំលៀកបំពាក់ ដើម្បីសម្គាល់ខ្លួនថា ជាពួកសង្ឃដូចនៅគ្រាសញ្ញាចាស់ តែដោយជំនួយមកពីព្រះអង្គ ចូរយើង “ប្រដាប់កាយ ដោយចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់”(កូល៉ុស ៣:១២)។—Kirsten Holmberg
តើមានលក្ខណៈសម្បត្តិអ្វីខ្លះ ក្នុងបទគម្ពីរកូល៉ុស ដែលអ្នកត្រូវការខ្លាំងបំផុត នៅថ្ងៃនេះ? តើព្រះទ្រង់បានប្រទានអ្នក នូវលក្ខណៈសម្បត្តិអ្វីខ្លះ ដើម្បីឲ្យអាចបម្រើព្រះអង្គ?
ឱព្រះយេស៊ូវ សូមព្រះអង្គបំពាក់ទូលបង្គំ ដោយសេចក្តីអាណិត សប្បុរស សុភាព សំឡូត និងចិត្តអត់ធ្មត់។
គម្រោងអានរយៈពេល១ឆ្នាំ : សុភាសិត ៣០-៣១ និង២កូរិនថូស ១១:១-១៥
