សូមអាន : សុភាសិត ១១:១៥-២៥
មនុស្សដែលមានចិត្តសទ្ធា នឹងបានបរិបូរ ហើយអ្នកណាដែលស្រោចទឹកដល់គេ នោះនឹងបានគេស្រោចទឹកដល់ខ្លួនដែរ។ សុភាសិត ១១:២៥
នៅថ្ងៃចុងក្រោយ នៃការធ្វើដំណើរក្នុងរដ្ឋវីសខុនសិន មិត្តភក្តិរបស់ខ្ញុំបានមកជូនដំណើរខ្ញុំ ជាមួយកូនស្រីរបស់គាត់អាយុ៤ឆ្នាំ ឈ្មោះឃីនស្ល៊ី(Kinslee)។ ឃីនស្ល៊ីបានប្រាប់ខ្ញុំថា នាងមិនចង់ឲ្យខ្ញុំត្រឡប់ទៅវិញទេ។ ខ្ញុំក៏បានឱបនាង ហើយឲ្យផ្លិតមួយទៅនាង ជាផ្លិតក្រណាត់ដែលខ្ញុំបានផាត់ពណ៌ដោយដៃ និងបានប្រមូលទុក។ ខ្ញុំប្រាប់នាងថា ពេលណានាងនឹកខ្ញុំ អ្នកអាចប្រើផ្លិតនេះ ហើយនឹកចាំថា ខ្ញុំស្រឡាញ់នាង។ នាងក៏បានប្រាប់ខ្ញុំថា នាងចង់បានផ្លិតមួយទៀតជាងផ្លិតមួយនេះ ជាផ្លិតធ្វើពីក្រដាសនៅក្នុងកាបូបរបស់ខ្ញុំ។ ខ្ញុំប្រាប់នាងថា ផ្លិតនោះខូចហើយ។ ខ្ញុំចង់ឲ្យផ្លិតដែលល្អជាងគេទៅនាង។ ខ្ញុំមិនបានស្តាយក្រោយទេ ដែលបានឲ្យផ្លិតដែលខ្ញុំចូលចិត្តជាងគេទៅឃីនស្ល៊ី។ ពេលខ្ញុំឃើញនាងសប្បាយចិត្ត ខ្ញុំកាន់តែសប្បាយចិត្ត។ ក្រោយមក ឃីនស្ល៊ីក៏បានប្រាប់ម្តាយនាងថា នាងមិនសប្បាយចិត្ត ពេលបានឃើញខ្ញុំរក្សាទុកផ្លិតដែលបានខូច។ ពួកគេក៏បានផ្ញើផ្លិតថ្មីមួយ ដ៏ប្រណិតមកឲ្យខ្ញុំ។ បន្ទាប់ពីឃីនស្ល៊ីបានឲ្យអំណោយនេះមកខ្ញុំដោយចិត្តសប្បុរសហើយ គាត់ក៏មានអារម្មណ៍សប្បាយចិត្តឡើងវិញ។ ហើយខ្ញុំក៏សប្បាយចិត្តដែរ។
នៅក្នុងពិភពលោកដែលលើកទឹកចិត្តមនុស្សឲ្យធ្វើអ្វីៗដើម្បីបំពេញចិត្តខ្លួនឯង ហើយការពារប្រយោជន៍ផ្ទាល់ខ្លួន យើងងាយនឹងជួបការល្បួងឲ្យប្រមូលទ្រព្យទុកសម្រាប់ខ្លួនឯង ជាជាងរស់នៅដោយចិត្តដែលចូលចិត្តចែករំលែក។ ទោះជាយ៉ាងណាក៏ដោយ ព្រះគម្ពីរបានចែងថា មនុស្សដែល “ចែកផ្សាយទ្រព្យ តែចេះតែចំរើនកើនឡើង”(សុភាសិត ១១:២៤)។ វប្បធម៌របស់យើងឲ្យនិយមន័យថា ភាពសម្បូរសប្បាយគឺជាការមានទ្រព្យសម្បត្តិកាន់តែច្រើនឡើងៗ តែព្រះគម្ពីរបានចែងថា “មនុស្សដែលមានចិត្តសទ្ធា នឹងបានបរិបូរ ហើយអ្នកណាដែលស្រោចទឹកដល់គេ នោះនឹងបានគេស្រោចទឹកដល់ខ្លួនដែរ”(ខ.២៥)។
សេចក្តីស្រឡាញ់ និងសេចក្តីសប្បុរស ដែលគ្មានដែនកំណត់ និងគ្មានលក្ខខណ្ឌរបស់ព្រះ នឹងបន្តបំពេញតម្រូវការយើង។ យើងម្នាក់ៗអាចមានចិត្តដែលចូលចិត្តចែករំលែក ហើយបង្កើតវប្បធម៌នៃការជួយគ្នាបន្តពីម្នាក់ទៅម្នាក់ ព្រោះយើងដឹងថា ព្រះដែលជាអ្នកប្រទានគ្រប់ទាំងអំណោយដែលល្អ មិនដែលហត់នឿយក្នុងការផ្គត់ផ្គង់ជាបរិបូរឡើយ។—Xochitl Dixon
តើសេចក្តីសប្បុរសរបស់អ្នកដទៃ បានជួយអ្នកឲ្យកាន់តែមានភាពជិតស្និទ្ធជាមួយព្រះយេស៊ូវយ៉ាងដូចម្តេចខ្លះ? តើអ្នកអាចចាត់ទុកប្រយោជន៍អ្នកដទៃសំខាន់ជាងប្រយោជន៍ខ្លួនឯង នៅសប្តាហ៍នេះ ដោយរបៀបណា?
ឱព្រះអម្ចាស់ សូមព្រះអង្គជួយទូលបង្គំ ឲ្យចែករំលែកដោយចិត្តសប្បុរស ដូចដែលព្រះអង្គបានប្រទានពរទូលបង្គំ។
គម្រោងអានរយៈពេល១ឆ្នាំ : អេសាយ ៧-៨ និង អេភេសូរ ២
