កូល៉ុស ៣:១២-១៧
ចូរប្រដាប់កាយ ដោយចិត្តក្តួលអាណិត សប្បុរស សុភាព សំឡូត និងចិត្តអត់ធ្មត់ ទុកដូចជាពួកអ្នករើសតាំង ដែលបរិសុទ្ធ ហើយស្ងួនភ្ងាដល់ព្រះចុះ។ កូល៉ុស ៣:១២
តើអ្នកធ្លាប់បានឮគេនិយាយ អំពីការបន្ថយល្បឿនសំលៀកបំពាក់ដែរឬទេ? ចលនានេះផ្តោតទៅលើការប្រឆាំងឧស្សាហ៍កម្មកាត់ដេរឆាប់រហ័ស ដែលផលិតសំលៀកបំពាក់ថោកៗ ដែលគេទិញ ហើយឈប់ប្រើប្រាស់ក្នុងរយៈពេលដ៏ខ្លី។ ក្នុងឧស្សាហ៍កម្មកាត់ដេរឆាប់រហ័សនោះ ម៉ូដសំលៀកបំពាក់ថ្មីៗ បានប្រែក្លាយជាហួសសម័យ បន្ទាប់ពីគេយកមកដាក់លក់ក្នុងហាងមិនទាន់បានយូរប៉ុន្មានផង ដោយប្រ៊ែនមួយចំនួនបានលក់លាងឃ្លាំង នូវផលិតផលរបស់ខ្លួន ក្នុងបរិមាណដ៏ច្រើន ជារៀងរាល់ឆ្នាំ។
ចលនាបន្ថយល្បឿនសំលៀកបំពាក់នេះបានលើកទឹកចិត្តអ្នកប្រើប្រាស់ ឲ្យបន្ថយល្បឿននៃការប្រើប្រាស់សំលៀកបំពាក់ តាមរបៀបផ្សេង។ ជាជាងបណ្តោយខ្លួនឲ្យដេញតាមម៉ូដសំលៀកបំពាក់ទាន់សម័យបំផុតជានិច្ច ចលនានេះបានលើកទឹកចិត្តយើង ឲ្យជ្រើសរើសយកសំលៀកបំពាក់តិចជាងមុន ដែលគេផលិតបានល្អ និងមានភាពសមរម្យ ហើយប្រើបានយូរជាង។
ពេលដែលខ្ញុំគិតអំពីរឿងនេះ ខ្ញុំក៏សួរខ្លួនឯងថា តើខ្ញុំកំពុងតែធ្លាក់ចូលទៅក្នុងផ្នត់គំនិតដែលចូលចិត្តដេញតាមម៉ូដខោអាវថ្មីៗជានិច្ចដែរឬទេ? ទោះជាយ៉ាងណាក៏ដោយ បទគម្ពីរកូល៉ុស ជំពូក៣ បានចែងថា ការផ្លាស់ប្រែពិតប្រាកដក្នុងព្រះគ្រីស្ទ មិនកើតមានភ្លាមៗ ហើយឆាប់រលាយបាត់ទៅវិញនោះទេ។ តែការផ្លាស់ប្រែពិតប្រាកដជាការផ្លាស់ប្តូរដ៏ស្ងាត់ស្ងៀម បន្តិចម្តងៗ ក្នុងព្រះគ្រីស្ទ។
ដូចនេះ ជាជាងដេញតាមម៉ូដខោអាវថ្មីៗរបស់លោកិយ ដើម្បីលម្អតែរូបកាយរបស់យើង យើងអាចងាកមកប្រដាប់កាយរបស់យើង ដោយសំលៀកបំពាក់ដែលព្រះវិញ្ញាណប្រទាន ដែលមានដូចជា “ចិត្តក្ដួលអាណិត សប្បុរស សុភាព សំឡូត និងចិត្តអត់ធ្មត់”(ខ.១២)។ យើងអាចរៀនឲ្យមានចិត្តអត់ធ្មត់ ចំពោះគ្នាទៅវិញទៅមក ក្នុងការធ្វើដំណើរមួយជំហានម្តងៗ ដោយព្រះគ្រីស្ទកែប្រែចិត្តរបស់យើង ជាការធ្វើដំណើរឆ្ពោះទៅរកសន្តិភាពដ៏ស្ថិតស្ថេរ(ខ.១៥)។—Monica La Rose
តើអ្នកបានជួបការល្បួង ឲ្យដេញតាមភាពទាន់សម័យដូចម្តេចខ្លះ? តើមានអ្វីជួយអ្នក ឲ្យរកឃើញភាពស្កប់ចិត្តក្នុងព្រះយេស៊ូវ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានជួយទូលបង្គំឲ្យឈប់ស្រឡាញ់លោកិយ ហើយងាកមកទទួលសនិ្តភាព នៅក្នុងការដើរយ៉ាងស្ងាត់ស្ងៀមជាមួយព្រះអង្គ។
To learn more about how to develop a biblical worldview, visit ODBU.org/topic/WE102-01-lecture.
គម្រោងអានព្រះគម្ពីររយៈពេល១ឆ្នាំ : អេសាយ ៣២-៣៣ និង កូល៉ុស ១
