សូមបើកភ្នែកនៃដួងចិត្តទូលបង្គំ
ដោយXochitl Dixon
October 11, 2023
អេភេសូរ ១:១៥-២៣ សូមឲ្យព្រះនៃព្រះយេស៊ូវគ្រីស្ទ ….បានប្រទានឲ្យអ្នករាល់គ្នាបានព្រះវិញ្ញាណ ដែលប្រោសឲ្យមានប្រាជ្ញា ហើយក៏បើកសំដែង ឲ្យដឹងពីដំណើរស្គាល់ទ្រង់។ អេភេសូរ ១:១៧ កាលពីឆ្នាំ២០០១ កូនង៉ែតម្នាក់ ឈ្មោះ គ្រីស្ទោហ្វ័រ ដាហ្វលី(Christopher Duffley) បានកើតមិនគ្រប់ខែ ដោយគេមិនមានសង្ឃឹមថា គាត់អាចមានជីវិតរស់បានទេ។ តែគាត់បានរួចផុតពីសេចក្តីស្លាប់ ធ្វើឲ្យក្រុមវេជ្ជបណ្ឌិតមានការភ្ញាក់ផ្អើលយ៉ាងខ្លាំង។ ពេលគាត់មានអាយុ៥ខែ គេក៏បានយកគាត់ទៅដាក់នៅក្នុងមន្ទីរថែទាំកុមារដែលកើតមិនគ្រប់លក្ខណៈ រហូតដល់ពេលដែលអ៊ំស្រីរបស់គាត់យកគាត់ទៅចិញ្ចឹម។ គ្រូបង្រៀនម្នាក់បានដឹងថា គ្រីស្ទោហ្វ័រ ជាក្មេងប្រុសអាយុ៤ឆ្នាំ ដែលមានសម្លេងល្អឥតខ្ចោះ ទោះគាត់ពិការភ្នែក ហើយមានជំងឺអូទីហ្សិមក៏ដោយ។ ៦ឆ្នាំក្រោយមក គ្រីស្ទោហ្វ័រក៏បានឡើងច្រៀង បទចម្រៀងពិសេស នៅក្នុងកម្មវិធីថ្វាយបង្គំនៅព្រះវិហារ មានចំណងជើងថា “សូមព្រះអង្គបើកភ្នែកនៃដួងចិត្តទូលបង្គំ”។ គេបានថតសកម្មភាពច្រៀងរបស់គាត់ បង្ហោះនៅតាមបណ្ដាញអ៊ីនធឺណិត ហើយមានមនុស្សរាប់លាននាក់បានទស្សនាវីដេអូនោះ។ នៅឆ្នាំ២០២០ គ្រីស្ទោហ្វ័របានចែកចាយអំពីគោលដៅរបស់គាត់ ដែលចង់ធ្វើការបម្រើព្រះ ក្នុងនាមជាអ្នកលើកទឹកចិត្តជនពិការ។ គាត់បានបន្តបង្ហាញឲ្យគេដឹងថា លទ្ធភាពដែលគាត់អាចធ្វើបានគឺគ្មានដែនកំណត់ឡើយ នៅពេលណាគាត់បើកភ្នែកនៃដួងចិត្តគាត់ មើលទៅផែនការរបស់ព្រះអង្គ។ សាវ័កប៉ុលបានកោតសរសើរសេចក្តីជំនឿរបស់ពួកជំនុំនៅទីក្រុងអេភេសូរ(អេភេសូរ ១:១៥-១៦)។ គាត់បានទូលសូមព្រះទ្រង់ប្រទានពួកគេនូវ “ព្រះវិញ្ញាណ ដែលប្រោសឲ្យមានប្រាជ្ញា ហើយក៏បើកសំដែង ឲ្យដឹងពីដំណើរស្គាល់ទ្រង់”(ខ.១៧)។ គាត់ក៏បានអធិស្ឋានសូមឲ្យភ្នែករបស់ពួកគេបានភ្លឺ ឬបើកឡើង ដើម្បីឲ្យពួកគេស្គាល់សេចក្តីសង្ឃឹម និងមរដក ដែលព្រះទ្រង់សន្យាប្រទានរាស្រ្តព្រះអង្គ(ខ.១៨)។ ខណៈពេលដែលយើងទូលសូមព្រះទ្រង់បើកសម្ដែងព្រះអង្គទ្រង់ដល់យើង យើងអាចស្គាល់ព្រះអង្គកាន់តែច្បាស់ ហើយអាចប្រកាសអំពីព្រះនាម ព្រះចេស្តា និងអំណាចរបស់ព្រះអង្គ ដោយទំនុកចិត្ត(ខ.១៩-២៣)។ ដោយជំនឿចំពោះព្រះយេស៊ូវ និងសេចក្តីស្រឡាញ់ចំពោះរាស្រ្តព្រះអង្គទាំងអស់ យើងអាចរស់នៅ តាមរបៀបដែលបង្ហាញឲ្យគេដឹងថា គ្មានអ្វីដែលព្រះអង្គធ្វើមិនបាននោះឡើយ ខណៈពេលដែលយើងទូលសូមព្រះអង្គបើកភ្នែកនៃដួងចិត្តយើង។—Xochitl Dixon
តើព្រះទ្រង់បានជួយអ្នកជម្នះឧបសគ្គ និងដែនកំណត់របស់អ្នក យ៉ាងដូចម្តេចខ្លះ? តើការស្គាល់សេចក្តីពិត ចារិកលក្ខណៈ និងសេចក្តីស្រឡាញ់របស់ព្រះអង្គ បានផ្លាស់ប្តូររបៀបដែលអ្នកឆ្លងកាត់បញ្ហាប្រឈមដូចម្តេចខ្លះ?
ឱព្រះដ៏មានចេស្តា និងសេចក្តីមេត្តា សូមព្រះអង្គបើកភ្នែកនៃដួងចិត្តទូលបង្គំ ដើម្បីឲ្យទូលបង្គំដឹង ស្រឡាញ់ និងរស់នៅថ្វាយព្រះអង្គ ដោយសេចក្តីជំនឿដ៏ក្លាហាន ដែលនាំអ្នកដទៃឲ្យថ្វាយបង្គំព្រះអង្គ។
For further study, read Why Should I Trust God? at DiscoverySeries.org.
គម្រោងអានព្រះគម្ពីររយៈពេល១ឆ្នាំ : អេសាយ ៣៧-៣៨ និង កូល៉ុស ៣