ការចុះចូលបំណងព្រះទ័យព្រះអង្គ
ដោយMarvin Williams
October 22, 2023
ទំនុកដំកើង ៣៧:៥-៦ ចូរទុកដាក់ផ្លូវអ្នកនឹងព្រះយេហូវ៉ាចុះ ថែមទាំងទុកចិត្តដល់ទ្រង់ផង នោះទ្រង់នឹងប្រោសឲ្យបានសំរេច។ ទំនុកដំកើង ៣៧:៥ លោកយ៉ូណាថាន រូមី(Jonathan Roumie) ជាតារាភាពយន្ត ដែលបានដើរតួជាព្រះយេស៊ូវ ក្នុងខ្សែភាពយន្តភាគដ៏ជោគជ័យមួយ មានចំណងជើងថា ពួករើសតាំង ដែលផ្អែកទៅលើកណ្ឌគម្ពីរដំណឹងល្អ។ នៅខែឧសភា ឆ្នាំ២០១៨ គាត់រៀនសូត្របានថា ព្រះទ្រង់មិនសព្វព្រះទ័យនឹងជួយមនុស្សដែលជួយខ្លួនឯងនោះទេ តែព្រះអង្គជួយអ្នកដែលទុកចិត្ត និងពឹងផ្អែកលើព្រះអង្គ។ គាត់បានរស់នៅក្នុងទីក្រុងឡូស អ៊ែនជេលេស បាន៨ឆ្នាំ ហើយស្ទើរតែមិនមានលុយជាប់ខ្លួនសោះ គឺគ្រាន់តែមានអាហារគ្រប់គ្រាន់ពីមួយថ្ងៃទៅមួយថ្ងៃ ហើយក៏រកការងារមិនបាន។ គាត់មិនដឹងថា គាត់អាចជម្នះបញ្ហានេះដោយរបៀបណាទេ ដូចនេះ គាត់ក៏បានថ្វាយចិត្ត និងការងាររបស់គាត់ដាច់ដល់ព្រះអម្ចាស់។ គាត់ក៏បានអធិស្ឋានថា “ទូលបង្គំសូមចុះចូលបំណងព្រះទ័យព្រះអង្គ។ ទូលបង្គំសូមចុះចូលបំណងព្រះទ័យព្រះអង្គ”។ នៅពេលក្រោយមក ក្នុងថ្ងៃដដែលនោះ គាត់ក៏ទទួលបានមូលប្បទានប័ត្រ៤សន្លឹកនៅក្នុងប្រអប់សំបុត្ររបស់គាត់ ហើយ៣ខែក្រោយមក គាត់ក៏បានដើរតួជាព្រះយេស៊ូវ ក្នុងរឿងពួករើសតាំង។ លោករូមីក៏បានដឹងថា ព្រះទ្រង់ជួយមនុស្សដែលទុកចិត្តព្រះអង្គ។ អ្នកនិពន្ធបទគម្ពីរទំនុកដំកើង បានបង្រៀនយើងឲ្យថ្វាយអ្វីៗទាំងអស់ដល់ព្រះអង្គ ជាជាងច្រណែន និងមានការភ័យខ្លាច ចំពោះមនុស្សអាក្រក់(ទំនុកដំកើង ៣៧:១)។ ព្រះអង្គនឹងដឹកនាំការរស់នៅ និងប្រទានយើងនូវសេចក្តីសុខសាន្ត(ខ.៥-៦) ពេលណាជីវិតរបស់យើង មានព្រះអង្គជាចំណុចកណ្តាល ដោយទុកចិត្តព្រះអង្គ ហើយប្រព្រឹត្តការល្អ និងយកព្រះអង្គជាសេចក្តីអំណររបស់យើង(ខ.៣-៤) ហើយថ្វាយព្រះអង្គ នូវបំណងចិត្ត បញ្ហា ការថប់បារម្ភ និងរឿងដែលកើតឡើងក្នុងជីវិតរាល់ថ្ងៃ។ ក្នុងនាមយើងជាអ្នកជឿព្រះយេស៊ូវ យើងចាំបាច់ត្រូវទូលសូមឲ្យព្រះអង្គរៀបចំជីវិតយើង តាមបំណងព្រះទ័យព្រះអង្គ។ ចូរយើងចុះចូល ហើយទុកចិត្តព្រះអង្គ ដើម្បីឲ្យព្រះអង្គធ្វើការក្នុងជីវិតយើង ដោយធ្វើអ្វីដែលចាំបាច់ និងល្អបំផុតសម្រាប់យើង។—Marvin Williams
តើមានផ្នែកណាខ្លះ ក្នុងជីវិតអ្នកដែលអ្នកមិនបានថ្វាយដល់ព្រះ ក្នុងពេលថ្មីៗនេះ? តើការថ្វាយជីវិតអ្នកដល់ព្រះអង្គ នៅថ្ងៃនេះ មានន័យដូចម្តេចចំពោះអ្នក?
ឱព្រះអម្ចាស់ សូមព្រះអង្គជួយទូលបង្គំឲ្យចុះចូលព្រះអង្គ ដោយស្ម័គ្រពីចិត្ត នៅថ្ងៃនេះ ហើយដកពិសោធន៍នឹងព្រះជន្ម និងសេចក្តីសុខសាន្តរបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : យេរេមា ១-២ និង ១ធីម៉ូថេ ៣