ព្រឹក
អ្នកអាចទុកចិត្តព្រះអង្គបាន
ដោយKaren Huang
October 28, 2023
ទំនុកដំកើង ៩:៧-១០ ឯអស់អ្នកដែលស្គាល់ព្រះនាមទ្រង់ គេនឹងទុកចិត្តដល់ទ្រង់។ ទំនុកដំកើង ៩:១០ កាលឆ្មាខ្ញុំឈ្មោះមីគគី(Mickey) មានជំងឺឈឺភ្នែក ខ្ញុំបានបន្តក់ថ្នាំភ្នែកឲ្យវារៀងរាល់ថ្ងៃ។ ពេលដែលខ្ញុំដាក់វានៅលើឡាបូលាងដៃ ក្នុងបន្ទប់ទឹក វាក៏បានអង្គុយមើលមកខ្ញុំ ដោយកែវភ្នែកបង្ហាញការភ័យខ្លាច ហើយបានត្រៀមខ្លួនដើម្បីទទួលថ្នាំបន្តក់ភ្នែក។ ខ្ញុំក៏បានសរសើរវាថា “ឆ្មាល្អ”។ ទោះវាមិនយល់ថា ខ្ញុំកំពុងធ្វើអ្វីក៏ដោយ វាមិនបានលោតចុះពីឡាបូលាងដៃ គ្រហឹមដាក់ខ្ញុំ ឬខ្វាចដៃខ្ញុំទេ។ ផ្ទុយទៅវិញ វាបានត្រដុសខ្លួនវានឹងខ្ញុំកាន់តែខ្លាំង ព្រោះវាដឹងថា វាអាចទុកចិត្តខ្ញុំ។ កាលស្តេចដាវីឌនិពន្ធបទគម្ពីរទំនុកដំកើងជំពូក៩ ទ្រង់ប្រាកដជាបានដកពិសោធន៍ជាមួយសេចក្តីស្រឡាញ់ និងសេចក្តីស្មោះត្រង់របស់ព្រះអម្ចាស់ ជាច្រើនមកហើយ។ ទ្រង់បានងាកទៅរកព្រះអម្ចាស់ ដើម្បីទទួលការការពារឲ្យរួចផុតពីខ្មាំងសត្រូវទ្រង់ ហើយព្រះអម្ចាស់ក៏បានជួយទ្រង់(ខ.៣-៦)។ ក្នុងអំឡុងពេលដែលស្តេចដាវីឌត្រូវការជំនួយ ព្រះអម្ចាស់មិនបានធ្វើឲ្យទ្រង់ខកចិត្តឡើយ។ ជាលទ្ធផល ស្តេចដាវីឌបានស្គាល់ព្រះអម្ចាស់កាន់តែច្បាស់។ ទ្រង់ជ្រាបថា ព្រះអម្ចាស់មានព្រះចេស្តា សុចរិត មានសេចក្តីស្រឡាញ់ ហើយស្មោះត្រង់។ ហេតុនេះហើយ ស្តេចដាវីឌបានទុកចិត្តព្រះអម្ចាស់។ ទ្រង់ជ្រាបថា ទ្រង់អាចទុកចិត្តព្រះអម្ចាស់បាន។ ខ្ញុំបានមើលថែឆ្មាខ្ញុំ ពេលវាមានជំងឺច្រើនដងហើយ ចាប់តាំងពីពេលយប់ដែលខ្ញុំបានឃើញវា ជាកូនឆ្មាដែលកំពុងស្រេកឃ្លានអាហារនៅលើចិញ្ចើមផ្លូវ។ វាដឹងថា វាអាចទុកចិត្តខ្ញុំ ទោះវាមិនយល់ អំពីការអ្វីដែលខ្ញុំកំពុងធ្វើសម្រាប់វាក៏ដោយ។ ស្រដៀងគ្នានេះដែរ ការនឹកចាំពីសេចក្តីស្មោះត្រង់ដែលព្រះអង្គមានចំពោះយើង និងចរិយាសម្បត្តិរបស់ព្រះអង្គ អាចជួយឲ្យយើងទុកចិត្តព្រះអង្គ ពេលណាយើងមិនអាចយល់អំពីការអ្វីដែលព្រះអង្គកំពុងធ្វើ។ ចូរយើងបន្តទុកចិត្តព្រះអង្គ ក្នុងពេលដ៏ពិបាកក្នុងជីវិតយើង។—Karen Huang
ចូរនឹកឃើញពេលដ៏ពិបាក ដែលព្រះទ្រង់បានបង្ហាញសេចក្តីស្រឡាញ់ និងសេចក្តីស្មោះត្រង់របស់ព្រះអង្គ។ តើអ្នករៀនសូត្របានអ្វីខ្លះទៀត អំពីចារិកលក្ខណៈរបស់ព្រះអង្គ? តើការនេះអាចលើកទឹកចិត្តអ្នកដូចម្តេចខ្លះ នៅថ្ងៃនេះ?
ឱព្រះវរបិតា ព្រះអង្គតែងតែស្មោះត្រង់ជានិច្ច។ សូមព្រះអង្គជួយទូលបង្គំឲ្យទុកចិត្តព្រះអង្គ។ សូមឲ្យពេលដ៏ពិបាកបាននាំទូលបង្គំចូលទៅជិតព្រះអង្គកាន់តែខ្លាំង។
គម្រោងអានព្រះគម្ពីររយៈពេល១ឆ្នាំ : យេរេមា ១៨-១៩ និង ២ធីម៉ូថេ ៣
ប្រភេទ
ល្ងាច
ពេលដែលព្រះទ្រង់មិនបានសម្រេចព្រះទ័យដែលទ្រង់បានបង្ហាញ
ដោយJohn Piper
October 28, 2023
គេមិនព្រមស្តាប់តាមឪពុកទេ ព្រោះព្រះយេហូវ៉ាទ្រង់សព្វព្រះហឫទ័យនឹងប្រហារជីវិតគេចោល។(១សាំយ៉ូអែល ២:២៥) ពួកកូនប្រុសរបស់លោកអេលីមិនព្រមស្តាប់បង្គាប់តាមគាត់ ពេលដែលគាត់ស្តីបន្ទោសពួកគេ ដោយសារពួកគេបានប្រព្រឹត្តអំពើបាប។ បទគម្ពីរនេះ បានផ្តល់ឲ្យនូវការបង្រៀនបីយ៉ាង សម្រាប់ជីវិតយើង។ ១) មនុស្សអាចប្រព្រឹត្តអំពើបាបអស់ពេលយ៉ាងយូរ និងធ្ងន់ធ្ងរយ៉ាងខ្លាំង ដល់ថ្នាក់ព្រះអម្ចាស់នឹងមិនប្រទានការប្រែចិត្ត។ ហេតុនេះហើយបានជាសាវ័កប៉ុលបានប្រើយើង ឲ្យប្រដៅតម្រង់អ្នកដែលបានប្រព្រឹត្តបាបយ៉ាងដូចនោះ “ក្រែងព្រះទ្រង់នឹងបណ្តាលឲ្យគេប្រែចិត្ត” តែគាត់មិនបានថា ព្រះអង្គ “មុខជាប្រទានគេនូវការប្រែចិត្ត”នោះឡើយ(២ធីម៉ូថេ ២:២៥)។ ជីវិតដែលរស់នៅក្នុងអំពើបាប អាច“ហួសពេល” ដែលត្រូវប្រែចិត្ត។ គឺដូចដែលបទគម្ពីរហេព្រើរ ១២:១៧ បានចែងអំពីលោកអេសាវថា “ទោះបើគាត់ខំស្វែងរក ទាំងស្រក់ទឹកភ្នែកក៏ដោយ គង់តែរកផ្លូវប្រែចិត្តមិនឃើញទេ”។ គាត់បានហួសពេល មិនអាចប្រែចិត្តបាន។ ការនេះមិនមានន័យថា បុគ្គលដែលពិតជាបានប្រែចិត្ត បន្ទាប់ពីបានរស់នៅក្នុងអំពើបាបពេញមួយជីវិត មិនអាចឲ្យព្រះទ្រង់សង្រ្គោះនោះទេ។ ពួកគេពិតជាអាច ហើយនឹងបានសង្រ្គោះ។ ព្រះទ្រង់មានសេចក្តីមេត្តាកុរណា លើសពីការរំពឹងគិតរបស់យើង។ ចូរយើងនឹកចាំ អំពីចោរដែលជាប់ឆ្កាង ជាមួយព្រះយេស៊ូវ។ កាលនោះ ព្រះអង្គបានមានបន្ទូលទៅគាត់ថា “ខ្ញុំប្រាប់អ្នកជាប្រាកដថា ថ្ងៃនេះ អ្នកនឹងនៅក្នុងស្ថានបរមសុខជាមួយនឹងខ្ញុំដែរ”(លូកា ២៣:៤៣)។ ២) ជួនកាល ព្រះទ្រង់បានបន្តអនុញ្ញាតឲ្យមនុស្សដែលកំពុងប្រព្រឹត្តបាប នៅបន្តការប្រព្រឹត្តរបស់ខ្លួនទៀត។ គឺដូចមានសេចក្តីចែងថា “គេមិនព្រមស្តាប់តាមឪពុកទេ ព្រោះព្រះយេហូវ៉ាទ្រង់សព្វព្រះហឫទ័យនឹងប្រហារជីវិតគេចោល”។ កាលស្តាប់តាមឪពុករបស់ពួកគេ គឺជាទង្វើដ៏ត្រឹមត្រូវ ប៉ុន្តែ ពួកគេមិនព្រមធ្វើ។ តើហេតុអ្វី? គឺពីព្រោះ “ព្រះយេហូវ៉ាទ្រង់សព្វព្រះហឫទ័យនឹងប្រហារជីវិតគេចោល”។ មូលហេតុដែលពួកគេមិនបានស្តាប់បង្គាប់តាមឪពុករបស់ពួកគេ គឺដោយសារព្រះទ្រង់មានគោលបំណងផ្សេងទៀត សម្រាប់ពួកគេ ហើយក៏បានបណ្តោយឲ្យពួកគេបន្តប្រព្រឹត្តអំពើបាប រហូតដល់ស្លាប់។ ៣) ជួនកាល ការអធិស្ឋានសូមព្រះអង្គសម្រេចតាមបំណងព្រះទ័យដែលព្រះអង្គបានបង្ហាញ នឹងមិនបានទទួលការឆ្លើយតប ព្រោះព្រះទ្រង់បានសម្រេចព្រះទ័យធ្វើអ្វីមួយផ្សេងពីនោះ ដើម្បីសម្រេចគោលបំណងដ៏បរិសុទ្ធ និងប្រកបដោយប្រាជ្ញា។ ខ្ញុំសន្និដ្ឋានថា លោកអេលីបានអធិស្ឋានសូមឲ្យពួកកូនប្រុសគាត់ប្រែចិត្ត។ គាត់គួរតែអធិស្ឋានដូចនេះឯង។ ប៉ុន្តែ ព្រះអង្គបានសម្រេចព្រះទ័យប្រហារជីវិតពួកគេ បានជាពួកគេមិនបានស្តាប់បង្គាប់។ ពេលណាមានរឿងបែបនេះកើតឡើង (ដែលយើងមិនបានដឹងជាមុន ជាធម្មតា) ខណៈពេលដែលយើងស្រែករកព្រះ សូមឲ្យគេផ្លាស់ប្រែ ពេលខ្លះព្រះអង្គមិនឆ្លើយតបថា ព្រះអង្គមិនមានក្តីស្រឡាញ់នោះទេ តែព្រះអង្គតបថា ព្រះអង្គមានគោលបំណងប្រកបដោយប្រាជ្ញា និងសេចក្តីបរិសុទ្ធ នៅក្នុងការបណ្តោយឲ្យគេបន្តប្រព្រឹត្តបាបនោះទៀត ដោយគ្មានការប្រែចិត្ត។ យើងប្រហែលមិនយល់អំពីគោលបំណងរបស់ព្រះអង្គ តែចូរយើងទុកចិត្តថា ព្រះអង្គជ្រាបថា ព្រះអង្គកំពុងធ្វើអ្វី ហើយព្រះអង្គស្រឡាញ់យើង។