សេចក្តីអាណិតក្នុងការប្រើទូរស័ព្ទ
ដោយSheridan Voysey
October 29, 2023
និក្ខមនំ ៣៤:១-៨ យេហូវ៉ា គឺយេហូវ៉ាដ៏ជាព្រះទ្រង់មានព្រះហឫទ័យមេត្តាករុណា ហើយទន់សន្តោស ទ្រង់យឺតនឹងខ្ញាល់ ហើយមានសេចក្តីសប្បុរស និងសេចក្តីទៀងត្រង់ ជាបរិបូរ។ និក្ខមនំ ៣៤:៦ តើអ្នកដឹកជញ្ជូន មានភាពយឺតយ៉ាវ ក្នុងការដឹកជញ្ជូនអាហារឲ្យអ្នកទេ? អ្នកអាចប្រើទូរស័ព្ទដៃរបស់អ្នក ដើម្បីវាយតម្លៃ ដោយដាក់ពិន្ទុឲ្យគាត់តែ១ប៉ុណ្ណោះ។ តើម្ចាស់ហាងនោះ ខ្វះការគួរសមចំពោះអ្នកទេ? អ្នកអាចសរសេររិះគន់ នៅលើផេករបស់គាត់បាន។ សព្វថ្ងៃនេះ យើងអាចប្រើទូរស័ព្ទវ័យឆ្លាត ដើម្បីទិញទំនិញតាមអនឡាញ ទំនាក់ទំនងជាមួយមិត្តភក្តិ ឬសាច់ញាតិ ។ល។ តែវាក៏បានផ្តល់ឲ្យយើងនូវឱកាស ដើម្បីវាយតម្លៃគ្នាទៅវិញទៅមក ជាសាធារណៈផងដែរ។ ហើយរឿងនេះបានក្លាយជាបញ្ហា។ ការវាយតម្លៃឲ្យគ្នាទៅវិញទៅមក យ៉ាងដូចនេះ អាចនាំឲ្យមានបញ្ហា ព្រោះមនុស្សអាចធ្វើការវិនិច្ឆ័យ ដោយមិនបានយល់អំពីបរិបទ។ ឧទាហរណ៍ អ្នកដឹកជញ្ជូនត្រូវគេវាយតម្លៃមិនល្អ ដោយសារគាត់ដឹកអាហារឲ្យគេយឺត តែគេមិនបានដឹងទេថា គាត់យឺតដោយសារការស្ទះចរាចរណ៍ ជាបញ្ហាដែលគាត់មិនអាចគ្រប់គ្រងបាន។ ម្ចាស់ហាងត្រូវគេធ្វើការរិះគន់អវិជ្ជមាននៅលើផេកគាត់ ដោយសារគាត់ឆ្លើយតបចំពោះគេមិនបានល្អ តែគេមិនបានដឹងទេថា គាត់មិនបានគេងពេញមួយយប់ ដោយសារកូនឈឺ។ តើធ្វើដូចម្តេច ឲ្យយើងអាចជៀសវាងការវាយតម្លៃ យ៉ាងអយុត្តិធម៌ដូចនេះ? គឺដោយយកតម្រាប់តាមចារិកលក្ខណៈរបស់ព្រះអម្ចាស់។ បទគម្ពីរ និក្ខមនំ ៣៤:៦-៧ បានពិពណ៌នាថា ព្រះអង្គមាន “ព្រះហឫទ័យមេត្តាករុណា ហើយទន់សន្តោស” បានសេចក្តីថា ព្រះអង្គមិនវិនិច្ឆ័យគេ ដោយមិនយល់អំពីបរិបទនោះឡើយ។ ព្រះអង្គ “យឺតនឹងខ្ញាល់” មានន័យថា ព្រះអង្គមិនមានបន្ទូលរិះគន់ បន្ទាប់ពីបានទទួលបទពិសោធន៍អាក្រក់មួយលើកនោះទេ។ ហើយព្រះអង្គ “មានសេចក្តីសប្បុរស” មានន័យថា ព្រះអង្គកែតម្រង់យើង ដើម្បីជាប្រយោជន៍យើង មិនមែនដើម្បីសងសឹកមកលើយើងទេ។ ព្រះអង្គ “ក៏អត់ទោសបាប” បានសេចក្តីថា ទោះគេពិតជាខុសមែនក៏ដោយ ក៏យើងត្រូវតែអត់ទោសឲ្យគេដែរ។ ដោយសារចារិកលក្ខណៈរបស់ព្រះអង្គ ត្រូវធ្វើជាមូលដ្ឋាននៃចារិកលក្ខណៈរបស់យើង(ម៉ាថាយ ៦:៣៣) នោះយើងអាចជៀសវាងការប្រើទូរស័ព្ទតាមអារម្មណ៍របស់យើង តែផ្ទុយទៅវិញ ចូរយើងប្រព្រឹត្តល្អចំពោះគេ តាមគំរូរបស់ព្រះអង្គវិញ។ ក្នុងយុគសម័យអនឡាញ យើងសុទ្ធតែមានឱកាសវាយតម្លៃអ្នកដទៃ ដោយគ្មានត្រាប្រណី។ ដូចនេះ សូមព្រះវិញ្ញាណបរិសុទ្ធជួយយើង ឲ្យមានសេចក្តីអាណិត និងប្រាជ្ញាក្នុងការរស់នៅជារៀងរាល់ថ្ងៃ។—Sheridan Voysey
តើធ្វើដូចម្តេច ឲ្យអ្នកអាចបង្ហាញសេចក្តីអាណិតដល់អ្នកដទៃ កាន់តែច្រើនថែមទៀត? តើមានចារិកលក្ខណៈអ្វីខ្លះរបស់ព្រះអម្ចាស់ ដែលអ្នកចាំបាច់ត្រូវយកតម្រាប់តាមខ្លាំងបំផុត ពេលអ្នកប្រើទូរស័ព្ទរបស់អ្នក?
ឱព្រះអម្ចាស់ សូមព្រះវិញ្ញាណព្រះអង្គជួយទូលបង្គំឲ្យបង្កើតផលផ្លែដែលកោតខ្លាចព្រះអង្គ នៅថ្ងៃនេះ ជាពិសេស នៅពេលដែលទូលបង្គំប្រើទូរស័ព្ទរបស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : យេរេមា ២០-២១ និង ២ធីម៉ូថេ ៤