បញ្ចេញពន្លឺនៃព្រះរាជបុត្រានៃព្រះ
ដោយXochitl Dixon
November 3, 2023
ម៉ាថាយ ៥:១៤-១៦ អ្នករាល់គ្នាជាពន្លឺនៃលោកីយ៍ ឯទីក្រុងណាដែលនៅលើភ្នំ នោះលាក់មិនកំបាំងទេ។ ម៉ាថាយ ៥:១៤ បន្ទាប់ពីខ្ញុំមានការប៉ះទង្គិចគ្នាជាមួយម្តាយខ្ញុំ ទីបំផុតគាត់ក៏បានព្រមទៅជួបខ្ញុំ។ ខ្ញុំត្រូវធ្វើដំណើរចេញពីផ្ទះ ដោយចំណាយពេលជាង២ម៉ោង។ តែពេលខ្ញុំទៅដល់ ខ្ញុំក៏បានដឹងថា គាត់បានចាកចេញ មុនពេលខ្ញុំមកដល់។ ខ្ញុំក៏បានសរសេរសារផ្ញើទៅគាត់ ទាំងកំហឹង។ តែមុនពេលខ្ញុំផ្ញើ ខ្ញុំក៏បានកែសម្រួលពាក្យពេចន៍របស់ខ្ញុំ បន្ទាប់ពីបានទទួលការប៉ះពាល់ចិត្តពីព្រះអង្គ ឲ្យឆ្លើយតបចំពោះគាត់ ដោយសេចក្តីស្រឡាញ់។ បន្ទាប់ពីម្តាយខ្ញុំបានអានសារដែលខ្ញុំបានកែសម្រួលនោះហើយ គាត់ក៏បានទូរស័ព្ទមកខ្ញុំ។ គាត់ប្រាប់ខ្ញុំថា ខ្ញុំមានការផ្លាស់ប្តូរខុសពីមុន។ ព្រះទ្រង់បានប្រើសារដែលខ្ញុំបានសរសេរនៅថ្ងៃនោះ ដើម្បីនាំម្តាយខ្ញុំ ឲ្យចោទសួរខ្ញុំអំពីព្រះយេស៊ូវ ហើយទីបំផុត គាត់ក៏បានទទួលជឿព្រះអង្គជាព្រះអង្គសង្គ្រោះផ្ទាល់ខ្លួន។ ក្នុងបទគម្ពីរម៉ាថាយ ជំពូក៥ ព្រះអង្គបានបញ្ជាក់ថា សិស្សរបស់ព្រះអង្គជាពន្លឺនៃលោកិយ(ខ.១៤)។ ព្រះអង្គមានបន្ទូលថា ចូរឲ្យពន្លឺរបស់អ្នករាល់គ្នា បានភ្លឺនៅមុខមនុស្សលោកយ៉ាងនោះដែរ ដើម្បីឲ្យគេឃើញការល្អ ដែលអ្នករាល់គ្នាប្រព្រឹត្ត រួចសរសើរដំកើង ដល់ព្រះវរបិតានៃអ្នករាល់គ្នាដែលគង់នៅស្ថានសួគ៌”(ខ.១៦)។ ពេលណាយើងទទួលជឿព្រះគ្រីស្ទ ជាព្រះអង្គសង្គ្រោះរបស់យើង យើងទទួលអំណាចនៃព្រះវិញ្ញាណបរិសុទ្ធ។ ព្រះអង្គកែប្រែយើង ដើម្បីឲ្យយើងអាចធ្វើជាស្មរបន្ទាល់ដ៏ភ្លឺចិញ្ចែងនៃសេចក្តីពិត និងសេចក្តីស្រឡាញ់របស់ព្រះអង្គ នៅកន្លែងណាដែលយើងទៅដល់។ ដោយអំណាចនៃព្រះវិញ្ញាណបរិសុទ្ធ យើងអាចធ្វើជាពន្លឺនៃសេចក្តីសង្ឃឹម និងសន្តិភាព ដោយអំណរ ដោយមានលក្ខណៈកាន់តែដូចព្រះយេស៊ូវជារៀងរាល់ថ្ងៃ។ ពេលនោះ ការល្អគ្រប់យ៉ាងដែលយើងធ្វើ ក៏បានក្លាយជាការថ្វាយបង្គំដោយការដឹងគុណ ដែលមានភាពទាក់ទាញចំពោះអ្នកដទៃ ហើយអាចឲ្យគេដឹងថា យើងមានជំនឿរស់។ ពេលណាយើងចុះចូលចំពោះព្រះវិញ្ញាណបរិសុទ្ធ យើងអាចថ្វាយព្រះកិត្តិនាមដល់ព្រះវរបិតា ដោយបញ្ចេញពន្លឺនៃព្រះយេស៊ូវ ជាព្រះរាជបុត្រានៃព្រះ តាមរយៈការរស់នៅរបស់យើង។—Xochitl Dixon
តើអ្នកបានសង្កេតឃើញពន្លឺរបស់ព្រះយេស៊ូវ បង្ហាញចេញតាមរយៈមនុស្សអ្នកដទៃ នៅពេលណា? តើទង្វើល្អរបស់អ្នកដទៃ បានបណ្តាលចិត្តអ្នកឲ្យសរសើរដំកើងព្រះអង្គ ដូចម្តេចខ្លះ?
ឱព្រះយេស៊ូវ សូមព្រះអង្គបញ្ចេញពន្លឺដ៏ចែងចាំងនៃសេចក្តីស្រឡាញ់ នៅក្នុង និងតាមរយៈជីវិតទូលបង្គំ ដើម្បីឲ្យទូលបង្គំអាចថ្វាយព្រះកិត្តិនាមដល់ព្រះវរបិតា ហើយលើកទឹកចិត្តអ្នកដទៃ ឲ្យទុកចិត្តព្រះអង្គផងដែរ។
គម្រោងអានព្រះគម្ពីររយៈពេល១ឆ្នាំ : យេរេមា ៣០៣១ និង ភីលេម៉ូន