ស្គាល់សម្លេងអ្នកគង្វាល
ដោយWinn Collier
November 8, 2023
យ៉ូហាន ១០:១-១០ ចៀមក៏ដើរតាមក្រោយទៅ ដ្បិតវាស្គាល់សំឡេងគាត់។ យ៉ូហាន ១០:៤ កាលពីក្មេង ខ្ញុំបានធ្លាប់រស់នៅ ក្នុងកសិដ្ឋានចិញ្ចឹមសត្វគោមួយកន្លែង ក្នុងរដ្ឋថេនេស៊ី។ នៅពេលរសៀលខ្ញុំបានដើរលេងជាមួយមិត្តភក្តិល្អបំផុតរបស់ខ្ញុំ យ៉ាងសប្បាយរីករាយ។ យើងបានចូលក្នុងព្រៃ ជិះកូនសេះ និងទៅមើលគេប្រកួតជិះគោឡើងក ហើយក៏បានចូលទៅក្នុងក្រោលសេះ ដើម្បីមើលអ្នកចិញ្ចឹមគោ កំពុងថែទាំសេះរបស់ពួកគេ។ ប៉ុន្តែ ពេលណាខ្ញុំបានឮឪពុកខ្ញុំបញ្ចេញសម្លេងហួចពីចម្ងាយ លាន់ឮខ្លាំងដូចកញ្ចែ ខ្ញុំក៏បានឈប់ធ្វើអ្វីៗដែលខ្ញុំកំពុងធ្វើ ហើយប្រញាប់ត្រឡប់ទៅផ្ទះវិញ។ ខ្ញុំមិនអាចស្តាប់ច្រឡំសម្លេងស៊ីញ៉ូនោះបានឡើយ ហើយក៏ដឹងច្បាស់ថា ឪពុកខ្ញុំកំពុងតែហៅខ្ញុំ។ ប៉ុន្មានទសវត្សរ៍ក្រោយមក ខ្ញុំនៅតែស្គាល់សម្លេងហួចនោះដដែល។ ព្រះយេស៊ូវបានប្រាប់សិស្សព្រះអង្គថា ព្រះអង្គជាអ្នកគង្វាល ហើយអ្នកដើរតាមព្រះអង្គ គឺជាសត្វចៀម។ គឺដូចដែលព្រះអង្គបានមានបន្ទូលថា “ហ្វូងចៀមស្តាប់តាមសំឡេងគាត់ដែរ ឯចៀមរបស់គាត់ នោះគាត់ហៅតាមឈ្មោះវានីមួយៗ នាំចេញទៅក្រៅ”(យ៉ូហាន ១០:៣)។ ព្រះយេស៊ូវជ្រាបថា គ្រូខុសឆ្គង និងព្រះគ្រីស្ទក្លែងក្លាយជាច្រើន ដែលនឹងលេចឡើង ក្នុងលោកិយ ដែលនឹងនាំសិស្សព្រះអង្គឲ្យវង្វេង តែព្រះអង្គបានប្រកាសថា សម្លេងនៃសេចក្តីស្រឡាញ់របស់ព្រះអង្គ នៅតែលាន់ឮច្បាស់ ខុសពីសម្លេងផ្សេងទៀត។ “ចៀមក៏ដើរតាមក្រោយទៅ ដ្បិតវាស្គាល់សំឡេងគាត់”(ខ.៤)។ ចូរយើងមានការប្រុងប្រយ័ត្ន ពេលយើងស្តាប់សម្លេងព្រះយេស៊ូវ គឺមិនត្រូវព្រងើយកន្តើយចំពោះសម្លេងព្រះអង្គឡើយ ព្រោះសេចក្តីពិតជាមូលដ្ឋានបានចែងច្បាស់ថា : ព្រះដ៏ជាអ្នកគង្វាលបានបញ្ចេញសម្លេងច្បាស់ហើយ ហើយចៀមរបស់ព្រះអង្គ ក៏ឮសម្លេងព្រះអង្គ។ ព្រះបន្ទូលព្រះអង្គមានកត់ទុកក្នុងព្រះគម្ពីរ សម្រាប់ឲ្យយើងស្តាប់តាមស្រាប់ហើយ ដូចនេះ យើងនៅតែអាចឮព្រះសូរសៀងព្រះអង្គ ដោយជំនួយមកពីព្រះវិញ្ញាណបរិសុទ្ធ។—Winn Collier
តើអ្នកមានឧបសគ្គអ្វីខ្លះ ក្នុងការស្តាប់ព្រះសូរសៀងព្រះអម្ចាស់? តើព្រះដ៏ជាអ្នកគង្វាលកំពុងមានបន្ទូលអ្វីខ្លះ មកកាន់អ្នក នៅថ្ងៃនេះ?
ឱព្រះអម្ចាស់ សូមព្រះអង្គក្រើនរំឭកទូលបង្គំ ឲ្យធ្វើតាមព្រះបន្ទូលព្រះអង្គ ដែលទូលបង្គំបានស្តាប់ឮហើយ។ សូមព្រះអង្គជួយទូលបង្គំឲ្យស្តាប់ ដោយប្រុងប្រយ័ត្ន ហើយឆ្លើយតបចំពោះព្រះអង្គ។
គម្រោងអានព្រះគម្ពីររយៈពេល១ឆ្នាំ : យេរេមា ៤៣-៤៥ និង ហេព្រើរ ៥