យើងមានតម្លៃចំពោះព្រះអង្គ
ដោយJasmine Goh
November 21, 2023
អេសាយ ៤៣:១-៧ ឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង។ អេសាយ ៤៣:៤ កាលពីក្មេង ឪពុករបស់លោកមិង(Ming) មានអត្តចរិកកោងកាច ហើយខ្វះភាពស្និទ្ធស្នាល។ សូម្បីតែនៅពេលដែលលោកមិងមានជំងឺ ហើយត្រូវទៅជួបពេទ្យកុមារ ឪពុកគាត់បានរអ៊ូរទាំថា គាត់ជាមនុស្សដែលគួរឲ្យធុញទ្រាន់។ មានពេលមួយ គាត់បានឮឪពុកម្តាយគាត់ឈ្លោះប្រកែកគ្នា ហើយក៏បានដឹងថា ឪពុកគាត់ថែមទាំងឲ្យម្តាយគាត់រំលូតគាត់ចោលទៀតផង។ គាត់ក៏បានចាប់ផ្តើមមានអារម្មណ៍ថា គាត់ជាកូនដែលគេមិនចង់មាន ហើយបន្តមានអារម្មណ៍ដូចនេះទៀត រហូតដល់ពេលគាត់ពេញវ័យ។ ពេលគាត់ក្លាយជាអ្នកជឿព្រះយេស៊ូវ គាត់មានការពិបាកនៅក្នុងការទំនាក់ទំនងជាមួយព្រះអម្ចាស់ ជាព្រះវរបិតារបស់គាត់ ទោះគាត់បានទទួលព្រះអង្គជាព្រះអម្ចាស់ និងព្រះអង្គសង្គ្រោះនៃជីវិតគាត់ហើយក្តី។ បើយើងមានអារម្មណ៍ដូចលោកមិងដែរ ដោយសារយើងមិនដែលមានអារម្មណ៍ថា ឪពុកខាងសាច់ឈាមស្រឡាញ់យើង យើងនឹងមានការសង្ស័យស្រដៀងគាត់ផងដែរ ក្នុងទំនាក់ទំនងរបស់យើងជាមួយព្រះអង្គ។ យើងប្រហែលឆ្ងល់ថា តើខ្ញុំជាបន្ទុករបស់ព្រះអង្គឬ? តើព្រះអង្គខ្វល់អំពីខ្ញុំទេ? ឪពុកនៅផែនដីរបស់យើងប្រហែលមិនយកចិត្តទុកដាក់ចំពោះយើង ហើយនៅឆ្ងាយពីយើង តែព្រះវរបិតានៃយើងដែលគង់នៅស្ថានសួគ៌ បានយាងមកក្បែរយើង ហើយមានបន្ទូលថា ព្រះអង្គស្រឡាញ់យើង(អេសាយ ៤៣:៤)។ ក្នុងបទគម្ពីរអេសាយ ជំពូក៤៣ ព្រះទ្រង់បានមានបន្ទូលមកកាន់យើង ក្នុងនាមជាព្រះអាទិករ និងព្រះវរបិតា។ បើអ្នកឆ្ងល់ថា ហេតុអ្វីព្រះអង្គសព្វព្រះទ័យឲ្យអ្នករស់នៅ ក្រោមការថែរក្សា ជាផ្នែកមួយនៃគ្រួសារព្រះអង្គ សូមស្តាប់ព្រះបន្ទូលដែលព្រះអង្គមានមកកាន់រាស្រ្តព្រះអង្គថា “ចូរនាំអស់ទាំងកូនប្រុសរបស់អញមកពីទីឆ្ងាយ ហើយពួកកូនស្រីអញមកពីចុងផែនដីចុះ”(ខ.៦)។ បើអ្នកឆ្ងល់ថា អ្នកមានតម្លៃប៉ុណ្ណាចំពោះព្រះអង្គ ចូរស្តាប់ព្រះបន្ទូលព្រះអង្គ ដែលបានបញ្ជាក់ថា “ឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង”(ខ.៤)។ ព្រះទ្រង់ស្រឡាញ់យើងខ្លាំងណាស់ បានជាព្រះអង្គចាត់ព្រះយេស៊ូវ ឲ្យយាងមកសុគត ដើម្បីបង់ថ្លៃលោះយើងឲ្យរួចពីបាប ដើម្បីឲ្យអ្នកណាដែលជឿព្រះអង្គ បាននៅជាមួយព្រះអង្គជារៀងរហូត(យ៉ូហាន ៣១៦)។ ដោយសារការអ្វីដែលព្រះអង្គបានមានបន្ទូល និងបានធ្វើសម្រាប់យើង យើងអាចមានទំនុកចិត្តទាំងស្រុងថា ព្រះអង្គស្រឡាញ់យើង ហើយសព្វព្រះទ័យឲ្យយើងធ្វើជាកូនព្រះអង្គ។—Jasmine Goh
តើអ្នកមានទំនាក់ទំនងយ៉ាងណាខ្លះ ជាមួយព្រះវរបិតា? តើអ្នកអាចរំឭកខ្លួនឯងយ៉ាងដូចម្តេចខ្លះថា អ្នកមានតម្លៃចំពោះព្រះអង្គ?
ឱព្រះវរបិតា ទូលបង្គំចង់រស់នៅជារៀងរាល់ថ្ងៃ ជាកូនព្រះអង្គ មានតម្លៃ និងមានកិត្តិយស ក្នុងព្រះនេត្រព្រះអង្គ។
គម្រោងអានព្រះគម្ពីររយៈពេល១ឆ្នាំ : អេសេគាល ១៦-១៧ និង យ៉ាកុប ៣