យ៉ូស្វេ ១:១-៩
ព្រះយេហូវ៉ាជាព្រះនៃឯង ទ្រង់គង់ជាមួយនៅកន្លែងណា ដែលឯងទៅផង។ យ៉ូស្វេ ១:៩
កាលប៉ុន្មានឆ្នាំមុន ក្រុមគ្រួសារខ្ញុំបានទៅលេងតំបន់ចតុកោណ ដែលនៅសហរដ្ឋអាមេរិកមានតែកន្លែងនេះប៉ុណ្ណោះ ដែលមានរដ្ឋ៤ប្រសព្វគ្នា ក្នុងទីតាំងតែមួយ។ ពេលនោះ ស្វាមីខ្ញុំក៏បានទៅឈរនៅជ្រុងដែលគេដាក់ផ្លាកទឹកដីរដ្ឋអារីហ្សូណា កូនប្រុសច្បងរបស់ខ្ញុំ ក៏បានលោតចូលទៅក្នុងទឹកដីរដ្ឋយូតាហ។ ចំណែកកូនពៅរបស់ខ្ញុំក៏បានកាន់ដៃខ្ញុំខណៈពេលដែលយើងបោះជំហានចូលរដ្ឋខូឡូរ៉ាដូ។ ពេលដែលខ្ញុំស្ទុះរត់ចូលទៅក្នុងទឹកដីរដ្ឋញ៉ូមិចស៊ីកូ កូនពៅរបស់ខ្ញុំក៏បានលាន់មាត់ថា “ម៉ាក់ កូនមិននឹកស្មានសោះថា ម៉ាក់ទុកកូនចោលនៅក្នុងរដ្ឋខូឡូរ៉ាដូ!” ពេលនោះ យើងឈរជាមួយគ្នា នៅក្នុងរដ្ឋផ្សេងគ្នា ហើយសំណើចរបស់យើងបានលាន់ឮក្នុងរដ្ឋទាំង៤ក្នុងពេលតែមួយ។ សព្វថ្ងៃ កូនៗរបស់ខ្ញុំពេញវ័យ ហើយបានចេញទៅរស់នៅខាងក្រៅ។ ខ្ញុំមានការដឹងគុណយ៉ាងជ្រាលជ្រៅ ចំពោះព្រះបន្ទូលដែលបានសន្យាថា ព្រះអង្គនឹងយាងទៅជាមួយរាស្រ្តព្រះអង្គ គ្រប់ទីកន្លែងដែលពួកគេទៅដល់។
បន្ទាប់ពីលោកម៉ូសេលាចាកលោក ព្រះទ្រង់ក៏បានត្រាស់ហៅលោកយ៉ូស្វេ ឲ្យដឹកនាំរាស្រ្តព្រះអង្គ ហើយបានធានាដល់គាត់ថា ព្រះអង្គនឹងមានព្រះវត្តមាននៅជាមួយគាត់ជានិច្ច(យ៉ូស្វេ ១:១-៤)។ ព្រះអង្គមានបន្ទូលថា “អញនឹងនៅជាមួយនឹងឯង ដូចជាបាននៅជាមួយនឹងម៉ូសេដែរ អញមិនដែលខាននឹងប្រោសឯង ក៏មិនដែលបោះបង់ចោលឯងឡើយ”(ខ.៥)។ ព្រះអង្គជ្រាបថា លោកយ៉ូស្វេនឹងមានការសង្ស័យ និងការភ័យខ្លាច ក្នុងនាមគាត់ជាអ្នកដឹកនាំថ្មី របស់រាស្រ្តព្រះអង្គ បានជាព្រះអង្គសង់គ្រឹះនៃសេចក្តីសង្ឃឹមសម្រាប់គាត់ ផ្អែកទៅលើព្រះបន្ទូលដែលបានធានាថា “តើអញមិនបានបង្គាប់ឯងទេឬអី ដូច្នេះចូរឲ្យមានកំឡាំង និងចិត្តក្លាហានចុះ កុំឲ្យខ្លាចឡើយ ក៏កុំឲ្យស្រយុតចិត្តផង ដ្បិតព្រះយេហូវ៉ាជាព្រះនៃឯង ទ្រង់គង់ជាមួយនៅកន្លែងណា ដែលឯងទៅផង”(ខ.៩)។
ទោះព្រះទ្រង់ដឹកនាំយើង ឬមនុស្សជាទីស្រឡាញ់របស់យើង ទៅកន្លែងណា ហើយស្ថិតក្នុងពេលដ៏ពិបាកយ៉ាងណាក៏ដោយ ក៏ព្រះបន្ទូលសន្យារបស់ព្រះអង្គនៅតែធានាដល់យើងថា ព្រះអង្គនៅតែគង់ជាមួយយើងជានិច្ច។—Xochitl Dixon
តើព្រះបន្ទូលសន្យាអំពីព្រះវត្តមានរបស់ព្រះអង្គ បានកម្សាន្តចិត្តអ្នកដូចម្តេចខ្លះ? តើព្រះបន្ទូលសន្យារបស់ព្រះអង្គថា នឹងគង់នៅជាមួយបានកម្សាន្តចិត្តអ្នកយ៉ាងណាខ្លះ ពេលដែលអ្នកនៅឆ្ងាយពីមនុស្សជាទីស្រឡាញ់របស់អ្នក។
ឱព្រះដែលតែងតែគង់នៅជាមួយ ទូលបង្គំសូមអរព្រះគុណព្រះអង្គ ដែលបានកម្សាន្តចិត្តទូលបង្គំ ដោយព្រះបន្ទូលសន្យាថា នឹងគង់នៅជាមួយទូលបង្គំជានិច្ច។
គម្រោងអានព្រះគម្ពីររយៈពេល១ឆ្នាំ : ដានីយ៉ែល ១-២ និង ១យ៉ូហាន ៤
