ម៉ាថាយ ១:១៨-២៥
“មើល នាងព្រហ្មចារីនឹងមានគភ៌ប្រសូតបានបុត្រា១ ហើយព្រះនាមបុត្រនោះត្រូវហៅថា អេម៉ាញូអែល” ដែលប្រែថា ព្រះអង្គទ្រង់គង់ជាមួយនឹងយើងខ្ញុំ។ ម៉ាថាយ ១:២៣
លោកគ្រូនីកូឡាស បានចាប់កំណើត ក្នុងឆ្នាំ២៧០នៃគ្រីស្ទសករាជ ក្នុងគ្រួសារជនជាតិក្រិក ដែលមានទ្រព្យសម្បត្តិស្តុកស្តម្ភ។ គួរឲ្យសោកស្តាយណាស់ ឪពុកម្តាយគាត់បានបាត់បង់ជីវិត កាលគាត់នៅក្មេងនៅឡើយ ហើយគាត់ក៏បានរស់នៅជាមួយពូរបស់គាត់ ដែលស្រឡាញ់គាត់ និងបង្រៀនគាត់ ឲ្យដើរតាមផ្លូវព្រះអម្ចាស់។ មានរឿងព្រេងមួយបានដំណាលថា កាលលោកគ្រូនីកូឡាសស្ថិតក្នុងវ័យយុវជន គាត់បានដឹងថា មានបងប្អូនស្រីៗ៣នាក់ មិនមានប្រាក់បណ្ណាការសម្រាប់រៀបការ ហើយហៀបនឹងក្លាយជាជនទុរគត បើគ្មានអ្នករៀបការជាមួយ។ គាត់ចង់ប្រព្រឹត្តតាមព្រះបន្ទូលព្រះយេស៊ូវឲ្យដាក់ទានដល់អ្នកដែលខ្វះខាត ដូចនេះ គាត់ក៏បានយកកាក់មាសដែលជាកេរអាករ ឲ្យទៅអ្នកទាំងបីនាក់នោះ ម្នាក់១ថង់ៗ។ ក្នុងអំឡុងប៉ុន្មានឆ្នាំក្រោយមកទៀត គាត់បានបន្តបរិច្ចាគទ្រព្យសម្បត្តិរបស់គាត់ ដើម្បីចែកអាហារដល់អ្នកក្រ និងទំនុកបម្រុងអ្នកដទៃ។ ជាច្រើនសតវត្សរ៍ក្រោយមក គំរូនៃការឲ្យអំណោយរបស់គាត់ ដោយសេចក្តីសប្បុរស បានបណ្តាលចិត្តគេ ឲ្យនិពន្ធរឿងតាសាន់តាក្លូស ជារឿងប្រឌិត សម្រាប់បុណ្យណូអែល។
តួអង្គតាសាន់តាក្លូស ឬតាណូអែល ជាតួអង្គប្រឌិត តែភាពសប្បុរសរបស់លោកគ្រូនីកូឡាស ក្នុងការឲ្យអំណោយដល់អ្នកដទៃ ក្នុងនាមគាត់ជាគ្រីស្ទបរិស័ទ បានធ្វើឲ្យខ្ញុំនឹកចាំ អំពីព្រះគ្រីស្ទដែលបានយាងមកចាប់កំណើតជាមនុស្ស ធ្វើជាអំណោយមានតម្លៃបំផុត ដល់មនុស្សទាំងអស់។ ព្រះយេស៊ូវជា “ព្រះគង់នៅជាមួយយើង”(ម៉ាថាយ ១:២៣)។ ហើយព្រះអង្គក៏បានប្រទានយើងនូវអំណោយនៃជីវិតអស់កល្ប។ ក្នុងលោកិយដែលមានសេចក្តីស្លាប់ ព្រះអង្គបានសង្គ្រោះរាស្រ្តព្រះអង្គឲ្យរួចពីបាប(ខ.២១)។
អ្នកជឿព្រះយេស៊ូវពិតប្រាកដ តែងតែបង្ហាញចេញនូវសេចក្តីសប្បុរស ដោយការលះបង់។ ពួកគេយកចិត្តទុកដាក់ចំពោះការខ្វះខាតរបស់អ្នកដទៃ ហើយក៏ជួយទំនុកបម្រុងគេ ដោយអំណរ ដូចដែលព្រះទ្រង់បានផ្គត់ផ្គង់ពួកគេផងដែរ។ ព្រះយេស៊ូវជាអំណោយដែលល្អបំផុតសម្រាប់មនុស្សជាតិ។—Winn Collier
តើអ្នកបានឲ្យអំណោយដល់អ្នកដទៃ ដោយការបង្ខំចិត្ត ឬដោយអំណរ? តើព្រះយេស៊ូវបានប្រទានគំរូនៃសេចក្តីសប្បុរស ដល់អ្នកដូចម្តេចខ្លះ?
ឱព្រះអម្ចាស់ សូមព្រះអង្គបើកភ្នែកទូលបង្គំ ឲ្យមើលឃើញការខ្វះខាតរបស់អ្នកដទៃ។ សូមព្រះអង្គជួយទូលបង្គំឲ្យយកអសារពួកគេ ដោយចិត្តសប្បុរសពិតប្រាកដ។
គម្រោងអានព្រះគម្ពីររយៈពេល១ឆ្នាំ : ដានីយ៉ែល ៣-៤ និង ១យ៉ូហាន ៥
