ព្រះអង្គបានអត់ទោស និងមិននឹកចាំទៀត
ដោយKenneth Petersen
December 20, 2023
អេសាយ ៤៣:១៨-២៥
គឺអញ អញនេះហើយជាអ្នកដែលលុបអំពើរំលងរបស់ឯងចេញ ដោយយល់ដល់ខ្លួនអញ ហើយអញមិននឹកចាំអំពើបាបរបស់ឯងទៀតឡើយ។ អេសាយ ៤៣:២៥
អ្នកស្រីជីល ផ្រាយ(Jill Price) មានសមត្ថភាពចម្លែកម្យ៉ាង ពីកំណើត ដោយគាត់អាចចងចាំជាលម្អិត នូវព្រឹត្តិការណ៍នីមួយៗដែលបានកើតឡើងចំពោះគាត់។ នៅក្នុងគំនិតគាត់ គាត់អាចនឹកឃើញរឿងដែលបានកើតឡើង ដូចអ្វីដែលគាត់ពិតជាបានជួបប្រទះក្នុងជីវិតគាត់។
មានខ្សែភាពយន្តភាគមួយ មានចំណងជើងថា មនុស្សមិនចេះភ្លេច និយាយអំពីស្ត្រីជាមន្ត្រីប៉ូលិសម្នាក់ មានសមត្ថភាពចងចាំជាលម្អិតមិនចេះភ្លេច ដែលមានប្រយោជន៍យ៉ាងខ្លាំង នៅក្នុងការប្រកួតល្បែងចងចាំ និងការដោះស្រាយរឿងក្តីឧក្រិដ្ឋកម្ម។ ទោះជាយ៉ាងណាក៏ដោយ សម្រាប់អ្នកស្រីជីល ផ្រាយ សមត្ថភាពចងចាំមិនចេះភ្លេចនេះបាននាំឲ្យគាត់មានការលំបាកជាច្រើន។ គាត់មិនអាចភ្លេចពេលដែលគេរិះគន់គាត់ ឬពេលដែលគាត់ជួបរឿងព្រាត់ប្រាស់ ហើយមិនអាចភ្លេចការអ្វីដែលគាត់បានធ្វើ ដែលនាំឲ្យគាត់មានវិប្បដិសារី។ នាងបាននឹកឃើញរឿងទាំងអស់នោះ ក្នុងខួរក្បាលនាង ម្តងហើយម្តងទៀត។
ព្រះនៃយើងជ្រាបអំពីអ្វីៗទាំងអស់ ដែលបានកើតឡើងពីអតីតកាល ហើយក៏ជ្រាបអំពីរឿងទាំងអស់ដែលនឹងកើតឡើងនៅពេលអនាគត។ ព្រះគម្ពីរបានចែងថា ព្រះប្រាជ្ញាញាណរបស់ព្រះអង្គគ្មានដែនកំណត់។ តែព្រះអង្គបានមានបន្ទូលលើកទឹកចិត្តយើង ក្នុងកណ្ឌគម្ពីរអេសាយថា “គឺអញ អញនេះហើយជាអ្នកដែលលុបអំពើរំលងរបស់ឯងចេញ ដោយយល់ដល់ខ្លួនអញ ហើយអញមិននឹកចាំអំពើបាបរបស់ឯងទៀតឡើយ”(៤៣:២៥)។ កណ្ឌគម្ពីរហេព្រើរបានបញ្ជាក់កាន់តែច្បាស់ថា “យើងរាល់គ្នាបានញែកជាបរិសុទ្ធ ដោយសារដង្វាយថ្វាយរូបអង្គព្រះយេស៊ូវគ្រីស្ទ១ដងជាសំរេច” ហើយព្រះអង្គនឹងលែងនឹកចាំពីអំពើបាប និងសេចក្តីទទឹងច្បាប់របស់យើងទៀត(ហេព្រើរ ១០:១០,១៧)។
ពេលណាយើងសារភាពបាបយើង នៅចំពោះព្រះអង្គ យើងអាចឈប់នឹកចាំបរាជ័យ និងកំហុសរបស់យើងទៀត។ យើងចាំបាច់ត្រូវកាត់ចិត្ត ឈប់នឹកគិតអំពីពួកវាទៀត ដូចដែលព្រះអង្គមានបន្ទូលថា “កុំឲ្យឯងរាល់គ្នានឹកចាំពីការទាំងប៉ុន្មានដែលកន្លងទៅហើយ ឬរិះគិតពីអស់ទាំងការពីចាស់បុរាណនោះឡើយ”(អេសាយ ៤២:១៨)។ តែចូរយើងចាំថា ដោយសារសេចក្តីស្រឡាញ់ដ៏លើសលប់ ព្រះអង្គបានសម្រេចព្រះទ័យមិននឹកចាំអំពើបាបរបស់យើង ទាស់នឹងយើងទៀតឡើយ។—Kenneth Petersen
តើអ្នកមានវិប្បដិសារីអ្វីខ្លះ ដែលនៅដក់ជាប់ក្នុងគំនិតអ្នក ដែលអ្នកចេះតែនឹកឃើញម្តងហើយម្តងទៀត?
តើអ្នកអាចថ្វាយពួកវាដល់ព្រះអម្ចាស់ ហើយឈប់រស់នៅក្នុងអតីតកាលទៀត យ៉ាងដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការអត់ទោស និងឈប់នឹកចាំអំពើបាបទូលបង្គំ។
គម្រោងអានព្រះគម្ពីររយៈពេល១ឆ្នាំ : មីកា ១-៣ និង វិវរណៈ ១១