វិញ្ញាណដែលតប់ប្រមល់ និងការអធិស្ឋានដ៏ស្មោះត្រង់
ដោយArthur Jackson
December 30, 2023
យ៉ូហាន ១២:២៧-៣២
ឱព្រះវរបិតាអើយ សូមដំកើងព្រះនាមទ្រង់ឡើង។ យ៉ូហាន ១២:២៨
រយៈពេល៣ថ្ងៃ មុនពេលគ្រាប់បែកមួយគ្រាប់ផ្ទុះ នៅក្នុងផ្ទះរបស់លោកបណ្ឌិត ម៉ាទីន លូស័រ ឃីង(Martin Luther King Jr.) គាត់បានជួបរឿងមួយ ដែលនាំឲ្យគាត់មានការផ្លាស់ប្តូរដ៏សំខាន់អស់មួយជីវិត។ បន្ទាប់ពីមានគេទូរស័ព្ទគំរាមគាត់ គាត់ក៏បានរិះរកយុទ្ធសាស្ត្រចាកចេញពីចលនាទាមទារសិទ្ធិពលរដ្ឋ។ គាត់ក៏បានអធិស្ឋានថា “ទូលបង្គំសូមប្រកាន់គោលជំហរ ដើម្បីបុព្វហេតុដ៏ត្រឹមត្រូវ។ តែពេលនេះ ទូលបង្គំមានការភ័យខ្លាច។ ទូលបង្គំមិនមានសល់អ្វីទៀតទេ។ ទូលបង្គំបានឈានដល់ចំណុចដែលទូលបង្គំមិនអាចប្រឈមមុខដាក់បញ្ហានេះតែម្នាក់ឯងបានទេ”។ បន្ទាប់ពីគាត់បានអធិស្ឋានចប់ សេចក្តីជំនឿដ៏រឹងមាំក៏បានកើតមានក្នុងចិត្តគាត់ យ៉ាងស្ងាត់ស្ងៀម។ លោកបណ្ឌិតម៉ាទីនបានកត់សំគាល់ថា “ភ្លាមៗនោះ ការភ័យខ្លាចរបស់ខ្ញុំបានចាប់ផ្តើមរលាយបាត់។ ការសង្ស័យរបស់ខ្ញុំក៏លែងមានទៀត។ ខ្ញុំបានត្រៀមខ្លួនជាស្រេច ដើម្បីប្រឈមមុខដាក់រឿងគ្រប់យ៉ាង”។
ក្នុងបទគម្ពីរយ៉ូហាន ជំពូក១២ ព្រះយេស៊ូវបានអធិស្ឋានថា ព្រះអង្គមានចិត្តតប់ប្រមល់(ខ.២៧)។ ព្រះអង្គបានបើកបង្ហាញអារម្មណ៍ពិតដល់ព្រះវរបិតា ដោយព្រះទ័យស្មោះត្រង់។ ការអធិស្ឋានរបស់ព្រះអង្គ នៅតែយកព្រះវរបិតាជាធំ។ “ឱព្រះវរបិតាអើយ សូមដំកើងព្រះនាមទ្រង់ឡើង”(ខ.២៨)។ ការអធិស្ឋានរបស់ព្រះយេស៊ូវ គឺជាការចុះចូលបំណងព្រះទ័យព្រះវរបិតា។
លក្ខណៈរបស់យើងជាមនុស្ស មានអារម្មណ៍ភ័យខ្លាច និងតប់ប្រមល់ជាធម្មតា ពេលណាយើងត្រូវធ្វើការសម្រេចចិត្តថា យើងត្រូវថ្វាយព្រះកិត្តិនាមដល់ព្រះ ឬអត់ ពេលណាយើងត្រូវធ្វើការសម្រេចចិត្តដ៏ពិបាក នៅក្នុងទំនាក់ទំនង ឬត្រូវកែប្រែទម្លាប់ ឬផ្នត់គំនិត(ល្អ ឬអាក្រក់)។ ទោះយើងប្រឈមមុខដាក់អ្វីក៏ដោយ ពេលណាយើងអធិស្ឋានដោយចិត្តក្លាហាន ព្រះអង្គនឹងប្រទានកម្លាំង ឲ្យយើងជម្នះការភ័យខ្លាច និងភាពរសាប់រសល់ក្នុងចិត្ត ហើយធ្វើការអ្វីដែលថ្វាយសិរីល្អដល់ព្រះអង្គ ដើម្បីជាប្រយោជន៍ដល់យើង និងអ្នកដទៃ។—Arthur Jackson
តើអ្នកជួបបញ្ហាអ្វីខ្លះ ដែលបានបណ្តាលចិត្តអ្នកឲ្យអធិស្ឋាន សូមឲ្យព្រះនាមព្រះអង្គដំកើងឡើង?
តើអ្នកមានការលើកទឹកចិត្តអ្វីខ្លះ សម្រាប់អ្នកដែលកំពុងជួបបញ្ហាដូចនេះដែរ?
ឱព្រះវរបិតា សូមព្រះអង្គជួយទូលបង្គំ ឲ្យប្រឈមមុខដាក់បញ្ហាប្រឈមដោយចិត្តស្មោះត្រង់ និងដោយការអធិស្ឋានដ៏ខ្ជាប់ខ្ជួន ដើម្បីថ្វាយសិរីល្អដល់ព្រះអង្គ។
គម្រោងអានព្រះគម្ពីររយៈពេល១ឆ្នាំ : សាការី ១៣-១៤ និង វិវរណៈ ២១