លោកុប្បត្ដិ ១០-១២ និង ម៉ាថាយ ៤
១ថែស្សាឡូនិច ៤:១-២,៩-១២
ហើយខំប្រឹងឲ្យអស់ពីចិត្ត និងនៅដោយស្រគត់ស្រគំ ទាំងប្រព្រឹត្តតែរឿងជារបស់ផងខ្លួន ហើយធ្វើការដោយដៃខ្លួនឯងផង។ ១ថែស្សាឡូនិច ៤:១១
ថ្ងៃមួយ ខ្ញុំបានចុះមកជាន់ខាងក្រោម ដើម្បីញាំអាហារពេលព្រឹក ក្នុងសណ្ឋាគារដែលខ្ញុំកំពុងស្នាក់នៅ។ អ្វីៗនៅក្នុងបន្ទប់ញាំអាហារនោះ សុទ្ធតែស្អាត មិនមានប្រឡាក់អ្វី។ គេបានតម្រៀបអាហារប៊ូហ្វេនៅលើតុរួចជាស្រេច។ អាហារ និងភេសជ្ជះត្រជាក់ៗក៏មានពេញទូទឹកកក ស្លាបព្រានិងសមក៏មានពេញប្រអប់។ អ្វីៗហាក់ដូចជាបានរៀបចំយ៉ាងល្អឥតខ្ចោះ។
បន្ទាប់មក ខ្ញុំក៏បានឃើញបុរសម្នាក់កំពុងបំពេញអ្វីៗដែលខ្វះចន្លោះ ព្រមទាំងជូតសម្អាតរបស់អ្វីដែលប្រឡាក់។ គាត់មិនបានព្យាយាមទាក់ទាញការចាប់អារម្មណ៍ពីនរណាម្នាក់ទេ។ ប៉ុន្តែ ពេលខ្ញុំអង្គុយញាំអាហារកាន់តែយូរ ខ្ញុំក៏កាន់តែមានការស្ញប់ស្ញែងចំពោះគាត់។ គាត់មានភាពស្វាហាប់ក្នុងការងារណាស់ គាត់តែងតែកត់សំគាល់ឃើញឆ្នាំងដែលនៅសល់ម្ហូបតិចតួច ហើយប្រញាប់ចាក់ម្ហូបបន្ថែម ដើម្បីកុំឲ្យភ្ញៀវរង់ចាំយូរ។ ក្នុងនាមខ្ញុំជាអ្នកធ្លាប់ធ្វើការក្នុងភោជនីយដ្ឋាន ខ្ញុំបានសង្កេតឃើញថា គាត់តែងតែមានភាពល្អិតល្អន់នៅក្នុងការងារ។ អ្វីៗហាក់ដូចជាល្អឥតខ្ចោះ ដោយសារបុរសម្នាក់នេះធ្វើការដោយចិត្តស្មោះត្រង់ ទោះមានមនុស្សតែពីរបីនាក់ចាប់អារម្មណ៍ក៏ដោយ។
ពេលខ្ញុំឃើញបុរសម្នាក់នេះ ធ្វើការងារយ៉ាងផ្ចិតផ្ចង់ដូចនេះ ខ្ញុំក៏បាននឹកចាំពាក្យពេចន៍ដែលសាវ័កប៉ុលបានបង្រៀនពួកជំនុំនៅទីក្រុងថែស្សាឡូនីចឲ្យ “ខំប្រឹងឲ្យអស់ពីចិត្ត និងនៅដោយស្រគត់ស្រគំ ទាំងប្រព្រឹត្តតែរឿងជារបស់ផងខ្លួន ហើយធ្វើការដោយដៃខ្លួនឯងផង” ដើម្បីឲ្យទីបន្ទាល់នៃការរស់នៅរបស់ពួកគេ បានទទួលការគោរពពីអ្នកខាងក្រៅ(១ថែស្សាឡូនិច ៤:១១-១២)។ សាវ័កប៉ុលបានដឹងថា អ្នកបម្រើព្រះដែលមានចិត្តស្មោះត្រង់ អាចទទួលបានការគោរពពីអ្នកដទៃ គឺបានបញ្ជាក់ថា ការបម្រើដ៏តូចមួយដល់អ្នកដទៃ ដោយភាពថ្លៃថ្នូរ និងមានគោលបំណង អាចនាំឲ្យគេបើកចិត្តចង់ស្តាប់ដំណឹងល្អ។
ខ្ញុំមិនដឹងថា បុរសដែលខ្ញុំបានឃើញនៅថ្ងៃនោះជាអ្នកជឿព្រះយេស៊ូវឬអត់ទេ។ តែខ្ញុំអរព្រះគុណព្រះអង្គ ដែលបានប្រើភាពឧស្សាហ៍ព្យាយាមរបស់គាត់ ដើម្បីក្រើនរំឭកខ្ញុំឲ្យពឹងផ្អែកទៅលើព្រះអង្គ ក្នុងការរស់នៅ ដោយភាពស្មោះត្រង់ យ៉ាងស្រគត់ស្រគំ ដែលឆ្លុះបញ្ចាំងឲ្យគេឃើញផ្លូវដ៏ស្មោះត្រង់របស់ព្រះអង្គ។—Adam R. Holz
តើសេចក្តីជំនឿរបស់អ្នក មានឥទ្ធិពលយ៉ាងណាមកលើរបៀបដែលអ្នកធ្វើការងារ? តើការរស់នៅជាអ្នកបម្រើដ៏ស្មោះត្រង់ បានធ្វើជាទីបន្ទាល់ដ៏មានអំណាច ដូចម្តេចខ្លះ?
ឱព្រះវរបិតា សូមព្រះអង្គជួយទូលបង្គំឲ្យចាំថា គ្មានការងារណាមួយមានភាពតូចតាច ក្នុងនគរព្រះអង្គឡើយ ដរាបណាទូលបង្គំបម្រើព្រះអង្គជារៀងរាល់ថ្ងៃ ដោយចិត្តស្មោះត្រង់ ដោយដឹងថា ព្រះអង្គនៅក្បែរ និងដឹកនាំទូលបង្គំជានិច្ច។
គម្រោងអានព្រះគម្ពីររយៈពេល១ឆ្នាំ : លោកុប្បត្ដិ ១០-១២ និង ម៉ាថាយ ៤
