លោកុប្បត្ដិ ២៣-២៤ និង ម៉ាថាយ ៧
យេរេមា ៣១:១-៦
អើ អញបានស្រឡាញ់ឯង ដោយសេចក្តីស្រឡាញ់ដ៏ស្ថិតស្ថេរនៅអស់កល្ប។ យេរេមា ៣១:៣
ក្នុងបទកំណាព្យដែលអ្នកស្រីអេលីហ្សាបិត បារេត(Elizabeth Barrett)បាននិពន្ធ មានចំណងជើងថា បទពាក្យ៧របស់ជនជាតិប៉ទុយហ្កាល់ ស្ថិតក្នុងចំណោមបទកំណាព្យដែលល្បីល្បាញបំផុត ក្នុងភាសាអង់គ្លេស។ ក្នុងកំណាព្យនោះ គាត់បានសរសេរឃ្លាដែលគួរឲ្យចាប់អារម្មណ៍ថា “តើខ្ញុំអាចស្រឡាញ់បង យ៉ាងដូចម្តេចខ្លះ? ខ្ញុំសូមរាប់របៀបដែលខ្ញុំស្រឡាញ់បង”។ គាត់បានសរសេរបទកំណាព្យនេះ ជូនលោករ៉ូបឺត ប្រោននីង(Robert Browning) មុនពេលអ្នកទាំងពីររៀបការជាមួយគ្នា។ លោករ៉ូបឺតមានការរំភើបចិត្តណាស់ ហើយក៏បានលើកទឹកចិត្តអ្នកស្រីអេលីហ្សាបិត ឲ្យបោះពុម្ពផ្សាយកម្របទកំណាព្យរបស់គាត់ទាំងអស់។ ប៉ុន្តែ ភាសានៃបទពាក្យ៧នេះ មានភាពទន់ភ្លន់ខ្លាំង ព្រោះជារឿងផ្ទាល់ខ្លួនរបស់គាត់ជាមួយលោករ៉ូបឺត ដូចនេះ គាត់មានការខ្មាសអៀន ហើយក៏បានបោះពុម្ពផ្សាយ ដោយឲ្យគេគិតស្មានថា វាជាបទកំណាព្យដែលគេបកប្រែពីអ្នកនិពន្ធជនជាតិព័រទុយហ្គាល់។
ជួនកាល យើងអាចមានអារម្មណ៍ខ្មាសអៀន ពេលយើងបើកបង្ហាញក្តីស្រឡាញ់ដល់អ្នកដទៃ។ តែព្រះគម្ពីរបានបើកបង្ហាញសេចក្តីស្រឡាញ់របស់ព្រះ ដោយគ្មានការលាក់លៀមឡើយ។ កណ្ឌគម្ពីរយេរេមាបានរំឭកអំពីសេចក្តីស្រឡាញ់ ដែលព្រះអង្គបានបង្ហាញរាស្រ្តព្រះអង្គ ដោយព្រះបន្ទូលដ៏ស្រទន់ថា ព្រះអង្គបានស្រឡាញ់ពួកគេ ដោយសេចក្តីស្រឡាញ់ដ៏អស់កល្ប ហើយបានទាញនាំពួកគេឲ្យត្រឡប់មករកព្រះអង្គវិញ ដោយសេចក្តីសប្បុរសដ៏ស្ថិតស្ថេរ(យេរេមា ៣១:៣)។ ទោះរាស្រ្តព្រះអង្គបានងាកចេញពីព្រះអង្គក៏ដោយ ក៏ព្រះអង្គនៅតែសន្យាថា នឹងស្អាងពួកគេឡើងវិញ ហើយនាំពួកគេត្រឡប់មករកព្រះអង្គវិញ។ ព្រះអង្គប្រាប់ពួកគេថា ព្រះអង្គបានយាងមកប្រទានការសម្រាកដល់ពួកអ៊ីស្រាអែល(ខ.២)។
ព្រះយេស៊ូវបានបង្ហាញសេចក្តីស្រឡាញ់នៃការស្អាងឡើងវិញរបស់ព្រះវរបិតា ដោយប្រទានសន្តិភាព និងការសម្រាកដល់អស់អ្នកដែលវិលត្រឡប់មកព្រះអង្គវិញ។ ចាប់តាំងពីពេលព្រះអង្គផ្ទំក្នុងស្នូកសត្វ ដល់ពេលព្រះអង្គសុគតនៅលើឈើឆ្កាង ហើយរហូតដល់ពេលដែលព្រះអង្គមានព្រះជន្មរស់ឡើងវិញ ព្រះអង្គបានបង្ហាញព្រះទ័យរបស់ព្រះវរបិតា ដែលចង់ហៅលោកិយដែលវង្វេង ឲ្យត្រឡប់មករកព្រះអង្គវិញ។ ពេលអ្នកបានអានព្រះគម្ពីរទាំងមូល អ្នកនឹងឃើញថា ព្រះទ្រង់បានបង្ហាញសេចក្តីស្រឡាញ់ម្តងហើយម្តងទៀត តាមមធ្យោបាយជាច្រើនរាប់មិនអស់ ជារៀងរហូត។—James Banks
តើព្រះទ្រង់បានបង្ហាញសេចក្តីស្រឡាញ់ចំពោះអ្នក យ៉ាងដូចម្តេចខ្លះ? តើអ្នកអាចបង្ហាញសេចក្តីស្រឡាញ់ចំពោះព្រះអង្គនៅថ្ងៃនេះ ដោយរបៀបណា?
ឱព្រះយេស៊ូវទូលបង្គំសូមអរព្រះគុណព្រះអង្គ ដែលបានស្រឡាញ់ទូលបង្គំ ដោយសារសេចក្តីស្រឡាញ់ជាបរិបូរ! សូមព្រះអង្គជួយទូលបង្គំ ឲ្យស្រឡាញ់ព្រះអង្គអស់ពីជីវិត នៅថ្ងៃនេះ។
គម្រោងអានព្រះគម្ពីររយៈពេល១ឆ្នាំ : លោកុប្បត្ដិ ២៣-២៤ និង ម៉ាថាយ ៧
