ព្រឹក
ព្រះបន្ទូលរបស់ព្រះកែប្រែជីវិត
ដោយAmy Boucher Pye
February 10, 2024
២ធីម៉ូថេ ៣:១០-១៧
តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មាន ដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ ដែលបានដោយសារសេចក្តីជំនឿជឿដល់ព្រះគ្រីស្ទយេស៊ូវផង។ ២ធីម៉ូថេ ៣:១៥
កាលអ្នកស្រីគ្រីស្ទីន(Kristin) ចង់ទិញសៀវភៅពិសេសមួយក្បាល ធ្វើជាអំណោយសម្រាប់លោកហ្សូ ហ៊ូ(Xio-Hu) ជាស្វាមីជនជាតិចិន គាត់ក៏បានដើរទិញសៀវភៅភាសាចិន តែនៅកន្លែងលក់សៀវភៅ មានតែព្រះគម្ពីរប៊ីបទេ ដែលមានភាសាចិន។ ទោះអ្នកទាំងពីរមិនមែនជាអ្នកជឿព្រះគ្រីស្ទ គាត់សង្ឃឹមថា ស្វាមីគាត់នឹងពេញចិត្តនឹងអំណោយមួយនេះ។ ពេលស្វាមីគាត់ឃើញព្រះគម្ពីរប៊ីបជាលើកដំបូង ស្វាមីគាត់ក៏បានខឹង តែទីបំផុត គាត់ក៏បានយកព្រះគម្ពីរនោះមកអាន។ ពេលគាត់អាន គាត់ក៏បានទទួលការប៉ះពាល់ចិត្ត ដោយសេចក្តីពិតក្នុងទំព័រព្រះគម្ពីរ។ អ្នកស្រីគ្រីស្ទីនមិនសប្បាយចិត្តពេលដែលបានឃើញស្វាមីខ្លួនមានការផ្លាស់ប្តូរដូចនេះ ហើយក៏បានចាប់ផ្តើមអានព្រះគម្ពីរដែរ ដើម្បីស្វែងរកកំហុសក្នុងព្រះគម្ពីរ។ តែគាត់មានការភ្ញាក់ផ្អើលយ៉ាងខ្លាំង ពេលដែលគាត់បានទទួលជឿព្រះយេស៊ូវ តាមរយៈការអានព្រះគម្ពីរផងដែរ។
សាវ័កប៉ុលបានស្គាល់អំណាចនៃព្រះគម្ពីរ ដែលកែប្រែជីវិតមនុស្ស។ កាលគាត់សរសេរសំបុត្រពីក្នុងគុក នៅទីក្រុងរ៉ូម គាត់បានជំរុញលោកធីម៉ូថេ ជាសិស្ស ឲ្យនៅជាប់ក្នុងសេចក្តីដែលគាត់បានរៀនពីបទគម្ពីរទាំងប៉ុន្មាន តាំងពីតូចមក (២ធីម៉ូថេ ៣:១៤-១៥)។ សាវ័កប៉ុលដឹងថា លោកធីម៉ូថេនឹងជួបការទាស់ប្រឆាំង និងការបៀតបៀន បានជាគាត់ចង់ឲ្យលោកធីម៉ូថេកាន់ខ្ជាប់តាមព្រះបន្ទូល ដើម្បីឲ្យអាចជម្នះបញ្ហាប្រឈម ដោយរកឃើញកម្លាំង និងប្រាជ្ញាក្នុងព្រះគម្ពីរ ខណៈពេលដែលគាត់ចំណាយពេលជញ្ជឹងគិតអំពីសេចក្តីពិតក្នុងព្រះបន្ទូល។
ព្រះទ្រង់បានបញ្ចេញអំណាចក្នុងព្រះគម្ពីរដល់យើង តាមរយៈព្រះវិញ្ញាណព្រះអង្គ។ ពេលណាយើងនៅជាប់នឹងព្រះបន្ទូល ព្រះអង្គនឹងកែប្រែយើងឲ្យមានលក្ខណៈកាន់តែដូចព្រះអង្គ។ គឺដូចដែលព្រះអង្គបានកែប្រែលោកហ្សូ ហ៊ូ និងអ្នកស្រីគ្រីស្ទីនផងដែរ។—Amy Boucher Pye
តើអ្នកមានការផ្លាស់ប្រែដូចម្តេចខ្លះ តាមរយៈការចំណាយពេលអាន និងជញ្ជឹងគិតព្រះបន្ទូល ក្នុងព្រះគម្ពីរ?
តើអ្នកបានដកពិសោធន៍នឹងអំណាចនៃព្រះបន្ទូល នៅពេលណា?
ឱព្រះដែលបានបង្កើតជីវិតមនុស្សទាំងអស់ ទូលបង្គំសូមអរព្រះគុណព្រះអង្គ សម្រាប់ការប្រទានព្រះគម្ពីរប៊ីប ធ្វើជាសៀវភៅដែលនាំមកនូវជីវិត។ សូមព្រះអង្គជួយទូលបង្គំឲ្យចុះចូលព្រះអង្គ ខណៈពេលដែលទូលបង្គំអានព្រះគម្ពីរ។
To learn more about how to effectively study the Bible, visit ODBU.org/lessons/SF106-01.
គម្រោងអានព្រះគម្ពីររយៈពេល១ឆ្នាំ ៈ លេវីវិន័យ ៨-១០ និង ម៉ាថាយ ២៥:៣១-៤៦
ល្ងាច
មានចិត្តឆេះឆួលចំពោះព្រះ និងសេចក្តីពិត
ដោយJohn Piper
February 10, 2024
តែបើមានអ្នកខ្លះមិនជឿ នោះដូចម្តេចទៅ សេចក្តីដែលគេមិនជឿនោះ តើនឹងធ្វើឲ្យសេចក្តីជំនឿជឿដល់ព្រះទៅជាមិនកើតការវិញឬអី ទេ មិនមែនឡើយ សូមឲ្យព្រះបានរាប់ជាពិត ហើយគ្រប់ទាំងមនុស្សជាភូតភរវិញចុះ ដូចមានសេចក្តីចែងទុកមកថា «ឲ្យទ្រង់បានរាប់ជាសុចរិត ក្នុងកាលដែលទ្រង់មានព្រះបន្ទូល ហើយឲ្យទ្រង់បានឈ្នះ ក្នុងកាលដែលគេជំនុំជំរះទ្រង់»។ រ៉ូម ៣:៣-៤
ការដែលយើងខ្វល់អំពីសេចក្តីពិត គឺជាការបង្ហាញចេញដោយជៀសមិនរួចថា យើងបានជញ្ជឹងគិតអំពីព្រះ។ ព្រះពិតជាមានមែន ដូចនេះព្រះអង្គជាខ្នាតគំរូសម្រាប់វាស់ស្ទង់អ្វីៗគ្រប់យ៉ាង ហើយការគិតរបស់ព្រះអង្គ អំពីអ្វីៗគ្រប់យ៉ាង គឺជាខ្នាតគំរូដែលគួរឲ្យយើងគិតតាម។
ការមិនខ្វល់អំពីសេចក្តីពិត គឺជាការមិនខ្វល់អំពីព្រះ។ ដើម្បីស្រឡាញ់ព្រះដោយចិត្តឆេះឆួល យើងត្រូវស្រឡាញ់សេចក្តីពិត ដោយចិត្តឆេះឆួល។ ការទទួលយកព្រះធ្វើជាចំណុចកណ្តាលនៃជីវិត គឺមានន័យថា យើងបានទទួលការជំរុញចិត្ត ដោយសេចក្តីពិត នៅក្នុងការធ្វើការបម្រើព្រះ។ ការអ្វីដែលមិនពិត គឺមិនមែនមកពីព្រះនោះទេ។
សូមចំណាយពេលជញ្ជឹងគិត អំពីបទគម្ពីរ ដែលបានចែងអំពីព្រះ និងសេចក្តីពិត ដែលមានដូចតទៅ ៖
១) ព្រះទ្រង់ជាសេចក្តីពិត
រ៉ូម ៣:៣-៤ (ព្រះវរបិតា) ៖ “តែបើមានអ្នកខ្លះមិនជឿ នោះដូចម្តេចទៅ សេចក្តីដែលគេមិនជឿនោះ តើនឹងធ្វើឲ្យសេចក្តីជំនឿជឿដល់ព្រះទៅជាមិនកើតការវិញឬអី ទេ មិនមែនឡើយ សូមឲ្យព្រះបានរាប់ជាពិត ហើយគ្រប់ទាំងមនុស្សជាភូតភរវិញ”។
យ៉ូហាន ១៤:៦(ព្រះរាជបុត្រា) ៖ ព្រះយេស៊ូវមានព្រះបន្ទូលទៅគាត់ថា “ខ្ញុំជាផ្លូវ ជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ” ។
យ៉ូហាន ១៥:២៦ (ព្រះវិញ្ញាណបរិសុទ្ធ) ៖ “កាលណាព្រះដ៏ជាជំនួយទ្រង់យាងមក ដែលខ្ញុំនឹងចាត់មកពីព្រះវរបិតា គឺជាព្រះវិញ្ញាណនៃសេចក្តីពិត ដែលចេញពីព្រះវរបិតាមក ព្រះអង្គនោះ ទ្រង់នឹងធ្វើបន្ទាល់ពីខ្ញុំ”។
២) ការមិនស្រឡាញ់សេចក្តីពិត នាំមកនូវសេចក្តីហិនវិនាសអស់កល្បជានិច្ច
២ថែស្សាឡូនីច ២:១០ ៖ ហើយដោយគ្រប់ទាំងសេចក្តីឆបោករបស់សេចក្តីទុច្ចរិត ក្នុងពួកអ្នកដែលត្រូវវិនាស “ដោយព្រោះគេមិនព្រមស្រឡាញ់ដល់សេចក្តីពិត ដើម្បីឲ្យគេបានសង្គ្រោះនោះទេ”។
៣) ការរស់នៅរបស់គ្រីស្ទបរិស័ទ ត្រូវផ្អែកទៅលើការស្គាល់សេចក្តីពិត
១កូរិនថូស ៦:១៥-១៦ ៖ “តែមិនដឹងថា រូបកាយអ្នករាល់គ្នា ជាអវយវៈរបស់ព្រះទេឬអី ដូច្នេះ តើខ្ញុំនឹងយកអវយវៈរបស់ព្រះគ្រីស្ទ ឲ្យទៅធ្វើជាអវយវៈរបស់ស្រីសំផឹងវិញឬ ទេ មិនត្រូវឡើយ ចុះតើអ្នករាល់គ្នាមិនដឹងទេឬអីថា អ្នកណាដែលទៅសេពសម្ភពនឹងស្រីសំផឹង នោះជារូបសាច់តែ១ផងគ្នា?”
៤) រូបកាយព្រះគ្រីស្ទបានស្អាងឡើង ដោយសេចក្តីពិត ក្នុងសេចក្តីស្រឡាញ់
កូល៉ុស ១:២៨ ៖ “យើងខ្ញុំប្រកាសប្រាប់ពីទ្រង់ ទាំងទូន្មានដល់គ្រប់មនុស្ស ហើយទាំងបង្រៀនដល់គ្រប់មនុស្ស ដោយគ្រប់ទាំងប្រាជ្ញា ដើម្បីឲ្យបានថ្វាយគ្រប់មនុស្ស ជាដង្វាយគ្រប់លក្ខណ៍ក្នុងព្រះគ្រីស្ទ”។
សូមព្រះទ្រង់ជួយយើងឲ្យមានចិត្តឆេះឆួល ចំពោះព្រះអង្គ និងចំពោះសេចក្តីពិត។