និក្ខមនំ ៤:១-៥
នោះព្រះយេហូវ៉ាទ្រង់មានព្រះបន្ទូលតបថា “តើមានអ្វីនៅដៃឯងនោះ លោកទូលឆ្លើយថា មានដំបង?”។ និក្ខមនំ ៤:២
អាគារសាលាក្រុង នៅទីក្រុងប្រ៊ីសបេន ប្រទេសអូស្ត្រាលី ត្រូវបានសាងសង់ ក្នុងទសវត្សរ៍ឆ្នាំ១៩២០។ គេធ្វើកាំជណ្តើររបស់អគារនោះ ពីថ្មម៉ាបដ៏ប្រណិត ដែលមានប្រភពនៅក្នុងកន្លែងយកថ្ម ដែលលោកម៉ៃឃលអេនជេឡូ(Michelangelo) បានប្រើប្រាស់ ក្នុងការឆ្លាក់រូបចម្លាក់ស្តេចដាវីឌ។ ប៉មរបស់សាលាក្រុងនោះបានឆ្លុះបញ្ចាំង អំពីព្រះវិហារធំ នៅទីក្រុងវេនីស ប្រទេសអ៊ីតាលី ដែលមានដំបូងធ្វើពីទង់ដែងធំបំផុត ក្នុងតំបន់ខាងត្បូងនៃផែនដី។ ពួកអ្នកសាងសង់ចង់សាងសង់រូបចម្លាក់តំណាងឲ្យសន្តិភាព ដើម្បីតុបតែងកំពូលប៉ម តែពួកគេមិនមានថវិកាសម្រាប់ការសាងសង់។ កាលនោះ លោកហ្វ្រេត ចនសិន(Fred Johnson) ជាជាងតបណ្តេញទឹក ក៏បានជួយដោះស្រាយបញ្ហានេះ។ គាត់បានប្រើធុងទឹកបង្គន់ បង្គោលភ្លើងចាស់មួយដើម និងកំទេចដែកតូចៗ មកកែឆ្នៃធ្វើរូបដុំមូល ប្រៀបដូចជាមកុដនៅលើកំពូលប៉មនោះ អស់រយៈពេលជាង១រយឆ្នាំហើយ។
ការដែលលោកហ្វ្រេដ ចនសិនបានប្រើរបស់អ្វីដែលគាត់មាន ដើម្បីសម្រេចកិច្ចការដ៏សំខាន់នោះ គឺបានរំឭកយើងថា យើងក៏អាចចូលរួមក្នុងកិច្ចការរបស់ព្រះអម្ចាស់ ដោយប្រើការអ្វីដែលយើងមាន ទោះតូចឬធំក្តី។ កាលព្រះអង្គបង្គាប់លោកម៉ូសេឲ្យដឹកនាំពួកអ៊ីស្រាអែលចេញពីទឹកដីអេស៊ីព្ទ លោកម៉ូសេបានប្រកែកថា “មើល គេនឹងមិនជឿទូលបង្គំ ឬស្តាប់តាមទូលបង្គំទេ”(៤:១)។ ព្រះអង្គក៏បានឆ្លើយតប ដោយសំណួរដ៏សាមញ្ញថា “តើមានអ្វីនៅដៃឯងនោះ?”(ខ.២) លោកម៉ូសេកំពុងកាន់ដំបង ជាឈើធម្មតាមួយដើម។ ព្រះអង្គក៏បានប្រាប់គាត់ឲ្យបោះដំបងនោះទៅលើដី ហើយវាក៏បានក្លាយជាសត្វពស់(ខ.៣)។ បន្ទាប់មក ព្រះអង្គក៏បានប្រាប់លោកម៉ូសេឲ្យរើសពស់នោះ ហើយវាក៏បានប្រែក្លាយជាដំបងវិញ។ ព្រះអម្ចាស់ក៏បានពន្យល់ថា ការអ្វីដែលលោកម៉ូសេត្រូវធ្វើ គឺត្រូវកាន់ដំបងនោះ ហើយទុកចិត្តថា ព្រះអង្គនឹងសម្រេចកិច្ចការដែលព្រះអង្គឲ្យគាត់ធ្វើ។ អ្វីដែលគួរឲ្យកត់សំគាល់នោះ គឺព្រះអង្គបានប្រើដំបងក្នុងដៃរបស់លោកម៉ូសេ ដើម្បីសង្រ្គោះជនជាតិអ៊ីស្រាអែល ឲ្យរួចផុតពីការកៀបសង្កត់របស់ជនជាតិអេស៊ីព្ទ(៧:១០-១២ ១៧:៥-៧)។
អ្វីដែលយើងមាន ប្រហែលហាក់ដូចជាមិនច្រើន សម្រាប់យើងទេ ប៉ុន្តែ អ្វីដែលយើងមាន សុទ្ធតែមានភាពគ្រប់គ្រាន់សម្រាប់ឲ្យព្រះអង្គប្រើ។ ព្រះអង្គទទួលយកធនធានដ៏សាមញ្ញរបស់យើង ហើយប្រើពួកវា ដើម្បីសម្រេចកិច្ចការព្រះអង្គ។—Winn Collier
តើមានកិច្ចការដ៏តូចអ្វីខ្លះ ដែលអ្នកអាចធ្វើ ថ្វាយព្រះអង្គ? ហេតុអ្វីអ្នកចាំបាច់ត្រូវចាត់ទុកចិត្តថា ព្រះអង្គអាចប្រើវា ដើម្បីសម្រេចផែនការព្រះអង្គ?
ឱព្រះអម្ចាស់ ទូលបង្គំសូមថ្វាយអ្វីៗទាំងអស់ដែលទូលបង្គំមាន។
គម្រោងអានព្រះគម្ពីររយៈពេល១ឆ្នាំ : ចោទិយកថា ៥-៧ និង ម៉ាកុស ១១:១-១៨
